దీపావళి పండుగ సమీపిస్తున్న తరుణంలో దేశవ్యాప్తంగా పటాకులు, వాయు కాలుష్యంపై జరుగుతున్న చర్చలపై ఉత్తరప్రదేశ్ ముఖ్యమంత్రి యోగి ఆదిత్యనాథ్ తీవ్రంగా స్పందించారు. కేవలం దీపావళి పండుగ వచ్చినప్పుడు మాత్రమే కొందరికి పర్యావరణ కాలుష్యం గుర్తుకు వస్తుందని ఆయన విమర్శించారు. పండుగ వేళ ప్రజలు ఆనందంగా జరుపుకునే వేడుకలపై అనవసరపు ఆందోళనలు సృష్టించడం సరికాదని ఆయన అభిప్రాయపడ్డారు.
ఒక కార్యక్రమంలో ప్రసంగిస్తూ సీఎం యోగి పలు కీలక వ్యాఖ్యలు చేశారు. “ఒక్కరోజు బాణసంచా కాల్చడం వల్ల ఏర్పడే కాలుష్యం చాలా త్వరగానే తగ్గిపోతుంది. దీని గురించి ప్రజలు ఎటువంటి ఆందోళన చెందాల్సిన అవసరం లేదు. పండుగ పూట ప్రజలు సంతోషంగా టపాసులు కాల్చుకుంటే దాన్ని కాలుష్యం అంటూ రాద్ధాంతం చేస్తున్నారు. కానీ, నిత్యం అవినీతితో మొత్తం వ్యవస్థనే కలుషితం చేస్తున్న వారిని మాత్రం ఎవరూ ప్రశ్నించడం లేదు,” అని ఆయన ఘాటుగా విమర్శించారు.
సంప్రదాయబద్ధంగా జరుపుకునే పండుగల విషయంలో ద్వంద్వ ప్రమాణాలు పాటించడం తగదని యోగి హితవు పలికారు. ఒకవేళ వాతావరణంలో కాలుష్యం ఏర్పడితే, దాన్ని తగ్గించడానికి ప్రభుత్వం తరపున తగిన చర్యలు తీసుకుంటామని ఆయన భరోసా ఇచ్చారు. ప్రజల ఆనందానికి, సంప్రదాయాలకు ప్రతీక అయిన దీపావళి వేడుకల్లో భాగంగా టపాసులు కాల్చడం మంచిదేనని ఆయన వ్యాఖ్యానించారు. పర్యావరణ పరిరక్షణ పేరుతో కేవలం హిందూ పండుగలనే లక్ష్యంగా చేసుకోవడం మానుకోవాలని, సమాజంలోని అసలైన ‘అవినీతి కాలుష్యాన్ని’ నిర్మూలించడంపై దృష్టి పెట్టాలని యోగి ఆదిత్యనాథ్ పిలుపునిచ్చారు. ప్రస్తుతం సీఎం యోగి చేసిన ఈ వ్యాఖ్యలు రాజకీయ వర్గాల్లో మరియు సోషల్ మీడియాలో చర్చనీయాంశంగా మారాయి.