మహారాష్ట్రలోని పింప్రి గావ్ ప్రాంతంలో అర్ధరాత్రి జరిగిన ఒక విచిత్రమైన చోరీ ఘటన స్థానికులను ఆందోళనకు గురి చేసింది. ముగ్గురు గుర్తుతెలియని వ్యక్తులు కారులో వచ్చి ఓ ఆవును ఎత్తుకెళ్లిన సంఘటన వెలుగులోకి వచ్చింది. ఈ ఘటనకు సంబంధించిన సీసీటీవీ దృశ్యాలు ప్రస్తుతం సోషల్ మీడియాలో వేగంగా వైరల్ అవుతున్నాయి.
పోలీసుల వివరాల ప్రకారం, ఈ నెల 28వ తేదీ తెల్లవారుజామున సుమారు 1:45 గంటల సమయంలో ఈ ఘటన చోటు చేసుకుంది. వీడియోలో ముగ్గురు వ్యక్తులు ఆవును బలవంతంగా కారులోకి ఎక్కించి అక్కడి నుంచి త్వరగా వెళ్లిపోవడం స్పష్టంగా కనిపిస్తోంది.
ఈ సంఘటనపై ఆవు యజమాని ఫిర్యాదు చేయడంతో పింప్రి పోలీసులు కేసు నమోదు చేసి దర్యాప్తు ప్రారంభించారు. చోరీకి ఉపయోగించిన వాహనం వివరాలను గుర్తించేందుకు సమీప ప్రాంతాల్లోని సీసీటీవీ ఫుటేజీలను పోలీసులు పరిశీలిస్తున్నారు.
ఈ ఘటన వెనుక ఉన్న ఉద్దేశం ఏమిటన్న దానిపై కూడా పోలీసులు దృష్టి సారించారు. ఆవును అమ్మకం కోసం తీసుకెళ్లారా, అక్రమ రవాణా కోసం ఉపయోగించారా లేదా వధ కోసం తీసుకెళ్లారా అనే కోణాల్లో విచారణ కొనసాగుతోంది.
ఇక ఈ వీడియో సోషల్ మీడియాలో వైరల్ కావడంతో నెటిజన్లు తీవ్రంగా స్పందిస్తున్నారు. “ఇప్పటివరకు వాహనాల చోరీలు మాత్రమే వినేవాళ్లం.. ఇప్పుడు మూగజీవాలను కూడా వదిలిపెట్టడం లేదు” అంటూ పలువురు ఆగ్రహం వ్యక్తం చేస్తున్నారు.
also read: ప్రాణాలను పణంగా పెట్టిన తండ్రి.. వరదల్లో పిల్లల కోసం పోరాటం వైరల్!