ఐకాన్ స్టార్ అల్లు అర్జున్ సతీమణి, వ్యాపారవేత్త అల్లు స్నేహారెడ్డికి మరో అరుదైన గుర్తింపు లభించింది. కళలు, సంస్కృతి, వారసత్వ పరిరక్షణ రంగాల్లో ఆమెకు కీలక బాధ్యతలు దక్కాయి. ప్రతిష్టాత్మకంగా చేపట్టిన ‘బౌలీ ఆర్ట్ సంఘం’ కల్చర్ అండ్ హెరిటేజ్ విభాగానికి ఆమె వ్యవస్థాపక అధ్యక్షురాలిగా (ఫౌండింగ్ చైర్‌పర్సన్) నియమితులయ్యారు. దేశంలోనే తొలిసారిగా నిర్వహించనున్న స్టెప్‌వెల్ ఆర్ట్ బినాలే కార్యక్రమానికి ఆమె నాయకత్వం వహించనున్నారు.
పురాతన బావుల పరిరక్షణకు ప్రత్యేక కార్యక్రమం
దక్కన్ ప్రాంతంలో చారిత్రక ప్రాధాన్యం కలిగిన మెట్ల బావులు (బౌలీలు) మన సంస్కృతి, సంప్రదాయాలకు ప్రతీకలుగా నిలుస్తున్నాయి. ముఖ్యంగా హైదరాబాద్ పరిసరాల్లో ఉన్న ఇలాంటి పురాతన కట్టడాల చరిత్ర, వాటి నిర్మాణ విశిష్టత, పర్యావరణ పరిరక్షణలో వాటి పాత్రను ప్రజలకు తెలియజేయడం ఈ కార్యక్రమం ప్రధాన ఉద్దేశం. ఈ లక్ష్యంతో ‘ది రెయిన్‌వాటర్ ప్రాజెక్ట్’కు చెందిన కల్పనా రమేశ్, ‘ఏక్ చిత్ర’ సంస్థకు చెందిన అన్నపూర్ణ మాదిపాడిగ కలిసి ఈ ప్రత్యేక కార్యక్రమాన్ని రూపొందించారు.
చరిత్రను కేవలం పుస్తకాలకే పరిమితం చేయకుండా, పురాతన బావులను కళా ప్రదర్శనలకు వేదికలుగా మార్చి ప్రజల్లో వారసత్వ సంపదపై ఆసక్తిని పెంచాలని నిర్వాహకులు భావిస్తున్నారు. ఈ ప్రయత్నానికి మరింత గుర్తింపు తీసుకురావడంతో పాటు యువతను భాగస్వాములను చేసే బాధ్యతను స్నేహారెడ్డికి అప్పగించారు.
ఈ ప్రాజెక్టులో భాగంగా డిసెంబర్ 1 నుంచి జనవరి 10 వరకు సుమారు 40 రోజుల పాటు భారీ స్థాయిలో బౌలీ ఆర్ట్ ఫెస్టివల్ జరగనుంది. బన్సీలాల్‌పేట్, గోల్కొండ, రాష్ట్రపతి నిలయం, ఫలక్‌నుమా సహా 13కు పైగా చారిత్రక ప్రాంతాల్లో ఈ వేడుకలు నిర్వహించనున్నారు. దేశంలోని వివిధ ప్రాంతాలకు చెందిన 200 మందికి పైగా కళాకారులు ఇందులో పాల్గొననున్నారు. కళా ప్రదర్శనలతో పాటు చర్చా కార్యక్రమాలు కూడా ఏర్పాటు చేయనున్నారు.
తనకు అప్పగించిన కొత్త బాధ్యతపై అల్లు స్నేహారెడ్డి సంతోషం వ్యక్తం చేశారు. హైదరాబాద్ నగర చరిత్ర, వారసత్వ సంపద గురించి ముఖ్యంగా యువతలో అవగాహన పెంచేందుకు ఈ కార్యక్రమం మంచి అవకాశమని అభిప్రాయపడ్డారు. భావితరాలకు మన సంస్కృతి, చారిత్రక గుర్తింపును అందించేందుకు ఇలాంటి ప్రయత్నాలు ఎంతో అవసరమని పేర్కొన్నారు.
మొత్తానికి, ఇప్పటివరకు వ్యాపారవేత్తగా, అల్లు అర్జున్ భార్యగా వార్తల్లో నిలిచిన స్నేహారెడ్డి.. ఇప్పుడు కళలు, సంస్కృతి, చారిత్రక వారసత్వ పరిరక్షణ రంగంలోనూ కీలక పాత్ర పోషించేందుకు సిద్ధమయ్యారు.
also read: బ్యాంకు లాకర్‌లో భారీ చోరీ.. రిటైర్డ్ ఐఏఎస్ అధికారి విలువైన వస్తువులు మాయం!