హైదరాబాద్ పోలీస్ కమిషనర్‌గా బాధ్యతలు నిర్వహించిన వీసీ సజ్జనార్‌కు ప్రభుత్వం కొత్త బాధ్యతలు అప్పగించింది. రాష్ట్రంలో పలువురు సీనియర్ ఐపీఎస్ అధికారుల బదిలీల్లో భాగంగా సజ్జనార్‌ను విపత్తు నిర్వహణ, అగ్నిమాపక సేవల విభాగం డైరెక్టర్ జనరల్ (డీజీ)గా నియమించింది. అదనంగా స్పెషల్ ప్రొటెక్షన్ ఫోర్స్ (SPF) డీజీ బాధ్యతలను కూడా ఆయనకు అప్పగించింది. హైదరాబాద్ నూతన పోలీస్ కమిషనర్‌గా మహేశ్ భగవత్ నియమితులయ్యారు.
ఈ నేపథ్యంలో సజ్జనార్ హైదరాబాద్ పోలీస్ కమిషనర్‌గా తన ప్రయాణానికి ముగింపు పలుకుతూ సోషల్ మీడియా వేదికగా భావోద్వేగ సందేశాన్ని విడుదల చేశారు. తనకు ఈ అవకాశం కల్పించిన తెలంగాణ ప్రభుత్వానికి, ముఖ్యమంత్రి రేవంత్ రెడ్డికి ప్రత్యేకంగా కృతజ్ఞతలు తెలిపారు. చారిత్రక నగరమైన హైదరాబాద్‌కు పోలీస్ కమిషనర్‌గా సేవలందించడం తన జీవితంలో ఎప్పటికీ గుర్తుండిపోయే అనుభవమని పేర్కొన్నారు.
హైదరాబాద్ సీపీగా పనిచేసిన కాలంలో నగర ప్రజలు తనపై, పోలీసు వ్యవస్థపై చూపిన ఆదరణ ఎంతో విలువైనదని సజ్జనార్ తెలిపారు. తాము చేపట్టిన సంస్కరణలకు ప్రజల నుంచి మంచి స్పందన లభించిందని చెప్పారు. మత సామరస్యానికి ప్రతీకగా నిలిచిన హైదరాబాద్‌లో ప్రజలంతా కలిసి ప్రతి పండుగను ప్రశాంతంగా నిర్వహించుకోవడం తనకు ఎంతో సంతోషాన్ని కలిగించిందన్నారు.
ప్రజల ఆరోగ్యాన్ని దృష్టిలో పెట్టుకుని ఆహార కల్తీకి వ్యతిరేకంగా ప్రత్యేక చర్యలు చేపట్టినట్లు సజ్జనార్ వివరించారు. హెచ్-ఫాస్ట్ కార్యక్రమం ద్వారా నాణ్యతలేని ఆహార పదార్థాల విక్రయాలపై కఠినంగా వ్యవహరించామని తెలిపారు. ఈ క్రమంలో భారీగా కల్తీ ఆహారాన్ని స్వాధీనం చేసుకోవడంతో పాటు బాధ్యులపై చర్యలు తీసుకునేందుకు కృషి చేసినట్లు వెల్లడించారు. ఈ కార్యక్రమంలో సహకరించిన ఫుడ్ సేఫ్టీ అధికారులకు ధన్యవాదాలు తెలిపారు.
సైబర్ నేరాలను అరికట్టేందుకు పోలీసులతో పాటు బ్యాంకులు, టెలికాం విభాగాల సమన్వయం అవసరమని గుర్తించి ఆపరేషన్ ఆక్టోపస్‌ను ప్రారంభించినట్లు పేర్కొన్నారు. ప్రజల్లో సైబర్ నేరాలపై అవగాహన పెంచడంతో పాటు వివిధ ప్రభుత్వ విభాగాల సహకారంతో చర్యలు చేపట్టామని వివరించారు. హైదరాబాద్ పోలీసుల సూచనలను కేంద్ర ప్రభుత్వం కూడా పరిగణనలోకి తీసుకోవడం గర్వకారణమని అన్నారు.
బాధితులకు త్వరితగతిన న్యాయం అందించాలనే లక్ష్యంతో ఇన్వెస్టిగేషన్ మానిటరింగ్ సెల్‌ను ఏర్పాటు చేసినట్లు తెలిపారు. ప్రభుత్వ పాఠశాలల విద్యార్థులకు పోలీసు వ్యవస్థపై అవగాహన కల్పించేందుకు నిర్వహించిన ‘డే విత్ సీపీ’ కార్యక్రమం తనకు ప్రత్యేక సంతృప్తిని ఇచ్చిందన్నారు.
నగరంలో ట్రాఫిక్ సమస్యల పరిష్కారానికి కేబీఆర్ పార్క్ పరిసరాల్లో వన్‌వే విధానాన్ని అమలు చేయడంలో జీహెచ్‌ఎంసీ, ఇతర శాఖల అధికారులు సహకరించారని గుర్తుచేశారు. మహిళల రక్షణకు ప్రాధాన్యతనిస్తూ ‘స్పందన’ వాహనాలను అందుబాటులోకి తీసుకొచ్చినట్లు వెల్లడించారు.
హైదరాబాద్ పోలీస్ కమిషనరేట్ పరిధిలో చేపట్టిన కార్యక్రమాల విజయానికి పోలీసు సిబ్బంది కృషే ప్రధాన కారణమని సజ్జనార్ పేర్కొన్నారు. విధి నిర్వహణలో ప్రతిభ చూపిన సిబ్బందిని ప్రోత్సహించేందుకు ‘ఎక్స్‌ట్రా మైల్’, వారి ఆరోగ్య పరిరక్షణ కోసం ‘గ్రాండ్ హెల్త్ ఛాలెంజ్’ వంటి కార్యక్రమాలను చేపట్టినట్లు తెలిపారు.
పండుగలు, ప్రత్యేక సందర్భాల్లో కూడా కుటుంబాలకు దూరంగా ఉంటూ నగర భద్రత కోసం పనిచేసిన హోంగార్డుల నుంచి ఉన్నతాధికారుల వరకు ప్రతి ఒక్కరికీ ఆయన కృతజ్ఞతలు తెలిపారు. తనకు మార్గనిర్దేశం చేసిన డీజీపీతో పాటు ఇతర ఉన్నతాధికారులు, నిరంతరం సహకరించిన మీడియా ప్రతినిధులకు ధన్యవాదాలు చెప్పారు.
చివరిగా హైదరాబాద్ ప్రజలందరూ ఎల్లప్పుడూ సురక్షితంగా, సంతోషంగా ఉండాలని ఆకాంక్షించారు. పోలీసు సిబ్బంది, వారి కుటుంబాలు సుఖసంతోషాలతో ఉండాలని కోరుకుంటూ.. ఎన్నో మధుర జ్ఞాపకాలతో హైదరాబాద్ పోలీస్ కమిషనర్ బాధ్యతల నుంచి వీడ్కోలు తీసుకుంటున్నట్లు సజ్జనార్ తన సందేశంలో భావోద్వేగంగా పేర్కొన్నారు.
ఇక హైదరాబాద్ నూతన పోలీస్ కమిషనర్‌గా బాధ్యతలు చేపట్టనున్న మహేశ్ భగవత్‌కు సజ్జనార్ శుభాకాంక్షలు తెలియజేశారు.