కాంగ్రెస్ పార్టీ అగ్రనేత రాహుల్ గాంధీ, తెలంగాణ ముఖ్యమంత్రి రేవంత్ రెడ్డిని ఉద్దేశించి బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ తీవ్ర విమర్శలు చేశారు. దేశ రాజధాని ఢిల్లీలో నవంబర్ 1న ‘ఇండియా’ కూటమి చేపట్టనున్న నిరసన కార్యక్రమాన్ని ప్రస్తావిస్తూ కాంగ్రెస్ నేతలపై వ్యంగ్యాస్త్రాలు సంధించారు.
ఓట్ల చోరీకి వ్యతిరేకంగా కాంగ్రెస్ నేతలు నిరసన చేపట్టడం విడ్డూరంగా ఉందంటూ కేటీఆర్ తనదైన శైలిలో స్పందించారు. ఈ మేరకు సోషల్ మీడియా వేదికగా చేసిన పోస్టులో రేవంత్ రెడ్డిని ‘ఓటుకు నోటు దొంగ’గా, రాహుల్ గాంధీని ‘ఎమ్మెల్యేల దొంగ’గా అభివర్ణిస్తూ విమర్శించారు. తెలంగాణలో బీఆర్ఎస్‌కు చెందిన పది మంది ఎమ్మెల్యేల పార్టీ ఫిరాయింపుల అంశాన్ని ప్రస్తావిస్తూ కాంగ్రెస్ నాయకత్వాన్ని ప్రశ్నించారు.
రాష్ట్రంలో ఎమ్మెల్యేల ఫిరాయింపులను ప్రోత్సహించిన నాయకత్వం, ఇప్పుడు దేశవ్యాప్తంగా ఓట్ల దొంగతనంపై ఆందోళన చేపట్టడం ఏమిటంటూ కేటీఆర్ ఎద్దేవా చేశారు. తన పోస్టు చివరలో ‘భారత ప్రజాస్వామ్యం వర్ధిల్లాలి’ అంటూ వ్యాఖ్యానించారు.
ఇదిలా ఉంటే.. ఓటర్ల జాబితా సవరణ ప్రక్రియలో అక్రమాలు జరిగాయని ఆరోపిస్తున్న ప్రతిపక్ష పార్టీలు కేంద్ర ఎన్నికల సంఘంపై నిరసనకు సిద్ధమయ్యాయి. ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తున్నాయి. ఇందులో భాగంగా ఢిల్లీలోని కన్నాట్ ప్లేస్ నుంచి రాంలీలా మైదానం వరకు ర్యాలీ నిర్వహించనున్నట్లు రాహుల్ గాంధీ ప్రకటించారు.
అయితే ఈ ర్యాలీకి సంబంధించి తమ నుంచి ఎలాంటి అనుమతి తీసుకోలేదని ఢిల్లీ పోలీసులు వెల్లడించారు. మరోవైపు ఈ నిరసన కార్యక్రమంపై కేంద్ర మంత్రి గిరిరాజ్ సింగ్ స్పందించారు. ఆందోళనల పేరుతో గందరగోళం సృష్టించకుండా గాంధేయ మార్గంలో శాంతియుతంగా నిరసన తెలియజేయాలని ప్రతిపక్షాలకు సూచించారు.
మొత్తంగా ఢిల్లీలో ‘ఓట్ల చోరీ’ అంశంపై ప్రతిపక్షాల నిరసనకు సిద్ధమవుతున్న వేళ.. తెలంగాణ రాజకీయాల్లోనూ కాంగ్రెస్, బీఆర్ఎస్ మధ్య మాటల యుద్ధం మరోసారి తెరపైకి వచ్చింది.
also read: హైదరాబాద్‌లో అండాల అక్రమ వ్యాపారం గుట్టురట్టు.. 43 మంది మహిళలకు విముక్తి, 9 మంది అరెస్ట్!