Viral Story: అమ్మ మమతకు దూరమైన ఓ చిన్నారి కోతి హృదయాన్ని కదిలించే కథ ఇప్పుడు ప్రపంచవ్యాప్తంగా భావోద్వేగాలను రేకెత్తిస్తోంది. తల్లి ప్రేమ కోసం తహతహలాడుతున్న ఆ చిట్టి జీవి, ఒక మెత్తటి బొమ్మలో తనకు కావాల్సిన ఆప్యాయతను వెతుక్కుంటున్న తీరు చూసిన ప్రతి ఒక్కరి కళ్లలో నీళ్లు తెప్పిస్తోంది. జపాన్ దేశంలోని ఇచికవా జంతుప్రదర్శనశాలలో పెరుగుతున్న 6 నెలల మకాక్ జాతికి చెందిన కోతి పిల్ల ‘పంచ్’ కథ సామాజిక మాధ్యమాల్లో విస్తృతంగా చర్చనీయాంశమైంది.
జూ అధికారుల వెల్లడించిన వివరాల ప్రకారం.. పంచ్ 2025 జూలైలో జన్మించింది. అయితే పుట్టిన వెంటనే తల్లి దాన్ని అంగీకరించకపోవడం దురదృష్టకరం. సాధారణంగా ఈ జాతి కోతుల్లో కొన్నిసార్లు చిన్న వయసు తల్లులు లేదా ఇతర బలమైన కోతుల ముప్పు ఉన్నప్పుడు పిల్లలను వదిలివేసే పరిస్థితులు ఉంటాయని నిపుణులు చెబుతున్నారు. అలాంటి పరిస్థితే పంచ్కు ఎదురైంది. తల్లి దూరం కావడంతో అనాథగా మారిన ఈ చిన్నారిని జూ సిబ్బంది తమ సంరక్షణలోకి తీసుకుని పెంచడం ప్రారంభించారు.
కోతి పిల్లలు సాధారణంగా తల్లిని గట్టిగా హత్తుకుని ఉండటం సహజం. ఆ తల్లిప్రేమ స్పర్శ లేకపోవడంతో పంచ్ ఆందోళనకు గురవుతుండేది. దీనిని గమనించిన సిబ్బంది దానికి ఊరట కలిగించేందుకు కొన్ని మెత్తటి బొమ్మలు, దుప్పట్లు ఇచ్చారు. వాటిలో ఒక పెద్ద కోతి జాతిని పోలిన బొమ్మను పంచ్ ప్రత్యేకంగా ఎంచుకుంది. అప్పటి నుంచి ఆ బొమ్మే దానికి తల్లిలా మారింది. నిద్రపోయేటప్పుడు దానిని గట్టిగా కౌగిలించుకోవడం, ఎక్కడికి వెళ్లినా తనతో తీసుకెళ్లడం, భయపడినప్పుడు దానిని ఆశ్రయించడం వంటి దృశ్యాలు సందర్శకులను భావోద్వేగానికి గురిచేస్తున్నాయి.
ఇటీవల పంచ్ను ఇతర కోతుల గుంపులోకి ప్రవేశపెట్టారు. అక్కడ ఇతర కోతి పిల్లలు ఆటపట్టించినా, కొంత భయపెట్టినా పంచ్ ఆ బొమ్మను ఒక రక్షణ కవచంలా అడ్డుగా పెట్టుకుంటోంది. ఇతర కోతులతో కలిసిమెలిసి ఉండేందుకు ప్రయత్నిస్తున్నప్పటికీ, తనకు ఆప్యాయతను అందించిన ఆ బొమ్మను మాత్రం క్షణం కూడా వదలడం లేదు.
ఈ హృద్య దృశ్యాలకు సంబంధించిన వీడియోలు సామాజిక మాధ్యమాల్లో వైరల్ కావడంతో ప్రపంచవ్యాప్తంగా నెటిజన్లు స్పందిస్తున్నారు. అమాయకత్వం, ప్రేమ కోసం తహతహలాడే చిన్నారి హృదయం అందరినీ కదిలిస్తోంది. జంతువులకూ భావోద్వేగాలు ఉంటాయని, ప్రేమే ప్రతి జీవికి అత్యవసరమని పంచ్ కథ మళ్లీ గుర్తు చేసింది.
ALSO READ: Health: ఏంటీ?.. కోపం కూడా స్ట్రోక్, హార్ట్ ఎటాక్ రిస్క్ను పెంచుతుందా?
