హైదరాబాద్,క్రైమ్మిర్రర్: టాలీవుడ్లో నేచురల్ స్టార్ నాని సినీ ప్రయాణం ఎంతో మందికి స్ఫూర్తిదాయకంగా నిలుస్తోంది. ఎలాంటి సినీ నేపథ్యం లేకుండా పరిశ్రమలో అడుగుపెట్టిన ఆయన, అసిస్టెంట్ డైరెక్టర్గా కెరీర్ ప్రారంభించి స్టార్ హీరోగా ఎదిగారు. ఇప్పుడు నిర్మాతగా కూడా తనదైన ముద్ర స్తున్నారు. తాజాగా నితిన్ హీరోగా తెరకెక్కుతున్న అలియాస్ రుక్మిణీ చిత్రంతో నాని కెరీర్లో మరో ఆసక్తికరమైన ఘట్టం చోటుచేసుకుంది. యూనానిమస్ ప్రొడక్షన్స్ బ్యానర్పై నాని సమర్పిస్తున్న ఈ చిత్రానికి దండోరా ఫేమ్ మురళీకాంత్ దర్శకత్వం వహిస్తున్నారు. ఒక స్టార్ హీరో నిర్మాణంలో మరో స్టార్ హీరో నటిస్తుండటంతో ఈ ప్రాజెక్ట్పై ఇప్పటికే మంచి అంచనాలు ఏర్పడ్డాయి. ఇదే సమయంలో నాని, నితిన్లకు సంబంధించిన ఓ పాత జ్ఞాపకం సోషల్ మీడియాలో వైరల్ అవుతోంది.
Also Read:ట్రైనీ ఐపీఎస్ కేసులో మరో ట్విస్ట్… దర్యాప్తులో కొత్త విషయాలు వెలుగులోకి..
2005లో దర్శకేంద్రుడు కె. రాఘవేంద్రరావు దర్శకత్వంలో తెరకెక్కిన అల్లరి బుల్లోడు సినిమా సమయంలో నాని క్లాప్ అసిస్టెంట్గా పనిచేశారు. ఆ చిత్రంలో హీరోగా నటించిన నితిన్ సన్నివేశాలకు క్లాప్ కొట్టిన వారిలో నాని కూడా ఉన్నారు. అప్పట్లో సినిమా సెట్స్లో అసిస్టెంట్గా పనిచేసిన నాని, ఇప్పుడు అదే నితిన్ హీరోగా నటిస్తున్న సినిమాను నిర్మాతగా సమర్పించడం విశేషంగా మారింది. ఈ రెండు సందర్భాలకు సంబంధించిన ఫొటోలను అభిమానులు సోషల్ మీడియాలో పక్కపక్కన షేర్ చేస్తూ నాని ప్రయాణాన్ని ప్రశంసిస్తున్నారు. ఒకప్పుడు క్లాప్ బోర్డు పట్టిన వ్యక్తి, ఇప్పుడు నిర్మాతగా అదే హీరోతో సినిమా ప్రారంభించడం నిజంగా అరుదైన ఘట్టమంటూ అభిమానులు కామెంట్లు చేస్తున్నారు.
Also Read:సీఆర్పీఎఫ్ క్యాంపులో కాల్పుల కలకలం.. ఇద్దరు జవాన్లు మృతి
నాని మొదట దర్శకుడు కావాలనే లక్ష్యంతో చిత్ర పరిశ్రమలోకి అడుగుపెట్టారు. దర్శకుడు బాపు తెరకెక్కించిన రాధా గోపాలం చిత్రానికి క్లాప్ బాయ్గా, అసిస్టెంట్ డైరెక్టర్గా పనిచేసిన ఆయన, తర్వాత కె. రాఘవేంద్రరావు వద్ద కూడా దర్శకత్వ విభాగంలో అనుభవం సంపాదించారు. అయితే అష్టా చమ్మా సినిమాతో హీరోగా అవకాశం రావడంతో ఆయన కెరీర్ కొత్త మలుపు తిరిగింది. సహజమైన నటనతో ప్రేక్షకులను ఆకట్టుకున్న నాని వరుస విజయాలతో స్టార్ హీరోగా ఎదిగారు. ప్రస్తుతం హీరోగా వంద కోట్ల మార్కెట్ను సొంతం చేసుకున్న ఆయన, నిర్మాతగా కూడా విభిన్న కథలను ప్రోత్సహిస్తున్నారు. ఇప్పుడు అలియాస్ రుక్మిణీ ద్వారా నితిన్తో మరో కొత్త ప్రయాణాన్ని ప్రారంభించడంతో ఈ ప్రాజెక్ట్పై సినీ అభిమానుల్లో మరింత ఆసక్తి నెలకొంది. నిర్మాతగా నాని ఎంపిక చేస్తున్న కథలు, ఆయన ప్రోత్సహిస్తున్న కొత్త దర్శకులు టాలీవుడ్లో ప్రత్యేక చర్చకు దారితీస్తుండగా, ఈ చిత్రం కూడా ఆ జాబితాలో చేరుతుందనే అంచనాలు వ్యక్తమవుతున్నాయి.