విధి విడదీసిన ఇద్దరు సోదరీమణులను డీఎన్ఏ పరీక్ష మళ్లీ ఒక్కటి చేసింది. చిన్నతనంలోనే వేర్వేరు కుటుంబాలకు దత్తత వెళ్లిన ఇద్దరు అమ్మాయిలు.. ఏళ్ల తర్వాత అనుకోకుండా పరిచయమై స్నేహితులుగా మారారు. ఒకరినొకరు ఆప్యాయంగా ‘సిస్’ అని పిలుచుకున్నారు. అయితే.. తాము నిజంగానే అక్కాచెల్లెళ్లమనే విషయం మాత్రం వారికి తెలియదు. దాదాపు మూడు దశాబ్దాల తర్వాత డీఎన్ఏ పరీక్షతో అసలు బంధం బయటపడటంతో వారి కథ భావోద్వేగానికి గురిచేస్తోంది. ఈ అరుదైన ఘటన నెదర్లాండ్స్లో వెలుగుచూసింది.
శిశువులుగానే వేర్వేరు కుటుంబాలకు..
భారత సంతతికి చెందిన మీనా జెల్టింక్ (43), మినల్ టిజ్సెన్ (44) చిన్నారులుగా ఉన్నప్పుడే నెదర్లాండ్స్లోని రెండు వేర్వేరు కుటుంబాలకు దత్తత వెళ్లారు. ఒకరి గురించి మరొకరికి ఎలాంటి సమాచారం లేకుండానే ఇద్దరూ పెరిగారు.
1996లో దత్తత తీసుకున్న పిల్లల కోసం నిర్వహించిన ఓ కార్యక్రమంలో ఇద్దరూ టీనేజర్లుగా తొలిసారి కలుసుకున్నారు. అప్పుడే వారి మధ్య స్నేహం ఏర్పడింది. ఇద్దరి రూపురేఖల్లోనూ పోలికలు కనిపించడంతో చుట్టుపక్కల వారు కూడా ఆశ్చర్యపోయేవారు. దీంతో వారిద్దరూ ఉత్తరాల్లో సరదాగా ఒకరినొకరు ‘సిస్’ అని పిలుచుకునేవారు.
అయితే కొంతకాలం తర్వాత వారి మధ్య సంబంధాలు తెగిపోయాయి. ఆ తర్వాత ఇద్దరూ తమ తమ జీవితాల్లో ముందుకు సాగిపోయారు.
డీఎన్ఏ టెస్ట్తో అసలు నిజం
సుమారు 15 ఏళ్ల తర్వాత, 2026 ఏప్రిల్లో మినల్ టిజ్సెన్ తన కుటుంబ మూలాలను తెలుసుకునేందుకు ‘మై హెరిటేజ్’ డీఎన్ఏ పరీక్ష చేయించుకున్నారు. ఫలితాలు వచ్చిన తర్వాత ఆమెకు ఊహించని విషయం ఎదురైంది.
డీఎన్ఏ మ్యాచ్లో మీనా జెల్టింక్ పేరు కనిపించడంతో పాటు ఆమెను సోదరిగా గుర్తించింది. మ్యాచ్ 100 శాతం సరిపోవడంతో మినల్ తొలుత ఆశ్చర్యపోయారు. సోషల్ మీడియా ద్వారా మీనాను గుర్తించి, గతంలో కలిసి దిగిన ఫొటోలను పరిశీలించిన తర్వాత టీనేజ్లో తనకు పరిచయమైన ఆ స్నేహితురాలే తన సొంత సోదరి అని తెలుసుకున్నారు.
కన్నీళ్లు.. నవ్వులు.. ఆలింగనాలతో పునఃకలయిక
నిజం బయటపడిన తర్వాత ఇద్దరూ ఆగస్టు 11, 2026న మళ్లీ కలుసుకున్నారు. దాదాపు మూడు దశాబ్దాలుగా తెలియని బంధం ఒక్కసారిగా బయటపడటంతో వారి కలయిక ఎంతో భావోద్వేగంగా సాగింది. కన్నీళ్లు, నవ్వులు, ఆప్యాయమైన ఆలింగనాలతో ఒకరినొకరు పలకరించుకున్నారు.
తన సోదరిని కలిసిన సందర్భంగా మీనా తన భావాలను పంచుకుంటూ.. ఇన్నాళ్లుగా తనలో ఏదో లోటు ఉన్నట్లు అనిపించేదని, ఇప్పుడు ఆ వెలితి తీరిపోయిన భావన కలుగుతోందని తెలిపారు. ఆమెను చూస్తుంటే తిరిగి ఇంటికి వచ్చినట్లుగా అనిపిస్తోందని భావోద్వేగానికి గురయ్యారు.
మినల్ కూడా తమ బంధం గురించి మాట్లాడుతూ.. సోదరీమణులమని తెలియకముందే తాము మంచి స్నేహితులమయ్యామని గుర్తుచేసుకున్నారు. నిజానికి తాము ఎప్పటి నుంచో అక్కాచెల్లెళ్లమేనని, ఆ విషయం మాత్రం తమకు ఇన్నాళ్లూ తెలియలేదని అన్నారు.
ఒకప్పుడు ‘సిస్’ అని పిలుచుకున్న స్నేహితురాలే.. చివరకు తన సొంత సోదరి అని తెలుసుకున్న ఈ కథ, బంధాలకు కాలం, దూరం అడ్డంకులు కావని మరోసారి నిరూపించింది.
also read: 67 ఏళ్ల సినీ ప్రస్థానంపై కమల్ హాసన్ ఆసక్తికర వ్యాఖ్యలు.. “నేను ఓల్డెస్ట్ జెన్ జెడ్”!