ఆంధ్రప్రదేశ్‌లో కీలక అంతర్జాతీయ పారిశ్రామిక సదస్సుకు రంగం సిద్ధమైంది. ఈ నెల 12న విశాఖపట్నంలో ప్రారంభం కానున్న 31వ సీఐఐ భాగస్వామ్య సదస్సు-2026కు కేంద్ర హోంమంత్రి అమిత్ షా ముఖ్య అతిథిగా హాజరుకానున్నారు. ఈ పర్యటనలో భాగంగా ఆయన ‘మహిళా ప్రగతి సదస్సు-2026’ ప్రారంభ కార్యక్రమంలోనూ పాల్గొననున్నారు.
అమిత్ షా పర్యటన నేపథ్యంలో ముఖ్యమంత్రి చంద్రబాబు నాయుడు ఆయనతో ప్రత్యేకంగా భేటీ కానున్నారు. ఈ సమావేశంలో ఆంధ్రప్రదేశ్‌కు సంబంధించిన పలు కీలక అంశాలు, రాష్ట్ర అభివృద్ధి, కేంద్ర సహకారం వంటి విషయాలపై చర్చించే అవకాశం ఉంది. మరోవైపు రాష్ట్రంలో ఫుడ్ ప్రాసెసింగ్ పరిశ్రమల ఏర్పాటుకు సంబంధించి కేంద్ర మంత్రి చిరాగ్ పాశ్వాన్‌తోనూ చంద్రబాబు చర్చలు జరపనున్నారు.
ఈ నెల 13న కేంద్ర మంత్రులు ప్రహ్లాద్ జోషి, నితిన్ గడ్కరీలతో ముఖ్యమంత్రి సమావేశం కానున్నారు. రాష్ట్రానికి పెట్టుబడులు తీసుకురావడం, పారిశ్రామిక రంగాన్ని విస్తరించడం, మౌలిక సదుపాయాలను మెరుగుపరచడం వంటి అంశాలు ఈ భేటీల్లో ప్రధానంగా చర్చకు వచ్చే అవకాశం ఉంది.
రెండు రోజుల పాటు విశాఖలో జరిగే ఈ భాగస్వామ్య సదస్సుకు ప్రపంచవ్యాప్తంగా ఉన్న ప్రముఖ పారిశ్రామికవేత్తలు, అంతర్జాతీయ ప్రతినిధులు, దౌత్యవేత్తలు, బహుళజాతి సంస్థల సీఈవోలు హాజరుకానున్నారు. తయారీ రంగం, పునరుత్పాదక ఇంధనం, ఫుడ్ ప్రాసెసింగ్, అధునాతన సాంకేతికత, మౌలిక సదుపాయాలు, ఉపాధి అవకాశాల కల్పన వంటి కీలక రంగాలపై సమావేశాల్లో చర్చించనున్నారు.
ఈ సదస్సులో భాగంగా కియా సంస్థతో ప్రత్యేక ఒప్పందం కుదుర్చుకోవడంతో పాటు మరికొన్ని కీలక అవగాహన ఒప్పందాలు (ఎంఓయూలు) జరగనున్నాయి. పలు ప్రభుత్వ ఉత్తర్వులు కూడా వెలువడే అవకాశం ఉంది. తద్వారా రాష్ట్రంలో కొత్త పరిశ్రమలు, పెట్టుబడులు, ఉద్యోగ అవకాశాలకు మార్గం సుగమం చేయాలన్నది ప్రభుత్వ లక్ష్యంగా కనిపిస్తోంది.
అంతర్జాతీయ స్థాయిలో పెట్టుబడులను ఆకర్షించే దిశగా చంద్రబాబు ప్రత్యేకంగా దృష్టి సారించనున్నారు. సింగపూర్, యూఏఈ మంత్రులతో పాటు జపాన్, రష్యా రాయబారులతో ఆయన చర్చలు జరపనున్నారు. రెన్యూ, కియా ఇండియా, ఆర్పీఎస్‌జీ గ్రూప్, మెయిల్ సంస్థల అధినేతలతోనూ సమావేశాలు నిర్వహించనున్నారు.
అంతేకాకుండా అంతరిక్ష సాంకేతిక రంగంలో పనిచేస్తున్న అగ్నికుల్, స్కైరూట్ సంస్థల ప్రతినిధులతోనూ ముఖ్యమంత్రి ప్రత్యేకంగా భేటీ కానున్నారు. ఈ సదస్సు ద్వారా ఏపీకి భారీ పెట్టుబడులు రావడంతో పాటు రాష్ట్ర పారిశ్రామిక రంగానికి అంతర్జాతీయ గుర్తింపు లభిస్తుందని ప్రభుత్వం ఆశిస్తోంది.
also read: తెలంగాణ విద్యాసంస్థల్లో సినిమా ప్రమోషన్లకు చెక్.. కొత్త నిబంధనలు తీసుకొస్తున్న ప్రభుత్వం!