బీహార్లో ఓ బయాలజీ టీచర్ వినూత్నంగా సెక్స్ ఎడ్యుకేషన్ పాఠాలు బోధించిన విధానం ప్రస్తుతం సోషల్ మీడియాలో చర్చనీయాంశంగా మారింది. పూర్నియాకు చెందిన చందన్ కుమార్ పండిత్.. విద్యార్థులకు పునరుత్పత్తి ఆరోగ్యం, సురక్షిత లైంగిక సంబంధాలు, కండోమ్ వినియోగంపై అవగాహన కల్పిస్తూ కీరా దోసకాయను మోడల్గా ఉపయోగించి ప్రాక్టికల్ డెమో ఇచ్చారు. దీనికి సంబంధించిన వీడియో నెట్టింట వైరల్గా మారింది.
చందన్ కుమార్ పండిత్ తనను తాను సోషల్ మీడియాలో ‘ఇండియాస్ వైరల్ బయాలజీ సర్’గా పరిచయం చేసుకున్నారు. ఇటీవల ఆయన ఇన్స్టాగ్రామ్లో షేర్ చేసిన వీడియోలో.. కండోమ్ను సరిగ్గా ఎలా ఉపయోగించాలో వివరించేందుకు కీరా దోసకాయను ఉపయోగించారు. అదే సమయంలో లైంగికంగా సంక్రమించే వ్యాధుల నుంచి రక్షణ, అవాంఛిత గర్భధారణ నివారణలో కండోమ్ల ప్రాధాన్యతను విద్యార్థులకు వివరించినట్లు తెలుస్తోంది.
పాఠ్యపుస్తకాల్లో ఉన్న సమాచారంతో పాటు సున్నితమైన అంశాలపై విద్యార్థులకు ప్రాక్టికల్ అవగాహన కల్పించడం వల్ల అపోహలు, సందేహాలను తొలగించవచ్చని టీచర్ పేర్కొన్నారు. సెక్స్ ఎడ్యుకేషన్ను కేవలం పుస్తక పరిజ్ఞానానికే పరిమితం చేయకుండా, ఆరోగ్యపరమైన అంశాలను స్పష్టంగా అర్థమయ్యేలా వివరించాల్సిన అవసరం ఉందనే ఉద్దేశంతో ఈ విధానాన్ని అనుసరించినట్లు ఆయన వెల్లడించారు.
ఈ వీడియో సోషల్ మీడియాలోకి వచ్చిన కొద్దిసేపటికే పెద్ద సంఖ్యలో వ్యూస్ రావడంతో వైరల్గా మారింది. టీచర్ బోధనా విధానంపై నెటిజన్ల నుంచి భిన్నమైన స్పందనలు వ్యక్తమయ్యాయి. కొందరు విద్యార్థులకు ఇలాంటి ప్రాక్టికల్ అవగాహన అవసరమని అభిప్రాయపడుతూ ఆయనను ప్రశంసించారు. మరికొందరు మాత్రం ఇలాంటి సున్నితమైన అంశాలను తరగతి గదిలో బోధించే విధానం, ఉపయోగించిన డెమోపై చర్చకు తెరతీశారు.
దీంతో బీహార్ బయాలజీ టీచర్ చేసిన ఈ సెక్స్ ఎడ్యుకేషన్ డెమో ప్రస్తుతం సోషల్ మీడియాలో హాట్ టాపిక్గా మారింది.
also read: అర్జెంటీనా బంపర్ ఆఫర్.. భారతీయులకు వీసా నిబంధనల్లో భారీ ఊరట