బీజేపీ ఎంపీ, సినీ నటి కంగనా రనౌత్ మరోసారి సంచలన వ్యాఖ్యలతో వార్తల్లో నిలిచారు. కాంగ్రెస్ అగ్రనేత సోనియా గాంధీని లక్ష్యంగా చేసుకుంటూ ఆమె చేసిన ఆరోపణలు ప్రస్తుతం రాజకీయ వర్గాల్లో చర్చకు దారితీశాయి. గాంధీ కుటుంబంలో చోటుచేసుకున్న వరుస మరణాల వెనుక అనేక సందేహాలు ఉన్నాయంటూ కంగనా సోషల్ మీడియా వేదికగా వ్యాఖ్యానించారు.
సోనియా గాంధీ ఆత్మకథ ప్రచారంలో ఉన్న ‘బిలాంగింగ్: ఎ జర్నీ ఆఫ్ లవ్’ పుస్తకం విడుదల నేపథ్యంలో ఈ వివాదం తెరపైకి వచ్చింది. తన ‘ఎమర్జెన్సీ’ సినిమా కోసం గాంధీ కుటుంబ చరిత్రపై పరిశోధన చేసిన సమయంలో కొన్ని ఆసక్తికరమైన విషయాలు తెలుసుకున్నానని కంగనా పేర్కొన్నారు.
గాంధీ కుటుంబంలోకి సోనియా గాంధీ వచ్చిన తర్వాత ఇందిరా గాంధీ, సంజయ్ గాంధీ, రాజీవ్ గాంధీ వంటి కీలక వ్యక్తులు ఒక్కొక్కరుగా మరణించారని ఆమె తన ఇన్‌స్టాగ్రామ్ స్టోరీలో వ్యాఖ్యానించారు. ఈ పరిణామాలన్నింటినీ యాదృచ్ఛిక ఘటనలుగానే చూడాలా? అనే సందేహాన్ని వ్యక్తం చేశారు. సోనియా గాంధీని ‘మిస్టీరియస్ ఫారినర్’ అంటూ సంబోధించడం కూడా రాజకీయంగా చర్చనీయాంశమైంది.
అంతేకాకుండా సంజయ్ గాంధీ మరణం తర్వాత ఆయన భార్య మేనకా గాంధీ ఎదుర్కొన్న పరిస్థితులపైనా కంగనా స్పందించారు. మేనకా గాంధీని తన కుమారుడితో కలిసి ఇంటి నుంచి బయటకు పంపించారని ఆరోపించారు. భర్తను కోల్పోయిన సమయంలో ఆమెకు కుటుంబంలో తగిన ప్రాధాన్యత దక్కలేదని విమర్శించారు.
ఇటీవల సామాజిక మాధ్యమాల్లో వైరల్ అవుతున్న గాంధీ కుటుంబానికి సంబంధించిన పాత వీడియోను కూడా కంగనా ప్రస్తావించారు. అందులో సోనియా గాంధీ చుట్టూ కుటుంబ సభ్యులు ఉన్నట్లు కనిపిస్తుండగా, మేనకా గాంధీ మాత్రం ఒంటరిగా ఉన్నారని కంగనా తన అభిప్రాయాన్ని వెల్లడించారు.
రాజీవ్ గాంధీతో సోనియా పరిచయం, ఆ తర్వాత గాంధీ కుటుంబంలో ఆమె స్థానం, రాజకీయంగా ఎదిగిన తీరు వంటి అంశాలను ప్రస్తావిస్తూ కంగనా పలు ప్రశ్నలు లేవనెత్తారు.
మొత్తంగా సోనియా గాంధీపై కంగనా చేసిన వ్యాఖ్యలు మరోసారి బీజేపీ, కాంగ్రెస్ మధ్య రాజకీయ విమర్శలకు వేదికగా మారే అవకాశం కనిపిస్తోంది. ఈ వివాదంపై కాంగ్రెస్ నేతలు ఎలా స్పందిస్తారన్నది ఆసక్తికరంగా మారింది.
also read: విశాఖకు అమిత్ షా.. ఏపీలో భారీ పెట్టుబడులే లక్ష్యంగా కీలక అంతర్జాతీయ సదస్సు!