ఫిఫా ప్రపంచ కప్ 2026లో సహ ఆతిథ్య దేశమైన మెక్సికో చరిత్ర సృష్టించింది. ఈక్వెడార్పై 2–0 తేడాతో ఘన విజయం సాధించి రౌండ్ ఆఫ్ 16కు అర్హత సాధించింది. దాదాపు నాలుగు దశాబ్దాల తర్వాత నాకౌట్ దశకు చేరడంతో దేశవ్యాప్తంగా అభిమానుల్లో ఆనందోత్సాహాలు వెల్లువెత్తాయి.
విజయాన్ని సెలబ్రేట్ చేసుకోవడానికి వేలాది మంది వీధుల్లోకి వచ్చి భారీ సంబరాల్లో పాల్గొన్నారు. కానీ ఈ ఆనందం కొద్ది క్షణాల్లోనే విషాదంగా మారింది.
బుధవారం జరిగిన సంబరాల్లో చోటుచేసుకున్న భారీ జనసమూహం కారణంగా తొక్కిసలాట పరిస్థితి ఏర్పడింది. ఊపిరాడక ఇద్దరు వ్యక్తులు అక్కడికక్కడే ప్రాణాలు కోల్పోయినట్లు మెక్సికో ప్రభుత్వం అధికారికంగా ధ్రువీకరించింది.
మృతుల్లో 19 ఏళ్ల యువతి, 44 ఏళ్ల వ్యక్తి ఉన్నట్లు ఆరోగ్య శాఖ తెలిపింది. జనసందోహం మరింత పెరగడంతో కొందరు ఒకరినొకరు నెట్టుకోవడం వల్ల ఈ ప్రమాదం చోటుచేసుకున్నట్లు అధికారులు వెల్లడించారు.
ఇంకా ఈ ఘటనలో మరొక వ్యక్తి కూడా మృతి చెందినట్లు స్థానిక మీడియాలో కథనాలు వస్తున్నప్పటికీ, అధికారిక నిర్ధారణ ఇంకా రావాల్సి ఉంది. అదే సమయంలో పలువురు తీవ్రంగా గాయపడినట్లు సమాచారం. మృతుల సంఖ్య పెరిగే అవకాశం ఉందని అధికారులు ఆందోళన వ్యక్తం చేస్తున్నారు. దేశవ్యాప్తంగా సంబరాలు ఒక్కసారిగా విషాద ఛాయల్లోకి మారడంతో అభిమానులు తీవ్ర దిగ్భ్రాంతికి గురయ్యారు.
also read: ఏఐపై నమ్మకం పెట్టుకున్న ఫోర్డ్కు భారీ దెబ్బ… అసలు నిజం ఇదే!
