క్రైమ్ మిర్రర్ : భార్య మరో వ్యక్తితో కలిసి ఉన్నట్లు తెలుసుకున్న భర్త ఆగ్రహంతో తుపాకీతో కాల్పులకు తెగబడ్డాడు. భార్యతో పాటు ఆమెతో ఉన్న వ్యక్తిపై కాల్పులు జరపడంతో ఇద్దరూ తీవ్రంగా గాయపడ్డారు. ప్రస్తుతం ఆసుపత్రిలో చికిత్స పొందుతున్నారు. కాల్పులకు పాల్పడిన వ్యక్తిని పోలీసులు అరెస్ట్ చేశారు. ఉత్తరప్రదేశ్‌లోని ఫిరోజాబాద్‌లో ఈ ఘటన చోటుచేసుకుంది. ఘటనకు సంబంధించిన వీడియో సోషల్‌ మీడియాలో వైరల్‌గా మారింది.
పోలీసుల వివరాల ప్రకారం.. రిషబ్‌, షిప్రాలకు సుమారు పదేళ్ల క్రితం వివాహమైంది. వీరికి ఇద్దరు పిల్లలు ఉన్నారు. ఇంటర్నెట్‌ కేఫ్‌ నిర్వహించే సన్నీ అలియాస్‌ శివ ఠాకూర్‌తో తన భార్యకు వివాహేతర సంబంధం ఉందని రిషబ్‌ అనుమానించినట్లు సమాచారం. ఈ విషయంపై కొంతకాలంగా భార్యాభర్తల మధ్య గొడవలు జరుగుతున్నట్లు పోలీసులు తెలిపారు.
కేఫ్‌కు వెళ్లి కాల్పులు
అక్టోబర్‌ 6న రాత్రి సుమారు 10 గంటల సమయంలో సన్నీకి చెందిన ఇంటర్నెట్‌ కేఫ్‌లో తన భార్య షిప్రా అతడితో కలిసి ఉన్నట్లు రిషబ్‌కు సమాచారం అందింది. దీంతో కుమారుడితో కలిసి రిషబ్‌ అక్కడికి చేరుకున్నాడు. అక్కడ భార్య, సన్నీని చూసిన అనంతరం రిషబ్‌ తన వద్ద ఉన్న లైసెన్స్‌ రివాల్వర్‌ను బయటకు తీసి కాల్పులు జరిపినట్లు పోలీసులు తెలిపారు. మొత్తం ఆరు రౌండ్లు కాల్పులు జరిగినట్లు వెల్లడించారు. సన్నీపై రెండు రౌండ్లు, షిప్రాపై నాలుగు రౌండ్లు కాల్పులు జరిపినట్లు పేర్కొన్నారు. ఒక్కసారిగా కాల్పుల శబ్దాలు వినిపించడంతో కేఫ్‌ పరిసరాల్లో భయాందోళనలు నెలకొన్నాయి. రద్దీగా ఉండే ప్రాంతం కావడంతో పలువురు దుకాణదారులు భయంతో తమ దుకాణాలను మూసివేసి అక్కడి నుంచి వెళ్లిపోయారు.
భర్త అరెస్ట్
సమాచారం అందుకున్న పోలీసులు వెంటనే ఘటనాస్థలికి చేరుకుని రిషబ్‌ను అదుపులోకి తీసుకున్నారు. అతడి వద్ద ఉన్న లైసెన్స్‌ రివాల్వర్‌, తూటాలతో పాటు ఇతర ఆధారాలను స్వాధీనం చేసుకున్నారు. ఘటనపై కేసు నమోదు చేసి దర్యాప్తు చేస్తున్నారు. కాల్పుల్లో తీవ్రంగా గాయపడిన షిప్రా, సన్నీలను పోలీసులు జిల్లా ఆసుపత్రిలోని ట్రామా సెంటర్‌కు తరలించారు. వారి పరిస్థితి విషమంగా ఉండటంతో మెరుగైన చికిత్స కోసం ఆగ్రా మెడికల్‌ కాలేజీకి తరలించినట్లు అధికారులు తెలిపారు.
భర్త ఆరోపణలను ఖండించిన భార్య
తనకు సన్నీతో వివాహేతర సంబంధం ఉందన్న భర్త ఆరోపణలను షిప్రా ఖండించినట్లు సమాచారం. తనను హత్య చేయాలనే ఉద్దేశంతోనే భర్త కాల్పులు జరిపాడని ఆమె ఆరోపించింది. ఈ ఘటనపై పోలీసులు అన్ని కోణాల్లో దర్యాప్తు చేస్తున్నారు. కాల్పులు జరిగిన సమయంలో రిషబ్‌ కుమారుడు కూడా అక్కడే ఉన్నాడు. ఘటనను అతడు తన మొబైల్‌ ఫోన్‌లో రికార్డు చేసినట్లు పోలీసులు తెలిపారు. కాల్పులు జరపవద్దంటూ తండ్రిని కుమారుడు వేడుకుంటున్న దృశ్యాలు కూడా వీడియోలో ఉన్నట్లు సమాచారం. ప్రస్తుతం ఈ ఘటనకు సంబంధించిన వీడియో క్లిప్‌లు సోషల్‌ మీడియాలో వైరల్‌గా మారాయి. కాల్పులకు దారితీసిన అసలు కారణాలు, భార్యపై భర్త చేసిన ఆరోపణల్లో వాస్తవం ఎంత ఉంది, ఘటన సమయంలో అక్కడ ఏం జరిగిందనే అంశాలపై పోలీసులు దర్యాప్తు కొనసాగిస్తున్నారు.
also read : భర్తను చంపి గుండెపోటుగా నమ్మించిన భార్య.. చివరకు ఫోన్‌లో దొరికిపోయిన రహస్యం