టెక్ దిగ్గజం గూగుల్కు ఐర్లాండ్ డేటా ప్రొటెక్షన్ కమిషన్ (DPC) భారీ జరిమానా విధించింది. యూజర్ల లొకేషన్ డేటాను ప్రాసెస్ చేసిన విధానంలో యూరోపియన్ యూనియన్ జనరల్ డేటా ప్రొటెక్షన్ రెగ్యులేషన్ (GDPR) నిబంధనలను ఉల్లంఘించినట్లు నిర్ధారించిన డీపీసీ.. గూగుల్పై 403 మిలియన్ యూరోలు, అంటే భారత కరెన్సీలో సుమారు రూ.3,700 కోట్ల ఫైన్ విధించింది. ఈ నిర్ణయాన్ని సెప్టెంబర్ 21న ప్రకటించింది.
డీపీసీ దర్యాప్తు ప్రకారం.. 2018 మే 25 నుంచి 2020 ఫిబ్రవరి 4 వరకు గూగుల్ యూజర్ల లొకేషన్ సమాచారాన్ని నిర్వహించిన తీరులో తగినంత పారదర్శకత లేదని తేలింది. ముఖ్యంగా ఆండ్రాయిడ్లోని ‘వెబ్ అండ్ యాప్ యాక్టివిటీ’, ‘లొకేషన్ హిస్టరీ’, ‘లొకేషన్ అక్యురసీ’ వంటి ఫీచర్ల ద్వారా సేకరించిన సమాచారాన్ని ఏ విధంగా ఉపయోగిస్తున్నారనే విషయాన్ని వినియోగదారులకు స్పష్టంగా వివరించలేదని కమిషన్ పేర్కొంది.
యూజర్ల ఆసక్తులను అంచనా వేయడం, ప్రకటనలకు సంబంధించిన ప్రయోజనాల కోసం లొకేషన్ డేటాను ఉపయోగించే అంశాలపై కూడా తగిన సమాచారం అందించలేదని డీపీసీ తెలిపింది. అంతేకాకుండా.. అవసరమైన వ్యవధి కంటే ఎక్కువకాలం వ్యక్తిగత సమాచారాన్ని నిల్వ చేసినట్లు కూడా దర్యాప్తులో గుర్తించినట్లు వెల్లడించింది.
ఈ జరిమానాతో పాటు మరో కీలక ఆదేశాన్ని కూడా డీపీసీ జారీ చేసింది. గూగుల్ తన లొకేషన్ డేటా ప్రాసెసింగ్ విధానాలను ఆరు నెలల్లోగా GDPR నిబంధనలకు అనుగుణంగా మార్చుకోవాలని ఆదేశించింది. ఐర్లాండ్ డేటా ప్రొటెక్షన్ కమిషన్ ఇప్పటివరకు విధించిన జరిమానాల్లో ఇది నాలుగో అతిపెద్ద జరిమానాగా నిలిచింది.
ఇదే సమయంలో గూగుల్పై మరో మూడు ప్రైవసీ ఉల్లంఘనలకు సంబంధించిన దర్యాప్తులు తుది దశలో ఉన్నాయని డీపీసీ వెల్లడించింది. యూరోపియన్ కన్జ్యుమర్ ఆర్గనైజేషన్లు 2020లో చేసిన ఫిర్యాదుల ఆధారంగా ప్రస్తుత దర్యాప్తు ప్రారంభమైంది. గూగుల్కు యూరోపియన్ ప్రధాన కార్యాలయం ఐర్లాండ్లో ఉండటంతో.. యూరోపియన్ యూనియన్ పరిధిలో ఈ కేసుకు ప్రధాన నియంత్రణ సంస్థగా ఐర్లాండ్ డీపీసీ వ్యవహరించింది.
మరోవైపు ఈ నిర్ణయంపై గూగుల్ స్పందించింది. ఈ కేసు గతంలో అనుసరించిన లొకేషన్ డేటా విధానాలకు సంబంధించినదని తెలిపింది. 2019 నుంచే లొకేషన్ డేటా నిర్వహణలో గణనీయమైన మార్పులు చేసినట్లు కంపెనీ పేర్కొంది.
also read: వినాయకుడి మెడలో రూ.50 వేల నోట్ల దండ.. దొంగతనానికి యత్నించిన వ్యక్తికి యువకుల షాక్!