ఆంధ్రప్రదేశ్‌కు మరో తుపాను ముప్పు పొంచి ఉంది. బంగాళాఖాతంలో ఏర్పడిన వాయుగుండం తుపానుగా బలపడటంతో రాష్ట్రంలో వాతావరణ పరిస్థితులపై ఆందోళన నెలకొంది. ఈ తుపాను మరింత తీవ్రరూపం దాల్చే అవకాశముందని వాతావరణ శాఖ హెచ్చరించడంతో ఏపీ ప్రభుత్వం అప్రమత్తమైంది. పరిస్థితిని దృష్టిలో ఉంచుకుని ముఖ్యమంత్రి చంద్రబాబు తన రేపటి ఢిల్లీ పర్యటనను రద్దు చేసుకున్నారు. రాష్ట్రంలో తుపాను ప్రభావం, సహాయక చర్యల సన్నద్ధతపై ఉన్నతాధికారులతో అత్యవసర సమీక్ష నిర్వహించారు.
నవంబర్ 3న తీరం దాటే అవకాశం
వాతావరణ శాఖ వివరాల ప్రకారం.. నైరుతి బంగాళాఖాతంలో కొనసాగుతున్న వాయుగుండం క్రమంగా బలపడుతూ తుపానుగా మారింది. నవంబర్ 2 నాటికి పశ్చిమ మధ్య బంగాళాఖాతంలో తీవ్ర తుపానుగా మారే అవకాశం ఉందని అధికారులు అంచనా వేస్తున్నారు. నవంబర్ 3వ తేదీ ఉదయం బాపట్ల సమీపంలో తీరం దాటవచ్చని భావిస్తున్నారు. తీరాన్ని దాటే సమయంలో గంటకు 100 నుంచి 110 కిలోమీటర్ల వేగంతో బలమైన గాలులు వీచే ప్రమాదం ఉందని హెచ్చరించారు.
కోస్తా జిల్లాలకు భారీ వర్ష సూచన
తుపాను ప్రభావంతో నవంబర్ 2 నుంచి దక్షిణ, మధ్య కోస్తా జిల్లాల్లో వర్షాలు కురిసే అవకాశం ఉంది. కొన్ని ప్రాంతాల్లో భారీ నుంచి అతి భారీ వర్షాలు పడవచ్చని వాతావరణ శాఖ వెల్లడించింది. నవంబర్ 3, 4 తేదీల్లో వర్షాల తీవ్రత మరింత పెరిగే సూచనలు ఉన్నాయి. ముఖ్యంగా 20 మండలాల్లో అత్యంత భారీ వర్షాలు కురిసే ప్రమాదం ఉందని అధికారులు గుర్తించారు.
వీటిలో ఏలూరు జిల్లాలో 9 మండలాలు, కృష్ణా జిల్లాలో 5, ఎన్టీఆర్ జిల్లాలో 5, బాపట్ల జిల్లాలో ఒక మండలం ఉన్నాయి. నవంబర్ 3న ఏలూరు జిల్లాలో సగటున 179 మిల్లీమీటర్లు, కృష్ణాలో 163, ఎన్టీఆర్ జిల్లాలో 161, పశ్చిమ గోదావరిలో 147, గుంటూరులో 119, బాపట్లలో 104 మిల్లీమీటర్ల వర్షపాతం నమోదయ్యే అవకాశం ఉందని అంచనా వేశారు.
బుడమేరు సహా పలు వాగులకు వరద ప్రమాదం
ఎడతెరిపి లేకుండా భారీ వర్షాలు కురిస్తే వరద పరిస్థితులు తలెత్తవచ్చని అధికారులు ముఖ్యమంత్రికి వివరించారు. నవంబర్ 3న బుడమేరు వద్ద సుమారు 32,500 క్యూసెక్కుల వరద ప్రవాహం ఉండవచ్చని అంచనా వేశారు. ఎర్రకాల్వ, గోనెలవాగు, జల్లేరు, పంపా ప్రాంతాల్లోనూ వరద ముప్పు పొంచి ఉందని అప్రమత్తం చేశారు.
మరోవైపు, బలమైన ఈదురుగాలుల కారణంగా 12 జిల్లాల్లో విద్యుత్ వ్యవస్థకు నష్టం వాటిల్లే అవకాశముందని అధికారులు తెలిపారు. ప్రాథమిక అంచనాల ప్రకారం 12,102 నుంచి 15,128 వరకు విద్యుత్ స్తంభాలు దెబ్బతినే ప్రమాదం ఉందని వెల్లడించారు.
అధికారులకు చంద్రబాబు కీలక సూచనలు
తుపాను ప్రభావిత ప్రాంతాల్లో ప్రజలకు ఎలాంటి ఇబ్బందులు కలగకుండా ముందస్తు ఏర్పాట్లు చేయాలని చంద్రబాబు అధికారులను ఆదేశించారు. ప్రాణ, ఆస్తి నష్టాన్ని తగ్గించడమే లక్ష్యంగా అన్ని శాఖలు సమన్వయంతో పనిచేయాలని సూచించారు. అవసరమైన చోట సహాయక బృందాలను సిద్ధంగా ఉంచాలని, విద్యుత్, రహదారులు, తాగునీటి సరఫరాకు అంతరాయం కలగకుండా చర్యలు చేపట్టాలని స్పష్టం చేశారు.
ఇదే సమీక్షలో ఇటీవల రాష్ట్రాన్ని ప్రభావితం చేసిన ‘అర్నబ్’ తుపాను వల్ల జరిగిన నష్టంపై కూడా చర్చించారు. ప్రభావిత ప్రాంతాల్లో విద్యుత్ పునరుద్ధరణ పనుల వివరాలను సీఎం అడిగి తెలుసుకున్నారు. మిగిలిన ప్రాంతాల్లోనూ విద్యుత్ సరఫరాను పూర్తిస్థాయిలో పునరుద్ధరిస్తామని అధికారులు హామీ ఇచ్చారు.
రాబోయే తుపానును ఎదుర్కొనేందుకు ప్రభుత్వ యంత్రాంగం ముందుగానే సిద్ధం కావాలని, పరిస్థితిని నిరంతరం పర్యవేక్షించాలని చంద్రబాబు ఆదేశించారు.
also read: జ్ఞానేశ్ కుమార్ రాజీనామా చేసే వరకు పోరాటం ఆపం.. ఖర్గే సంచలన వ్యాఖ్యలు!