ఆర్థిక సమస్యలు ఓ రియల్ ఎస్టేట్ వ్యాపారి ప్రాణాలను బలిగొన్నాయి. వ్యాపారంలో నష్టాలు రావడం, అప్పుల భారం పెరగడంతో తీవ్ర మనస్తాపానికి గురైన ఓ వ్యాపారి ఆత్మహత్యకు పాల్పడ్డారు. ఈ విషాద ఘటన మేడ్చల్ జిల్లా షామీర్‌పేట పోలీస్‌స్టేషన్ పరిధిలో చోటుచేసుకుంది.
కొంపల్లికి చెందిన గౌరీ శంకర్ వరప్రసాద్ (52) కొంతకాలంగా రియల్ ఎస్టేట్ వ్యాపారం నిర్వహిస్తున్నారు. ఈ క్రమంలో ఆయన చేసిన పెట్టుబడులు ఆశించిన స్థాయిలో లాభాలు తీసుకురాలేదు. దీంతో వ్యాపారంలో నష్టాలు ఎదురవడంతో పాటు అప్పులు కూడా పెరిగిపోయాయి. ఈ పరిణామాలతో గత కొద్దిరోజులుగా ఆయన తీవ్ర ఆర్థిక ఇబ్బందులు, మానసిక ఒత్తిడిని ఎదుర్కొంటున్నట్లు తెలుస్తోంది.
ఈ పరిస్థితుల నుంచి బయటపడేందుకు పౌల్ట్రీ ఫామ్ వ్యాపారం ప్రారంభించాలని వరప్రసాద్ నిర్ణయించుకున్నారు. ఇందుకోసం అనువైన స్థలం కోసం తన ద్విచక్ర వాహనంపై షామీర్‌పేట పరిసర ప్రాంతాలకు వెళ్లారు. ముంచింతలపల్లి సమీపంలోని లక్ష్మాపూర్ చెరువు కట్ట వద్దకు చేరుకున్న ఆయన అక్కడ పురుగుల మందు తాగినట్లు పోలీసులు ప్రాథమికంగా గుర్తించారు.
చెరువు కట్ట సమీపంలో అపస్మారక స్థితిలో పడి ఉన్న ఆయనను గమనించిన స్థానికులు పోలీసులకు సమాచారం అందించారు. వెంటనే ఘటనా స్థలానికి చేరుకున్న షామీర్‌పేట పోలీసులు పరిశీలించగా అప్పటికే ఆయన మృతి చెందినట్లు గుర్తించారు. మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆసుపత్రికి తరలించారు.
ప్రాథమిక విచారణలో ఆర్థిక ఇబ్బందులే ఈ ఘటనకు కారణమై ఉండవచ్చని పోలీసులు భావిస్తున్నారు. ఈ ఘటనపై కేసు నమోదు చేసిన పోలీసులు అన్ని కోణాల్లో దర్యాప్తు చేస్తున్నారు. ఒక వ్యాపారి కుటుంబంలో ఈ ఘటన తీవ్ర విషాదాన్ని నింపింది.
also read: తాగునీటితో ఫ్లోర్ క్లీన్… అక్షయకల్ప సంస్థకు రూ.20 వేల జరిమానా!