తెలుగు రాష్ట్రాలపై భానుడు తన ప్రతాపాన్ని చూపిస్తున్నాడు. ఉదయం నుంచే మండుతున్న ఎండలు ప్రజలను ఉక్కిరిబిక్కిరి చేస్తున్నాయి. బయటకు అడుగు పెట్టాలంటేనే ప్రజలు భయపడే పరిస్థితి నెలకొంది. కేవలం కొద్దిదూరం ప్రయాణించినా కళ్లు తిరిగేంత వేడి, శరీరం అలసిపోయేంత ఉక్కపోత ప్రజలను తీవ్ర ఇబ్బందులకు గురి చేస్తోంది. బయట పరిస్థితి ఇలా ఉంటే ఇళ్లలో కూడా ఉపశమనం కనిపించడం లేదు. ఫ్యాన్లు, కూలర్లు నిరంతరం పనిచేస్తున్నా చెమటలు ఆగడం లేదు. పగటి వేడి రాత్రి వరకూ కొనసాగుతుండటంతో ప్రజలు నిద్రలేని రాత్రులు గడుపుతున్నారు. తెలుగు రాష్ట్రాల్లో పలు ప్రాంతాల్లో 48 డిగ్రీల వరకు ఉష్ణోగ్రతలు నమోదవుతున్నాయని వాతావరణ శాఖ హెచ్చరిస్తోంది. రాబోయే కొన్ని రోజులు కూడా ఇదే పరిస్థితి కొనసాగే అవకాశాలు ఉన్నాయని అధికారులు చెబుతున్నారు.
తెలంగాణలో పరిస్థితి మరింత ఆందోళనకరంగా మారుతోంది. ఉత్తర తెలంగాణతో పాటు పలు జిల్లాల్లో తీవ్ర వడగాలులు కొనసాగుతున్న నేపథ్యంలో వాతావరణ శాఖ రెడ్ అలర్ట్ ప్రకటించింది. కొన్ని జిల్లాలకు ఆరెంజ్ అలర్ట్ కూడా అమలులో ఉంది. పగటి సమయంలో నమోదవుతున్న అత్యధిక ఉష్ణోగ్రతల ప్రభావం రాత్రిపూట కూడా కొనసాగుతోంది. గాలిలో తేమ శాతం తగ్గిపోవడంతో చల్లదనం పూర్తిగా కనిపించడం లేదు. దీంతో ఉక్కపోత మరింత పెరిగింది. రాష్ట్రంలోని అనేక ప్రాంతాల్లో అత్యధిక ఉష్ణోగ్రతలు నమోదయ్యే అవకాశం ఉందని అధికారులు ప్రజలను అప్రమత్తం చేస్తున్నారు. ముఖ్యంగా మధ్యాహ్నం సమయాల్లో అత్యవసరమైతే తప్ప బయటకు రావద్దని సూచిస్తున్నారు.
అటు ఆంధ్రప్రదేశ్లో కూడా వేసవి తీవ్రత కొత్త రికార్డులు సృష్టిస్తోంది. పల్నాడు జిల్లా పిడుగురాళ్లలో ఏకంగా 48.1 డిగ్రీల ఉష్ణోగ్రత నమోదై ఈ సీజన్లో అత్యధిక స్థాయికి చేరింది. ప్రకాశం సహా పలు జిల్లాల్లో 47 డిగ్రీల వరకు ఉష్ణోగ్రతలు నమోదవుతున్నాయి. రాష్ట్రవ్యాప్తంగా సుమారు 200 మండలాల్లో 44 డిగ్రీలకుపైగా ఉష్ణోగ్రతలు నమోదయ్యాయని అధికారులు వెల్లడించారు. మరో 150 మండలాల్లో 40 డిగ్రీల మార్కును దాటాయి. దీంతో వృద్ధులు, చిన్నపిల్లలు, గర్భిణీలు, గుండె సంబంధిత సమస్యలు ఉన్నవారు ప్రత్యేక జాగ్రత్తలు తీసుకోవాలని హెచ్చరికలు జారీ చేశారు. ఉదయం 11 గంటల నుంచి సాయంత్రం 4 గంటల వరకు బయట తిరగకుండా ఉండాలని సూచిస్తున్నారు.
ఇదిలా ఉండగా ఎండల తీవ్రత కొనసాగుతున్న సమయంలో మరోవైపు వాతావరణంలో మార్పులు కూడా కనిపిస్తున్నాయి. రాయలసీమ ప్రాంతంలోని కర్నూలు, నంద్యాల, అనంతపురం, శ్రీసత్యసాయి, కడప, అన్నమయ్య, చిత్తూరు జిల్లాల్లో అక్కడక్కడ ఉరుములు, బలమైన మెరుపులు, పిడుగులు పడే అవకాశాలు ఉన్నాయని వాతావరణ శాఖ హెచ్చరిస్తోంది. ఎండలు తీవ్రంగా ఉన్నప్పటికీ కొన్ని ప్రాంతాల్లో ఆకస్మిక వర్షాలు, ఈదురుగాలులు సంభవించే అవకాశం ఉండటంతో ప్రజలు అప్రమత్తంగా ఉండాలని సూచిస్తున్నారు. ఎండలతో పాటు పిడుగుల ప్రమాదం కూడా ఉండే అవకాశం ఉన్నందున బహిరంగ ప్రదేశాల్లో ఎక్కువసేపు ఉండకూడదని అధికారులు సూచిస్తున్నారు.
ALSO READ: UP Horror: అర్ధరాత్రి గర్ల్స్ హాస్టల్ లోకి చొరబడి.. ఇద్దరు అమ్మాయిలను.. యూపీలో ఘోరం!
