దేశ భద్రతకు సంబంధించిన కీలకమైన సమాచారాన్ని సైబర్ నేరగాళ్లు లక్ష్యంగా చేసుకుంటున్న ఘటనలు ఆందోళన కలిగిస్తున్నాయి. తాజాగా ఢిల్లీలో వెలుగుచూసిన ఓ సైబర్ హ్యాకింగ్ ఘటన కలకలం రేపుతోంది. కేవలం 14 ఏళ్ల బాలుడు అగ్నివీర్ రిక్రూట్మెంట్ పోర్టల్ను హ్యాక్ చేసినట్లు సమాచారం.
సెప్టెంబర్లో వెలుగులోకి వచ్చిన ఈ ఘటనలో నిందితుడు అగ్నివీర్ నియామకాలకు సంబంధించిన పోర్టల్లోకి అక్రమంగా ప్రవేశించి, సుమారు 2,500 మంది సిబ్బందికి సంబంధించిన వ్యక్తిగత వివరాలను సేకరించినట్లు ఆరోపణలు ఉన్నాయి. ఈ సమాచారాన్ని డార్క్ వెబ్లో విక్రయించేందుకు ప్రయత్నించినట్లు అధికారులు అనుమానిస్తున్నారు.
ఈ వ్యవహారం వెనుక ఆర్థిక ప్రయోజనమే ప్రధాన కారణమని ప్రాథమికంగా భావిస్తున్నారు. సేకరించిన సమాచారాన్ని విక్రయించడం ద్వారా క్రిప్టోకరెన్సీ రూపంలో డబ్బు సంపాదించాలని బాలుడు ప్రయత్నించినట్లు దర్యాప్తు అధికారులు అనుమానిస్తున్నారు.
ఘటన తీవ్రతను దృష్టిలో ఉంచుకుని ఢిల్లీ పోలీసుల ప్రత్యేక విభాగం కేసు దర్యాప్తును చేపట్టింది. పోర్టల్ను ఎలా హ్యాక్ చేశాడు? సేకరించిన వివరాలను ఎవరితోనైనా పంచుకున్నాడా? డార్క్ వెబ్లో విక్రయించే ప్రయత్నం ఎంతవరకు సాగింది? అనే కోణాల్లో అధికారులు విచారణ జరుపుతున్నట్లు సమాచారం.
ఇదిలా ఉండగా, అగ్నివీర్ పథకానికి సంబంధించి మరో అంశం కూడా చర్చనీయాంశంగా మారింది. ప్రస్తుతం నాలుగేళ్లుగా ఉన్న అగ్నివీరుల సేవా కాలాన్ని ఆరేళ్లకు పెంచే ప్రతిపాదనలపై చర్చ జరుగుతున్నట్లు సమాచారం. అయితే ఈ మార్పుపై అధికారిక నిర్ణయం వెలువడినట్లు నిర్ధారణ లేదు.
ఒకవైపు అగ్నివీర్ సేవా కాలంపై చర్చ జరుగుతుండగా, మరోవైపు నియామక పోర్టల్లో సిబ్బంది వివరాల భద్రతకు సంబంధించిన ఈ హ్యాకింగ్ ఘటన సైబర్ సెక్యూరిటీ ప్రాధాన్యతను మరోసారి గుర్తు చేస్తోంది.
also read: “నా స్టైల్లో మార్పులకు కారణం శోభితనే”- భార్యపై ప్రేమను బయటపెట్టిన నాగచైతన్య!
