TMC Allegations: భారత మాజీ క్రికెటర్ మనోజ్ తివారీ రాజకీయాలకు గుడ్ బై చెబుతూ సంచలన నిర్ణయం తీసుకున్నారు. పశ్చిమ బెంగాల్ ఎన్నికల ఫలితాల అనంతరం స్పందించిన ఆయన.. తృణమూల్ కాంగ్రెస్తో తన రాజకీయ ప్రయాణం ముగిసిందని స్పష్టం చేశారు. హౌరాలోని శిబ్పూర్ నియోజకవర్గం నుంచి ఈసారి తనకు టికెట్ నిరాకరించబడటానికి పెద్ద మొత్తంలో డబ్బు డిమాండ్ కారణమని ఆయన ఆరోపించారు. బెంగాల్ క్రికెట్ చరిత్రలో 10,195 ఫస్ట్ క్లాస్ పరుగులు నమోదు చేసిన ఈ 40 ఏళ్ల క్రీడాకారుడు, గతంలో రాష్ట్ర ప్రభుత్వంలో మంత్రిగా కూడా బాధ్యతలు నిర్వర్తించిన విషయం తెలిసిందే.
ఎన్నికల్లో పార్టీ పరాజయంపై స్పందిస్తూ మనోజ్ తివారీ తీవ్ర విమర్శలు గుప్పించారు. పార్టీ పూర్తిగా అవినీతిలో మునిగిపోయిందని, అభివృద్ధి లేకపోవడం వల్లే ఈ పరిస్థితి వచ్చిందని అన్నారు. టికెట్ల కేటాయింపులో భారీ స్థాయిలో డబ్బు లావాదేవీలు జరిగాయని ఆరోపిస్తూ, కనీసం 70 నుంచి 72 మంది అభ్యర్థులు ఒక్కొక్కరు రూ.5 కోట్లు చెల్లించి టికెట్లు పొందారని పేర్కొన్నారు. తనను కూడా అదే విధంగా డబ్బు ఇవ్వాలని అడిగారని, అయితే తాను నిరాకరించానని వెల్లడించారు. డబ్బు చెల్లించి టికెట్లు పొందిన వారిలో ఎంతమంది గెలిచారో పరిశీలించాలని ఆయన సవాల్ విసిరారు.
మమతా బెనర్జీ ప్రభుత్వంలో తనకు ఇచ్చిన పదవిపై కూడా మనోజ్ తివారీ అసంతృప్తి వ్యక్తం చేశారు. “సహాయ మంత్రి” పదవిని కేవలం పేరు కోసం మాత్రమే ఇచ్చారని, ఆ పదవికి ఎలాంటి అధికారాలు లేవని విమర్శించారు. ఏదైనా సమస్యను మమతా బెనర్జీ దృష్టికి తీసుకెళ్లేందుకు ప్రయత్నించినప్పటికీ సరైన స్పందన రాలేదని ఆవేదన వ్యక్తం చేశారు. తన నియోజకవర్గంలోని డ్రైనేజీ సమస్యలను పరిష్కరించేందుకు స్వంతంగా ఖర్చు చేసినప్పటికీ, స్థానిక అధికారులు మరియు పార్టీ నాయకుల నుంచి సహకారం అందలేదని తెలిపారు.
రాష్ట్ర క్రీడా శాఖపై కూడా ఆయన విమర్శలు గుప్పించారు. ముఖ్యంగా అరూప్ బిశ్వాస్ పనితీరుపై అసంతృప్తి వ్యక్తం చేస్తూ, క్రీడలపై ప్రాథమిక అవగాహన కూడా లేదని ఆరోపించారు. క్రీడా కార్యక్రమాల్లో తనను పక్కన పెట్టారని, వేదికపైకి కూడా ఆహ్వానించలేదని చెప్పారు. గత ఏడాది కోల్కతాలో జరిగిన మెస్సీ కార్యక్రమం గందరగోళంగా మారిందని, అందుకే తాను దానికి దూరంగా ఉన్నానని పేర్కొన్నారు.
రాజకీయాలకు స్వస్తి పలికిన మనోజ్ తివారీ ఇప్పుడు మళ్లీ క్రికెట్ వైపు అడుగులు వేస్తున్నారు. బీసీసీఐ లెవల్ 2 కోచింగ్ పరీక్షలో ఉత్తీర్ణత సాధించిన ఆయన.. బెంగాల్ రంజీ జట్టుకు ప్రధాన కోచ్గా పనిచేయాలని లక్ష్యంగా పెట్టుకున్నారు. ఇందుకోసం క్రికెట్ అసోసియేషన్ ఆఫ్ బెంగాల్లో కోచ్ పదవికి దరఖాస్తు చేసుకున్నట్లు వెల్లడించారు. అవినీతి రాజకీయాల కంటే క్రీడలలోనే తనకు గౌరవం దక్కుతుందని ఆయన ఈ సందర్భంగా స్పష్టం చేశారు.
ALSO READ: రౌడీ షీటర్పై సామాన్య వీరుడి వీరోచిత పోరాటం
