క్రైమ్ మిర్రర్ : నల్లగొండ జిల్లాలో కలకలం రేపే ఘటన చోటుచేసుకుంది. విధులు నిర్వహిస్తున్న ఓ మహిళా హోంగార్డు తన నివాసంలోనే దారుణ హత్యకు గురయ్యారు. నల్లగొండ వన్‌టౌన్ పోలీస్ స్టేషన్ పరిధిలోని రూరల్ పోలీస్ స్టేషన్‌కు ఎదురుగా ఉన్న పోలీస్ క్వార్టర్స్‌లో ఈ ఘటన వెలుగులోకి వచ్చింది. మెహబూబ్ బీ అనే మహిళా హోంగార్డును ఆమె భర్త సతీష్ హత్య చేసినట్లు ప్రాథమిక సమాచారం అందుతోంది.
వివరాల్లోకి వెళ్తే.. పోలీస్ హెడ్‌క్వార్టర్స్‌లో విధులు నిర్వర్తిస్తున్న మెహబూబ్ బీ తన భర్త సతీష్‌తో కలిసి పోలీస్ క్వార్టర్స్‌లో నివాసం ఉంటున్నారు. వీరిద్దరూ గతంలో కులాంతర వివాహం చేసుకున్నట్లు తెలుస్తోంది. అయితే కొంతకాలంగా భార్యాభర్తల మధ్య మనస్పర్థలు కొనసాగుతున్నట్లు స్థానికులు చెబుతున్నారు. చిన్నచిన్న విషయాలకే ఇద్దరి మధ్య తరచూ గొడవలు జరిగేవని సమాచారం.
ఈ క్రమంలోనే మరోసారి భార్యాభర్తల మధ్య వివాదం చోటుచేసుకున్నట్లు తెలుస్తోంది. ఆ గొడవ తీవ్రరూపం దాల్చడంతో భర్త సతీష్ తన భార్య మెహబూబ్ బీ గొంతు నులిమి హత్య చేసినట్లు ప్రాథమికంగా అనుమానిస్తున్నారు. పోలీస్ క్వార్టర్స్‌లోనే ఈ ఘటన జరగడం స్థానికంగా తీవ్ర కలకలం సృష్టించింది.
సమాచారం అందుకున్న నల్లగొండ వన్‌టౌన్ పోలీసులు వెంటనే ఘటనాస్థలానికి చేరుకున్నారు. మృతదేహాన్ని పరిశీలించి ఘటనకు సంబంధించిన వివరాలను సేకరించారు. హత్యకు దారితీసిన పరిస్థితులు, భార్యాభర్తల మధ్య జరిగిన వివాదానికి గల కారణాలపై విచారణ ప్రారంభించారు.
విధుల్లో ఉండాల్సిన మహిళా హోంగార్డు ఇలా హత్యకు గురికావడంతో పోలీసు వర్గాల్లోనూ ఈ ఘటన చర్చనీయాంశంగా మారింది. కుటుంబ కలహాలే ఈ దారుణానికి కారణమా? లేక మరేదైనా అంశం ఉందా? అనే కోణాల్లో పోలీసులు దర్యాప్తు చేస్తున్నారు. విచారణ పూర్తయితేనే హత్య వెనుక అసలు కారణాలు వెల్లడయ్యే అవకాశం ఉంది.
also read : వందేళ్ళ అద్వానీ…!