క్రైమ్ మిర్రర్, నాగర్కర్నూల్ జిల్లా: ఉప్పునూతల మండలం లత్తిపూర్ గ్రామంలోని శ్రీ కట్ట మైసమ్మ దేవస్థానంలో తరతరాలుగా పూజారులుగా కొనసాగుతున్న కుమ్మర్ల హక్కులను పరిరక్షించాలని తెలంగాణ రాష్ట్ర కుమ్మర సంఘం ప్రభుత్వాన్ని డిమాండ్ చేసింది. ఆలయ అభివృద్ధిలో కీలక పాత్ర పోషించిన కుమ్మర్లను పక్కనపెట్టి ఇతరులను పూజారులుగా నియమించే ప్రయత్నాలను నిలిపివేయాలని సంఘ నాయకులు తేల్చి చెప్పారు.
డిండి ప్రాజెక్టు సమీపంలో నిరసన
డిండి ప్రాజెక్టును ఆనుకుని ఉన్న కట్ట మైసమ్మ తల్లి ఆలయంలో దశాబ్దాలుగా పూజారులుగా సేవలందిస్తున్న కుమ్మర్లను తొలగించే ప్రయత్నాలు జరుగుతున్నాయని ఆరోపిస్తూ రాష్ట్ర కుమ్మర సంఘం వర్కింగ్ ప్రెసిడెంట్ ఏడుకొండల వెంకటేశం ఆధ్వర్యంలో నిరసన కార్యక్రమం చేపట్టారు. ఈ కార్యక్రమంలో తెలంగాణ రాష్ట్ర కుమ్మర సంఘం నాయకులు, స్థానిక కుమ్మరి కుటుంబాలు, మహిళలు పెద్ద సంఖ్యలో పాల్గొన్నారు. ముందుగా అమ్మవారికి ప్రత్యేక పూజలు నిర్వహించిన అనంతరం ఆలయం వద్ద నిరసన దీక్ష చేపట్టారు. తర్వాత ఆలయం ముందు ఉన్న రహదారిపై బైఠాయించి ఆందోళన వ్యక్తం చేశారు. దీంతో కొంతసేపు డిండి మార్గంలో వాహనాల రాకపోకలకు అంతరాయం ఏర్పడింది. భారీగా ట్రాఫిక్ నిలిచిపోవడంతో పోలీసులు అక్కడికి చేరుకుని పరిస్థితిని సమీక్షించారు.
1947 నుంచి కుమ్మర్లే పూజారులు
ఈ సందర్భంగా మాట్లాడిన ఏడుకొండల వెంకటేశం, కట్ట మైసమ్మ ఆలయంలో 1947 సంవత్సరం నుంచి కుమ్మరి వర్గానికి చెందిన కుటుంబాలే పూజారులుగా సేవలందిస్తున్నట్లు తెలిపారు. ఆలయ నిర్మాణం నుంచి అభివృద్ధి వరకు కుమ్మర్ల పాత్ర ఎంతో ముఖ్యమైందన్నారు. అలాగే ఆలయ నిర్వహణ కోసం ప్రత్యేక ట్రస్ట్ను కూడా ఏర్పాటు చేసి కొనసాగిస్తున్నట్లు చెప్పారు. తరతరాలుగా అమ్మవారికి సేవ చేస్తున్న కుటుంబాలను ఇప్పుడు పూజారి బాధ్యతల నుంచి తొలగించే ప్రయత్నాలు జరుగుతుండటం బాధాకరమని ఆవేదన వ్యక్తం చేశారు.
ఎండోమెంట్స్ పరిధిలోకి వచ్చిన తర్వాత వివాదం
ఇటీవల ఆలయం ఎండోమెంట్స్ శాఖ పరిధిలోకి వచ్చిన తర్వాత కొందరు రాజకీయ ప్రయోజనాల కోసం కుమ్మర్లను పూజారి బాధ్యతల నుంచి తప్పించే ప్రయత్నాలు చేస్తున్నారని వెంకటేశం ఆరోపించారు. సంప్రదాయ హక్కులను దెబ్బతీసే విధంగా వ్యవహరిస్తున్నారని విమర్శించారు. ఈ అంశంపై ప్రభుత్వం, ఎండోమెంట్స్ అధికారులు వెంటనే జోక్యం చేసుకుని సమస్యను పరిష్కరించాలని డిమాండ్ చేశారు. గ్రామదేవత ఆలయాల్లో తరతరాలుగా పూజారులుగా సేవలందిస్తున్న కుమ్మర్ల హక్కులను చట్టపరంగా రక్షించాల్సిన అవసరం ఉందన్నారు.
గ్రామదేవత ఆలయాల్లో సంప్రదాయం కొనసాగాలి
రాష్ట్రంలోని అనేక గ్రామదేవత ఆలయాల్లో కుమ్మర్లు పూజారులుగా కొనసాగుతున్నారని సంఘ నాయకులు తెలిపారు. పూర్వీకుల కాలం నుంచి వస్తున్న ఈ సంప్రదాయాన్ని కొనసాగించాల్సిన అవసరం ఉందన్నారు. కుమ్మర్ల వతన్ ఉన్న ఆలయాల్లో వారికి పూజారులుగా కొనసాగేందుకు ప్రభుత్వం ప్రత్యేక చర్యలు తీసుకోవాలని కోరారు.
ఎమ్మెల్యే హామీతో ముగిసిన దీక్ష
నిరసన నేపథ్యంలో స్థానిక ఎమ్మెల్యే వంశీకృష్ణ స్పందించినట్లు ఏడుకొండల వెంకటేశం తెలిపారు. సమస్య పరిష్కారానికి కృషి చేస్తామని, కుమ్మర్లకు అన్యాయం జరగకుండా చూస్తామని ఎమ్మెల్యే హామీ ఇచ్చారని చెప్పారు. ఎమ్మెల్యే సానుకూలంగా స్పందించడంతో పాటు అధికారులు కూడా చర్చలకు సిద్ధమవడంతో నిరసన దీక్షను విరమించినట్లు వెల్లడించారు.
ఈ కార్యక్రమంలో తెలంగాణ రాష్ట్ర కుమ్మర సంఘం రాష్ట్ర అధ్యక్షుడు నడికుడ జయంత్ రావు, రాష్ట్ర నాయకులు, వివిధ జిల్లాల సంఘ ప్రతినిధులు పాల్గొన్నారు. మహబూబ్నగర్, వనపర్తి, నాగర్కర్నూల్ జిల్లాలకు చెందిన సుమారు 600 మంది కుమ్మరి సామాజిక వర్గ సభ్యులు హాజరై తమ మద్దతు తెలిపారు. కుమ్మర్ల సంప్రదాయ హక్కుల పరిరక్షణ కోసం పోరాటం కొనసాగుతుందని సంఘ నాయకులు స్పష్టం చేశారు.
