హైదరాబాద్ నగరంలోని నాగోల్ పోలీస్స్టేషన్ పరిధిలో కలకలం రేగే ఘటన చోటుచేసుకుంది. ప్రతాపసింగారం బ్రిడ్జి సమీపంలోని మూసీ నదిలో ఒక గుర్తుతెలియని వ్యక్తి మృతదేహం బయటపడటం స్థానికులను ఆందోళనకు గురిచేసింది.
శుక్రవారం ఉదయం నదిలో ఏదో తేలియాడుతున్నట్లు గమనించిన స్థానికులు దగ్గరికి వెళ్లి చూసి అది మృతదేహమని గుర్తించారు. వెంటనే వారు నాగోల్ పోలీసులకు సమాచారం అందించారు. సమాచారం అందుకున్న పోలీసులు తక్షణమే ఘటనాస్థలానికి చేరుకుని మృతదేహాన్ని నది నుంచి బయటకు తీశారు.
ప్రాథమిక సమాచారం ప్రకారం, మృతుడి వయస్సు సుమారు 35 నుంచి 40 సంవత్సరాల మధ్య ఉండవచ్చని పోలీసులు అంచనా వేస్తున్నారు. అతడు నీలిరంగు జీన్స్ ప్యాంట్, గోధుమరంగు షర్ట్ ధరించి ఉన్నట్లు తెలిపారు. అయితే, మృతుడి పూర్తి వివరాలు ఇంకా వెలుగులోకి రాలేదు.
ఈ ఘటనపై పోలీసులు అనుమానాస్పద మృతిగా కేసు నమోదు చేసి దర్యాప్తు ప్రారంభించారు. మృతుడు ఆత్మహత్య చేసుకున్నాడా లేదా వేరే ప్రాంతం నుంచి ప్రవాహంలో కొట్టుకువచ్చాడా అనే కోణాల్లో విచారణ కొనసాగుతోంది.
మృతదేహాన్ని పోస్టుమార్టం కోసం సమీప ఆసుపత్రికి తరలించారు. మృతుడి వివరాలు తెలిసిన వారు నాగోల్ పోలీసులను సంప్రదించాలని అధికారులు విజ్ఞప్తి చేశారు.
also read: బోనాల జాతర ఏర్పాట్లలో విషాదం.. విద్యుత్ షాక్తో యువకుడు మృతి, ఇద్దరికి గాయాలు