అడ్వెంచర్ స్పోర్ట్స్ ఎంత ఉత్సాహాన్ని ఇస్తాయో, ఒక చిన్న నిర్లక్ష్యం ఎంతటి విషాదాన్ని మిగులుస్తుందో బ్రెజిల్లో జరిగిన ఈ ఘటన నిరూపిస్తోంది. సాహసం కోసం వెళ్లిన ఓ యువతి, నిర్వాహకుల ఘోర తప్పిదం వల్ల ప్రాణాలు కోల్పోవడమే కాకుండా… కిందపడిన తర్వాత కూడా కొద్ది సేపు ప్రాణాలతో పోరాడిందనే విషయం ఈ సంఘటనను మరింత కలచివేస్తోంది.
బ్రెజిల్లోని సావోపాలో రాష్ట్రంలోని లైమీరా నగరంలో ఉన్న ‘స్కెలెటన్ బ్రిడ్జ్’ వద్ద ఈ ప్రమాదం చోటుచేసుకుంది. 21 ఏళ్ల ఫిజికల్ ఎడ్యుకేషన్ విద్యార్థిని మారియా ఎదువార్డా రోడ్రిగ్స్ డి ఫ్రీటాస్ రోప్ జంపింగ్ అనుభవం కోసం ఒక ప్రైవేట్ ఈవెంట్లో పాల్గొంది. ‘ఎంట్రే కోర్డాస్’ అనే అనుమతి లేని సంస్థ ఈ కార్యక్రమాన్ని నిర్వహించినట్లు సమాచారం.
జంప్కు ముందు ఆమెను వంతెన అంచుకు తీసుకువెళ్లిన ఇన్స్ట్రక్టర్లు, భద్రతా తాడు కట్టాల్సిన అత్యంత ముఖ్యమైన ప్రక్రియను పూర్తిగా విస్మరించారు. ‘సూపర్మ్యాన్’ పొజిషన్లో ఆమెను నిలబెట్టి, క్షణాల్లోనే కిందకు నెట్టేశారు. అక్కడే ఉన్న కొందరు తాడు కట్టలేదని గట్టిగా హెచ్చరించినప్పటికీ, అప్పటికే ఆలస్యమైపోయింది. సుమారు 130 అడుగుల ఎత్తు నుంచి ఆమె కిందపడిపోయింది.
ఈ ఘటనకు సంబంధించిన వీడియోలు బయటకు రావడంతో సోషల్ మీడియాలో తీవ్ర ఆగ్రహం వ్యక్తమవుతోంది. అయితే ఈ విషాదంలో మరింత హృదయ విదారక అంశం తర్వాత బయటపడింది. ప్రమాదం జరిగిన సమయంలో అక్కడే సెలవులో ఉన్న రైజా డయాస్ అనే నర్స్ వెంటనే సంఘటనా స్థలానికి చేరుకుంది. ఆమె వెల్లడించిన వివరాల ప్రకారం, మరియా కిందపడిన వెంటనే చనిపోలేదు. తాను చేరుకునే సరికి ఆమె ఇంకా శ్వాస తీసుకుంటూ ఉందని, నాడి చాలా బలహీనంగా ఉన్నప్పటికీ ప్రాణాలతో పోరాడుతుందని తెలిపింది. వెంటనే ఆమెకు సీపీఆర్ చేసి కాపాడేందుకు ప్రయత్నించినా, తీవ్ర గాయాల కారణంగా అత్యవసర సిబ్బంది చేరుకునే సరికి ఆమె ప్రాణాలు కోల్పోయింది.
ఈ ఘటనను కళ్లారా చూసిన ఆమె కాబోయే భర్త తీవ్ర షాక్కు గురై అక్కడికక్కడే అస్వస్థతకు లోనయ్యాడు. అతడిని ఆస్పత్రికి తరలించారు. మరోవైపు, పోలీసులు వెంటనే దర్యాప్తు ప్రారంభించి ఈవెంట్ నిర్వహణలో పాల్గొన్న వారిని అదుపులోకి తీసుకున్నారు. ముఖ్యంగా ముగ్గురు ఇన్స్ట్రక్టర్లను అరెస్ట్ చేసి విచారిస్తున్నారు.
విచారణలో తాడు కట్టలేదనే విషయాన్ని వారు అంగీకరించినప్పటికీ, ఆ సమయంలో ఆ పని ఎవరు చేయాల్సిందో, ఎవరు మర్చిపోయారో తమకు గుర్తులేదని చెప్పడం మరింత ఆశ్చర్యానికి గురిచేస్తోంది. ఈ నిర్లక్ష్యం ఎంత ప్రాణాంతకమైందో ఈ ఘటన స్పష్టం చేస్తోంది.
ఉపాధ్యాయురాలిగా ఎదగాలని కలలు కన్న యువతి… ఇలా ఒక చిన్న తప్పిదం వల్ల ప్రాణాలు కోల్పోవడం బ్రెజిల్ వ్యాప్తంగా తీవ్ర చర్చకు దారితీసింది. అనుమతి లేకుండా, సరైన భద్రతా ప్రమాణాలు లేకుండా నిర్వహిస్తున్న అడ్వెంచర్ కార్యక్రమాలపై కఠిన చర్యలు తీసుకోవాలనే డిమాండ్లు వెల్లువెత్తుతున్నాయి.
ఇది విషాదం ఒక్కటే కాదు… అడ్వెంచర్ పేరుతో జరుగుతున్న నిర్లక్ష్యానికి ఒక గట్టి హెచ్చరిక. సాహసం చేయడం ముందు భద్రతపై పూర్తి అవగాహన, నిర్వాహకుల నమ్మకంపై స్పష్టత అవసరం. ఒక చిన్న తప్పు… ఒక కుటుంబాన్ని శాశ్వతంగా విషాదంలో ముంచెత్తగలదని ఈ ఘటన మనకు గుర్తుచేస్తోంది.
also read: చిరంజీవి వదిలేసిన కథే… OTTలో సంచలనం సృష్టించిన ‘ది ఫ్యామిలీ మాన్’!
