మాజీ మంత్రి, వైసీపీ నాయకురాలు విడదల రజిని నరసరావుపేట డీఎస్పీ కార్యాలయానికి వెళ్లి తన పాస్పోర్టును అధికారులకు అప్పగించారు. హైకోర్టు ఆదేశాల మేరకే ఆమె ఈ చర్య తీసుకున్నట్లు తెలిసింది. డీఎస్పీ హనుమంతరావుకు ఆమె స్వయంగా పాస్పోర్టును సరెండర్ చేశారు.
పాస్ పోర్టు సరెండర్ ఎందుకు?
పల్నాడు జిల్లా చిలకలూరిపేటకు చెందిన టీడీపీ నేత పిల్లి కోటి ఇచ్చిన ఫిర్యాదు ఆధారంగా విడదల రజినితో పాటు మరికొందరిపై ఎస్సీ, ఎస్టీ అట్రాసిటీ కేసు నమోదైంది. ఈ కేసు రాజకీయంగా కూడా చర్చనీయాంశంగా మారింది. ఫిర్యాదులో పేర్కొన్న అంశాలపై పోలీసులు ఇప్పటికే దర్యాప్తు ప్రారంభించారు. ఈ కేసులో ముందస్తు బెయిల్ కోసం విడదల రజిని హైకోర్టును ఆశ్రయించారు. కేసును విచారించిన న్యాయస్థానం ఆమెకు కొన్ని షరతులతో కూడిన ఉపశమనం కల్పించింది. అందులో భాగంగా పాస్పోర్టును పోలీసులకు అప్పగించాలని ఆదేశాలు జారీ చేసింది. కోర్టు విధించిన నిబంధనలను పాటిస్తూ రజిని డీఎస్పీ కార్యాలయానికి వెళ్లి పాస్పోర్టును సమర్పించారు.ఈ సందర్భంగా కార్యాలయం వద్ద పోలీసులు భద్రతను ఏర్పాటు చేశారు. కొంతసేపు అక్కడ ఉద్రిక్తత వాతావరణం కనిపించినప్పటికీ ఎలాంటి అవాంఛనీయ ఘటనలు జరగలేదు. రజిని వచ్చిన వెంటనే అధికారిక ప్రక్రియ పూర్తి చేసి అక్కడి నుంచి వెళ్లిపోయారు.
ఈ కేసుపై రాజకీయాల్లో కీలక చర్చ
విడదల రజినిపై నమోదైన ఈ కేసు ప్రస్తుతం రాజకీయ వర్గాల్లో చర్చకు దారితీస్తోంది. అధికార, ప్రతిపక్ష పార్టీల నేతలు ఈ అంశంపై తమ తమ అభిప్రాయాలు వ్యక్తం చేస్తున్నారు. అయితే, కేసు దర్యాప్తు కొనసాగుతోందని, పూర్తి వివరాలు విచారణ తర్వాతే వెల్లడవుతాయని పోలీసులు తెలిపారు. హైకోర్టు ఆదేశాలను పాటిస్తూ పాస్పోర్టును సరెండర్ చేయడం ద్వారా న్యాయ ప్రక్రియకు సహకరిస్తున్నట్లు రజిని సన్నిహితులు తెలిపారు. ఇక ఈ కేసులో తదుపరి పరిణామాలపై రాజకీయ వర్గాల్లో ఆసక్తి నెలకొంది.
