పశ్చిమాసియాలో కొనసాగుతున్న ఉద్రిక్త పరిస్థితుల ప్రభావం ఇప్పుడు ప్రపంచ దేశాలపై స్పష్టంగా కనిపిస్తోంది. ముఖ్యంగా అంతర్జాతీయ మార్కెట్లో ముడి చమురు ధరలు భారీగా పెరగడంతో అనేక దేశాలు ఇంధన కొరత సమస్యను ఎదుర్కొంటున్నాయి. భారత్లో కూడా ఈ ప్రభావం స్పష్టంగా కనిపిస్తోంది. పెట్రోల్, డీజిల్ ధరలు పెరుగుతున్న నేపథ్యంలో ఇంధన వినియోగాన్ని తగ్గించాలని ప్రధానమంత్రి నరేంద్ర మోదీ ప్రజలకు సూచించారు. కొన్ని ప్రాంతాల్లో అవసరానికి తగ్గట్టే ఇంధన సరఫరా జరుగుతుండగా, దేశవ్యాప్తంగా పెట్రోల్ వినియోగంపై పెద్ద చర్చ మొదలైంది. ప్రజల జీవనశైలి, రవాణా సౌకర్యాలు, పర్యాటక రంగం, వ్యక్తిగత వాహనాల వినియోగం వంటి అంశాల ఆధారంగా ఒక్కో రాష్ట్రంలో ఇంధన వినియోగంలో భారీ తేడాలు కనిపిస్తున్నాయి. తాజాగా కేంద్ర ప్రభుత్వం విడుదల చేసిన గణాంకాలు ఈ వ్యత్యాసాలను మరింత స్పష్టంగా చూపించాయి.
2024-25 ఆర్థిక సంవత్సరానికి సంబంధించిన పెట్రోలియం ప్లానింగ్ అండ్ అనాలసిస్ సెల్ నివేదిక ప్రకారం దేశవ్యాప్తంగా ప్రతి 100 మందికి రోజుకు సగటున 10.4 లీటర్ల పెట్రోల్ వినియోగం నమోదైంది. అయితే కొన్ని రాష్ట్రాలు, కేంద్రపాలిత ప్రాంతాల్లో ఈ వినియోగం జాతీయ సగటును దాటిపోయింది. ముఖ్యంగా పర్యాటక రంగం అభివృద్ధి చెందిన ప్రాంతాలు, వ్యక్తిగత వాహనాల వినియోగం అధికంగా ఉన్న నగరాలు, వేగంగా అభివృద్ధి చెందుతున్న ప్రాంతాల్లో పెట్రోల్ వినియోగం భారీగా పెరిగినట్లు నివేదిక వెల్లడించింది. ఆర్థిక అభివృద్ధి, పట్టణీకరణ, రవాణా అలవాట్లు, జీవన ప్రమాణాలు వంటి అంశాలు కూడా ఇంధన వినియోగాన్ని ప్రభావితం చేస్తున్నాయని అధికారులు చెబుతున్నారు.
పర్యాటకులకు స్వర్గధామంగా పేరుగాంచిన గోవా దేశంలోనే అత్యధికంగా పెట్రోల్ వినియోగిస్తున్న ప్రాంతంగా నిలిచింది. అక్కడ ప్రతి 100 మందికి రోజువారీ పెట్రోల్ వినియోగం 52.4 లీటర్లుగా నమోదైంది. ఇది జాతీయ సగటుతో పోలిస్తే దాదాపు 5 రెట్లు ఎక్కువగా ఉండటం గమనార్హం. రెండో స్థానంలో కేంద్రపాలిత ప్రాంతమైన పుదుచ్ఛేరి నిలిచింది. అక్కడ ప్రతి 100 మందికి రోజుకు 41 లీటర్ల పెట్రోల్ వినియోగం నమోదైంది. ఇక చండీఘడ్ 37.8 లీటర్ల వినియోగంతో మూడో స్థానంలో కొనసాగుతోంది. ఈ ప్రాంతాల్లో వ్యక్తిగత వాహనాల వినియోగం అధికంగా ఉండటంతో పాటు అద్దె వాహనాల వినియోగం కూడా ఎక్కువగా ఉండటం ఇందుకు ప్రధాన కారణంగా భావిస్తున్నారు.
నిపుణుల అభిప్రాయం ప్రకారం పర్యాటక రంగం అభివృద్ధి చెందిన ప్రాంతాల్లో ఇంధన వినియోగం సహజంగానే ఎక్కువగా ఉంటుంది. ముఖ్యంగా గోవా, పుదుచ్చేరి, చండీఘడ్ వంటి ప్రాంతాల్లో దేశ విదేశాల నుంచి భారీగా పర్యాటకులు వస్తుంటారు. వీరిలో చాలామంది అద్దె కార్లు, ద్విచక్ర వాహనాలను వినియోగిస్తుంటారు. అలాగే అక్కడి స్థానిక ప్రజలు కూడా తక్కువ దూరాలకు సైతం వ్యక్తిగత వాహనాలను ఉపయోగించడం సాధారణంగా మారింది. ప్రజా రవాణా కంటే వ్యక్తిగత ప్రయాణాలకే ఎక్కువ ప్రాధాన్యం ఇవ్వడం కూడా పెట్రోల్ వినియోగం పెరగడానికి కారణమవుతోంది. అంతర్జాతీయంగా చమురు ధరలు పెరుగుతున్న సమయంలో ఇంధన వినియోగంపై నియంత్రణ అవసరమని, భవిష్యత్తులో ప్రత్యామ్నాయ ఇంధన వనరుల వినియోగంపై దృష్టి పెట్టాల్సిన అవసరం ఉందని నిపుణులు సూచిస్తున్నారు.
ALSO READ: రాజవంశం నుంచి బాలీవుడ్ వరకు స్టార్ హీరో జీవన ప్రయాణం
