ప్రముఖ సినీ నటి రెజీనా కసాండ్రా కీలక నిర్ణయం తీసుకున్నారు. తాను సహ వ్యవస్థాపకురాలిగా వ్యవహరించిన ‘డెమోక్రటిక్ సంఘ’ స్వచ్ఛంద సంస్థతో తన అనుబంధాన్ని పూర్తిగా తెంచుకుంటున్నట్లు ప్రకటించారు. ఇకపై సంస్థలో ఎలాంటి బాధ్యతలు నిర్వహించబోనని స్పష్టం చేశారు. ఈ విషయాన్ని వెల్లడిస్తూ సోషల్ మీడియా వేదికగా అధికారిక ప్రకటన విడుదల చేశారు.
హైదరాబాద్‌లోని బంజారాహిల్స్ కేంద్రంగా దీప్తి ఆలపాటితో కలిసి రెజీనా ఈ స్వచ్ఛంద సంస్థను ప్రారంభించినట్లు సమాచారం. అయితే, ప్రస్తుతం ఈ సంస్థ నుంచి తప్పుకోవడానికి గల నిర్దిష్ట కారణాలను మాత్రం ఆమె వెల్లడించలేదు. సుదీర్ఘంగా ఆలోచించిన తర్వాతే ఈ నిర్ణయం తీసుకున్నట్లు తన ప్రకటనలో పేర్కొన్నారు.
సోషల్ మీడియాలో రెజీనా ఏమన్నారంటే?
‘డెమోక్రటిక్ సంఘ’తో తన ప్రయాణం ఎంతో ప్రత్యేకమైనదని రెజీనా తెలిపారు. సంస్థలో సహ వ్యవస్థాపకురాలిగా, సభ్యురాలిగా తనకున్న అన్ని బాధ్యతల నుంచి తప్పుకుంటున్నట్లు వెల్లడించారు. ఈ సంస్థ ద్వారా ఎన్నో మంచి అనుభవాలు, స్నేహాలు, మధుర జ్ఞాపకాలు సంపాదించుకున్నానని పేర్కొన్నారు.
సంస్థ ఏర్పాటులో భాగస్వామ్యం కావడం తనకు దక్కిన గొప్ప అవకాశంగా భావిస్తున్నట్లు చెప్పారు. సంస్థ లక్ష్యాల సాధన కోసం తన వంతు కృషి చేసినందుకు సంతోషంగా ఉందన్నారు. అయితే, జీవితంలో తదుపరి దశకు అడుగులు వేస్తున్న నేపథ్యంలో కొత్త మార్గాన్ని ఎంచుకోవాలని, ఇతర వ్యక్తిగత ప్రాధాన్యతలపై దృష్టి సారించాలని నిర్ణయించుకున్నట్లు వివరించారు.
ఈ ప్రయాణంలో తనకు అండగా నిలిచిన సహచరులు, స్నేహితులు, శ్రేయోభిలాషులకు ప్రత్యేకంగా కృతజ్ఞతలు తెలిపారు. వారితో ఏర్పడిన అనుబంధాన్ని ఎప్పటికీ మర్చిపోలేనని పేర్కొన్నారు. ‘డెమోక్రటిక్ సంఘ’ భవిష్యత్తులో మరింత అభివృద్ధి సాధించాలని, సంస్థతో అనుబంధం ఉన్న ప్రతి ఒక్కరికీ మంచి జరగాలని ఆకాంక్షించారు.
రెజీనా తీసుకున్న ఈ నిర్ణయం ప్రస్తుతం సినీ, సామాజిక వర్గాల్లో ఆసక్తికరంగా మారింది. అయితే ఆమె వైదొలగడానికి గల కారణాలపై మాత్రం ఇంకా స్పష్టత రావాల్సి ఉంది.
also read: సీతాదేవి పాత్ర కోసం సాయి పల్లవి ప్రత్యేక సాధన.. ప్రార్థనలు, ధ్యానంతో సిద్ధం!