దక్షిణాది సినీ పరిశ్రమకు చెందిన నటి రెజీనా కసాండ్రా బాలీవుడ్‌లో తనకు ఎదురైన అనుభవాలపై తాజాగా ఆసక్తికర వ్యాఖ్యలు చేశారు. ముఖ్యంగా అక్షయ్ కుమార్ నటించిన ‘కేసరి 2’ సినిమా ప్రమోషన్ల విషయంలో తనకు తగిన గుర్తింపు ఇవ్వలేదని ఆరోపించారు. దక్షిణాది నటి కావడం వల్లే తనను పక్కనపెట్టారా? అంటూ ఆమె చేసిన వ్యాఖ్యలు ఇప్పుడు సినీ వర్గాల్లో చర్చకు దారితీశాయి.
‘కేసరి 2’ చిత్రంలో అక్షయ్ కుమార్ భార్య పాత్రలో రెజీనా నటించారు. సినిమాలో కీలక పాత్ర పోషించినప్పటికీ, ప్రచార కార్యక్రమాల సమయంలో తనకు తగిన ప్రాధాన్యత దక్కలేదని ఆమె ఆవేదన వ్యక్తం చేశారు. తనపై చిత్రీకరించిన పాటను విడుదల చేసినప్పటికీ, సోషల్ మీడియా ప్రచారంలో కనీసం తనను ట్యాగ్ చేయలేదని వెల్లడించారు. ఈ పరిణామాలు తనకు అసంతృప్తిని కలిగించాయని తెలిపారు.
ఇదే సందర్భంలో బాలీవుడ్‌లో ఉత్తరాది, దక్షిణాది నటుల మధ్య కనిపిస్తున్న విభేదాలపైనా రెజీనా స్పందించారు. దక్షిణాది సినిమాల్లో నటించడంపై జాన్వీ కపూర్, రాధికా ఆప్టే చేసిన వ్యాఖ్యలను ఆమె ప్రస్తావించారు. ఒక సినిమా లేదా ప్రాంతీయ పరిశ్రమలో పనిచేయడం ఇష్టం లేకపోతే ఆ ప్రాజెక్టు నుంచి తప్పుకోవచ్చని, ఆ తర్వాత బహిరంగంగా విమర్శలు చేయడం సరైన పద్ధతి కాదని అభిప్రాయపడ్డారు.
సినిమా పరిశ్రమలో భాష, ప్రాంతం ఆధారంగా కాకుండా ప్రతిభకు ప్రాధాన్యత ఇవ్వాలని ఆమె వ్యాఖ్యల సారాంశంగా తెలుస్తోంది. ‘కేసరి 2’ ప్రమోషన్లలో తనకు ఎదురైన అనుభవాన్ని ప్రస్తావిస్తూ రెజీనా చేసిన వ్యాఖ్యలు మరోసారి నార్త్-సౌత్ చర్చకు తెరలేపాయి.
also read; ఇంటర్నేషనల్ ఎమ్మీ అవార్డుల వేదికపై విజయ్ సేతుపతి.. తొలి భారతీయ నటుడిగా అరుదైన ఘనత!