సినీ నటి తమన్నా భాటియా బుధవారం తెల్లవారుజామున తిరుమల శ్రీవారిని దర్శించుకున్నారు. కుటుంబ సభ్యులతో కలిసి తిరుమలకు చేరుకున్న ఆమె.. స్వామివారి సుప్రభాత సేవలో పాల్గొని ప్రత్యేక పూజలు నిర్వహించారు. సంప్రదాయ దుస్తుల్లో ఆలయానికి వచ్చిన తమన్నా భక్తులను ఆకట్టుకున్నారు.
దర్శనం అనంతరం ఆలయం వెలుపల మీడియాతో మాట్లాడిన తమన్నా.. తిరుమల అనుభూతిని పంచుకున్నారు. చాలా రోజుల తర్వాత శ్రీవారిని దర్శించుకునే అవకాశం లభించిందని చెప్పారు. స్వామివారి దర్శనం ఎంతో సంతృప్తిని, ప్రశాంతతను ఇచ్చిందని తెలిపారు.
చిన్నప్పటి నుంచే తిరుమలకు వస్తున్నప్పటికీ.. ఈసారి పొందిన అనుభూతి తనకు ఎంతో ప్రత్యేకంగా అనిపించిందని తమన్నా పేర్కొన్నారు. శ్రీవారి దర్శనం చాలా బాగా జరిగిందని, తాను ఎంతో అదృష్టంగా భావిస్తున్నానని చెప్పారు. ఈ సందర్భంగా అందరి కోసం ప్రార్థించినట్లు తెలిపారు.
దర్శనం పూర్తయిన అనంతరం రంగనాయకుల మండపంలో తమన్నాకు వేద పండితులు ఆశీర్వచనం అందించారు. అనంతరం శ్రీవారి తీర్థప్రసాదాలను ఆమెకు అందజేశారు. తిరుమల పర్యటనకు సంబంధించిన తమన్నా ఫొటోలు, వీడియోలు ప్రస్తుతం సోషల్ మీడియాలో వైరల్‌గా మారాయి.
మరోవైపు సినిమాల విషయానికొస్తే.. తమన్నా ప్రస్తుతం పలు ప్రాజెక్టులతో బిజీగా ఉన్నారు. తెలుగులో ఆమె చివరిగా ‘ఓదెల 2’ చిత్రంలో కనిపించారు. ప్రస్తుతం హిందీ, తమిళ భాషల్లో తెరకెక్కుతున్న పలు సినిమాలపై ఆమె దృష్టి సారిస్తున్నట్లు సమాచారం. షూటింగ్‌లతో బిజీగా ఉన్నప్పటికీ సమయం దొరికినప్పుడల్లా ఆధ్యాత్మిక ప్రదేశాలను సందర్శించడం తమన్నాకు అలవాటుగా మారింది.
also read: డ్రగ్స్‌ నుంచి యువతను రక్షించడమే లక్ష్యం- నారా లోకేశ్