క్రైమ్ మిర్రర్ : థాయ్లాండ్లోని బ్యాంకాక్ సమీపంలోని నొంతబురి ప్రావిన్స్లో ఉన్న ఓ పాఠశాలలో జరిగిన విషాద ఘటనలో ఆరుగురు ప్రాణాలు కోల్పోయారు. మృతుల్లో ముగ్గురు విద్యార్థులు, ముగ్గురు ఉపాధ్యాయులు ఉన్నట్లు అధికారులు తెలిపారు. మరో 15 మంది గాయపడగా, వారిలో ఇద్దరి పరిస్థితి విషమంగా ఉన్నట్లు వెల్లడించారు. పోలీసుల ప్రాథమిక సమాచారం ప్రకారం, ఓ విద్యార్థి కుటుంబ సభ్యుడికి చెందిన తుపాకీతో పాఠశాలకు చేరుకుని ఈ ఘటనకు పాల్పడినట్లు గుర్తించారు. అనంతరం అతడు కూడా మృతి చెందినట్లు అధికారులు తెలిపారు.
ఘటనతో పాఠశాలలో తీవ్ర భయాందోళనలు నెలకొన్నాయి. విద్యార్థులు ప్రాణభయంతో తరగతి గదుల్లోకి వెళ్లి దాక్కోగా, మరికొందరు బయటకు పరుగులు తీశారు. సమాచారం అందుకున్న పోలీసులు, అత్యవసర సిబ్బంది వెంటనే ఘటనాస్థలికి చేరుకుని గాయపడిన వారిని ఆస్పత్రులకు తరలించారు. ఈ ఘటనకు గల కారణాలపై పోలీసులు దర్యాప్తు కొనసాగిస్తున్నారు. నిందితుడు ఆయుధాన్ని ఎలా పొందాడు, ఘటనకు ముందు ఏమైనా ప్రణాళిక ఉందా అనే అంశాలను పరిశీలిస్తున్నారు.
ఘటనపై థాయ్ ప్రధాని తీవ్ర దిగ్భ్రాంతి వ్యక్తం చేస్తూ మృతుల కుటుంబాలకు సానుభూతి తెలిపారు. బాధితులకు అవసరమైన అన్ని విధాల సహాయం అందించాలని అధికారులను ఆదేశించారు. ఇటీవలి కాలంలో థాయ్లాండ్లో ఇలాంటి ఘటనలు పెరుగుతుండటంతో విద్యాసంస్థల భద్రత, ఆయుధాల నియంత్రణపై మరోసారి చర్చ మొదలైంది.
also read : భర్త హత్యకు ప్రియుడితో కుట్ర.. వాట్సాప్ చాట్లతో బయటపడిన అసలు నిజం