నెదర్లాండ్స్లోని హేగ్ నగరంలో పర్యటిస్తున్న భారత ప్రధానమంత్రి నరేంద్ర మోదీ ప్రపంచ భవిష్యత్తుపై కీలక హెచ్చరికలు జారీ చేశారు. నెదర్లాండ్స్లో నివసిస్తున్న భారతీయ సమాజాన్ని ఉద్దేశించి నిర్వహించిన ప్రత్యేక కార్యక్రమంలో ప్రసంగించిన ప్రధాని మోదీ, ప్రపంచం ప్రస్తుతం ఎదుర్కొంటున్న సంక్షోభ పరిస్థితులను ప్రస్తావిస్తూ భావోద్వేగపూర్వకంగా మాట్లాడారు. కోవిడ్-19 మహమ్మారి తర్వాత ప్రపంచ దేశాలు ఇంకా పూర్తిగా కోలుకోకముందే యుద్ధాలు, ఇంధన సంక్షోభాలు, ఆర్థిక అస్థిరతలు మానవాళిని కొత్త ప్రమాదాల వైపు నెడుతున్నాయని ఆయన పేర్కొన్నారు. ఈ దశాబ్దం ప్రపంచానికి విపత్తుల కాలంగా మారే ప్రమాదం ఉందని హెచ్చరిస్తూ, అంతర్జాతీయ సమాజం వెంటనే సంయుక్త చర్యలు చేపట్టాల్సిన అవసరం ఉందని పిలుపునిచ్చారు. యుద్ధాలు, రాజకీయ ఉద్రిక్తతలు, ఇంధన కొరత వంటి సమస్యలు గత దశాబ్దాలుగా ప్రపంచం సాధించిన అభివృద్ధిని వెనక్కి నెట్టే పరిస్థితి తీసుకొస్తున్నాయని, ముఖ్యంగా పేద దేశాలపై దీని ప్రభావం తీవ్రంగా ఉంటుందని ప్రధాని ఆందోళన వ్యక్తం చేశారు.
ప్రపంచవ్యాప్తంగా అస్థిర పరిస్థితులు కొనసాగుతున్నప్పటికీ భారతదేశం మాత్రం వేగంగా అభివృద్ధి దిశగా పయనిస్తోందని ప్రధాని మోదీ స్పష్టం చేశారు. దేశం సాధిస్తున్న సాంకేతిక, డిజిటల్ రంగ విజయాలను ప్రపంచ వేదికపై గర్వంగా ప్రస్తావించారు. భూమి నుంచి చంద్రుని వరకు ఉన్న దూరం కంటే 11 రెట్లు ఎక్కువ పొడవైన ఆప్టికల్ ఫైబర్ కేబుళ్లను భారత్ ఏర్పాటు చేసిందని, ఇది దేశంలో డిజిటల్ విప్లవానికి నాంది పలికిందని చెప్పారు. ఒకప్పుడు మొబైల్ ఫోన్లను దిగుమతి చేసుకునే దేశంగా ఉన్న భారత్, ఇప్పుడు ప్రపంచంలోనే రెండో అతిపెద్ద మొబైల్ ఫోన్ తయారీ కేంద్రంగా ఎదిగిందని పేర్కొన్నారు. అలాగే ప్రపంచంలోనే అతిపెద్ద కృత్రిమ మేధస్సు సదస్సును విజయవంతంగా నిర్వహించడమే కాకుండా జీ-20 సదస్సును కూడా అత్యంత ప్రతిష్టాత్మకంగా నిర్వహించిన దేశంగా భారత్ నిలిచిందని గుర్తుచేశారు. ప్రస్తుతం ప్రపంచవ్యాప్తంగా భారత డిజిటల్ ప్రజా మౌలిక వసతులపై చర్చ జరుగుతోందని, దేశం ఆవిష్కరణల శక్తి కేంద్రంగా మారుతోందని ప్రధాని తెలిపారు.
భారత యువతలో ఉన్న అపారమైన సామర్థ్యమే దేశాన్ని కొత్త శిఖరాలకు తీసుకెళ్తోందని ప్రధాని మోదీ అన్నారు. 12 ఏళ్ల క్రితం దేశంలో 500 కంటే తక్కువ స్టార్టప్లు మాత్రమే ఉండగా, ఇప్పుడు వాటి సంఖ్య 2 లక్షలు దాటిందని వెల్లడించారు. 2014లో దేశంలో కేవలం 4 యూనికార్న్ సంస్థలు మాత్రమే ఉండగా, ప్రస్తుతం వాటి సంఖ్య 1,25,000 కు చేరిందని చెప్పారు. ఒక్క 2025 సంవత్సరంలోనే 44,000 కొత్త స్టార్టప్లు నమోదు అయ్యే దిశగా ప్రయాణిస్తున్నాయని పేర్కొన్నారు. ముఖ్యంగా కృత్రిమ మేధస్సు, రక్షణ, అంతరిక్ష రంగాల్లో భారత యువత అద్భుతాలు సృష్టిస్తోందని ఆయన ప్రశంసించారు. పరిశోధన రంగంలో కూడా భారత్ వేగంగా ముందుకు సాగుతోందని, గత ఏడాది కాలంలో దేశంలో 10 లక్షలకు పైగా పేటెంట్లు దాఖలయ్యాయని వెల్లడించారు. సెమీకండక్టర్ రంగంలో భారత్ స్వయం సమృద్ధి వైపు దూసుకుపోతోందని, ప్రస్తుతం దేశంలో 12 సెమీకండక్టర్ ప్లాంట్లు పనిచేస్తుండగా, అందులో 2 ప్లాంట్లలో ఇప్పటికే ఉత్పత్తి ప్రారంభమైందని తెలిపారు. ఇకపై చిప్లను భారతదేశంలోనే రూపకల్పన చేసి, ఇక్కడే తయారు చేయనున్నామని గర్వంగా ప్రకటించారు. సాధారణ మార్పులు కాకుండా అత్యంత వేగవంతమైన, అత్యుత్తమ పరివర్తన లక్ష్యంగా భారత్ ముందుకు సాగుతోందని ప్రధాని మోదీ స్పష్టం చేశారు.
ALSO READ: మళ్లీ పెట్రో వాత!.. త్వరలో పెరిగే ఛాన్స్!
