2027 మార్చి 31 నాటికి వెయ్యి వ్యాపార సంస్థలు విద్యార్థులకు అంతర్జాతీయ అవకాశాలు కల్పించడమే లక్ష్యమని రాష్ట్ర ఐటీ పరిశ్రమల శాఖ మంత్రి దుద్దిళ్ల శ్రీధర్బాబు స్పష్టం చేశారు. గురువారం సచివాలయంలో ‘ఎక్స్ప్లోర్ టు ఎక్స్పాండ్’ (E2E) అనే ప్రతిష్టాత్మక అంతర్జాతీయ వేదిక లోగోను ఆయన అధికారికంగా ఆవిష్కరించారు. ఈ వేదిక ద్వారా తెలంగాణలోని చిన్న మధ్యతరహా వ్యాపారులు ఎగుమతిదారులు స్టార్టప్లు నిపుణులతో పాటు విద్యార్థులకు ప్రపంచవ్యాప్తంగా ఉన్న అవకాశాలను అన్వేషించే వీలు కలుగుతుందని తెలిపారు. రాష్ట్రం నుంచి ఎగుమతులను ప్రోత్సహించడమే కాకుండా యువతకు అంతర్జాతీయ స్థాయిలో ఉపాధి విద్యా మార్గాలను సుగమం చేసేందుకు ఈ వేదిక వారధిలా పనిచేస్తుందని ఆయన వివరించారు.
తెలంగాణ ప్రస్తుతం సుమారు 19 బిలియన్ డాలర్లకు పైగా ఎగుమతులు సాధిస్తూ దేశంలోనే ప్రముఖ పారిశ్రామిక కేంద్రంగా ఎదుగుతున్నదని మంత్రి శ్రీధర్బాబు పేర్కొన్నారు. ఈ వృద్ధిని మరింత వేగవంతం చేసేందుకు ఎగుమతిదారులు విద్యార్థులపై ప్రత్యేక దృష్టి సారించినట్లు చెప్పారు. ప్రపంచ మార్కెట్లలో ప్రవేశం కల్పించే ఉద్దేశంతో పలు దేశాల్లో ‘ఎక్స్ప్లోరేటరీ మిషన్లు’ నిర్వహించనున్నట్లు వెల్లడించారు. రాష్ట్ర ప్రభుత్వం పెట్టుకున్న ఎగుమతుల వృద్ధి లక్ష్యాలను చేరుకోవడానికి పెట్టుబడులను భారీగా ఆకర్షించడానికి ఈ2ఈ కార్యక్రమం ఒక కీలక సాధనంగా మారుతుందని నిర్వాహకులు ఈ సందర్భంగా ధీమా వ్యక్తం చేశారు. ఇలాంటి వేదికలు యువతకు కొత్త తరహా ఆలోచనలు ప్రపంచ స్థాయి పని సంస్కృతిని పరిచయం చేస్తాయని మంత్రి అభిప్రాయపడ్డారు.
తెలంగాణను గ్లోబల్ బిజినెస్ హబ్గా నిలబెట్టడంలో ఈ కార్యక్రమం ఎంతగానో ఉపయోగపడుతుందని మంత్రి శ్రీధర్బాబు భరోసా ఇచ్చారు. రాష్ట్రంలోని వ్యాపారులు ఎగుమతిదారులు విద్యార్థులు పెద్ద ఎత్తున ఈ వేదికపై నమోదు చేసుకుని అవకాశాలను వినియోగించుకోవాలని పిలుపునిచ్చారు. ఈ వినూత్న కార్యక్రమాన్ని రూపకల్పన చేసి ముందుకు తీసుకెళ్తున్న సందీప్కుమార్ మక్తాలాను మంత్రి ప్రత్యేకంగా అభినందించారు. స్థానిక వ్యాపారాలను అంతర్జాతీయ బ్రాండ్లుగా మార్చేందుకు అవసరమైన అన్ని రకాల సాంకేతిక మద్దతు మార్గదర్శకత్వం ఈ వేదిక ద్వారా అందుబాటులో ఉంటాయని తెలిపారు. రాష్ట్ర ఆర్థికాభివృద్ధిలో ఇదొక మైలురాయిగా నిలుస్తుందని పేర్కొన్నారు.
ఈ అంతర్జాతీయ మిషన్ సిరీస్లో భాగంగా మొదటి పర్యటన సింగపూర్లో ఈ నెల 21 నుండి 24 వరకు నిర్వహించనున్నట్లు నిర్వాహకులు ప్రకటించారు. సింగపూర్ పర్యటన ద్వారా అక్కడి వ్యాపార అవకాశాలు సాంకేతికతపై మన ఎగుమతిదారులకు అవగాహన కల్పిస్తారు. ఈ లోగో ఆవిష్కరణ కార్యక్రమంలో బీజేపీ ఎమ్మెల్యే పాయల్ శంకర్ టీ కన్సల్ట్ డైరెక్టర్ భాగ్య లక్ష్మి వాకిటి సెక్రెటరీ యామిని మద్దుకూరి కేశవ్ సోని తదితరులు పాల్గొన్నారు. పెరుగుతున్న డిమాండ్కు అనుగుణంగా సరఫరా వ్యవస్థను బలోపేతం చేయడమే కాకుండా గ్లోబల్ నెట్వర్కింగ్ను పెంచుకోవడానికి ఈ కార్యక్రమం ఎంతగానో తోడ్పడుతుందని అతిథులు ఆశాభావం వ్యక్తం చేశారు.
