క్రైమ్ మిర్రర్, తెలంగాణ:- తెలంగాణ రాష్ట్ర ప్రభుత్వం రానున్న బతుకమ్మ పండుగను పురస్కరించుకుని మహిళలకు ఒక ప్రత్యేకమైన కానుకను అందించడానికి సిద్ధమవుతోంది. ఇందులో భాగంగా, రాష్ట్రవ్యాప్తంగా ‘ఇందిరా మహిళా శక్తి’ పథకం కింద ఏకంగా 1.05 కోట్ల మంది మహిళలకు బతుకమ్మ పండుగ సందర్భంగా చీరలను పంపిణీ చేసేందుకు ప్రభుత్వం భారీ స్థాయిలో ఏర్పాట్లు చేస్తోంది.
పండుగ నాటికి అందరికీ చీరలు పంపిణీ చేయాలనే లక్ష్యంతో అధికారులు సన్నాహాలు వేగవంతం చేశారు. ఇప్పటికే రాష్ట్రంలోని పలు జిల్లాలకు ఈ చీరల స్టాక్ చేరుకోగా, ఈ నెల 20వ తేదీ నాటికి నూరు శాతం (100%) బతుకమ్మ చీరల తయారీ ప్రక్రియ పూర్తిగా పూర్తవుతుందని సమాచారం.
రాష్ట్ర ప్రభుత్వం చేపట్టిన ఈ కార్యక్రమం కోసం ప్రసిద్ధ చేనేత కేంద్రమైన సిరిసిల్లతో పాటు రాష్ట్రంలోని పలు ఇతర ప్రాంతాలకు చెందిన నైపుణ్యం గల నేతన్నలు ఎంతో శ్రమించి ఈ చీరలను సిద్ధం చేస్తున్నారు. ఇకపోతే, ఈ సంవత్సరం మహిళలకు పంపిణీ చేయనున్న ఈ చీరలు ప్రత్యేకంగా చూడచక్కని ‘చిలుక పచ్చ’ రంగులో ఉండనున్నట్లు ప్రభుత్వం వెల్లడించింది.