క్రైమ్ మిర్రర్, వైరల్ న్యూస్:- వేసవి కాలం వచ్చిందంటే చాలామంది ఇళ్లలో మామిడిపండ్ల సువాసన మొదలైపోతుంది. తియ్యటి రుచితో పాటు పోషకాలు కూడా ఎక్కువగా ఉండటంతో మామిడిపండ్లను అందరూ ఇష్టంగా తింటారు. అయితే చాలామందిలో ఒక సందేహం మాత్రం ఉంటుంది. మామిడిపండ్లను ఫ్రిజ్లో పెట్టాలా? లేక బయట గది ఉష్ణోగ్రతలో ఉంచాలా? అనే ప్రశ్న తరచూ వినిపిస్తుంది. నిపుణుల ప్రకారం మామిడిపండ్ల నిల్వ విధానం వాటి పక్వ స్థితిపై ఆధారపడి ఉంటుంది.
పచ్చి మామిడిపండ్లు ఫ్రిజ్లో పెట్టకండి
ఇంకా పూర్తిగా పండని మామిడిపండ్లను నేరుగా ఫ్రిజ్లో పెట్టడం మంచిది కాదు. చల్లటి ఉష్ణోగ్రత వల్ల అవి సహజంగా పండే ప్రక్రియ నెమ్మదిస్తుంది. దీంతో పండ్ల రుచి, తియ్యతనం కూడా తగ్గిపోతాయి. కాబట్టి పచ్చి మామిడిపండ్లను గది ఉష్ణోగ్రతలో ఉంచడం ఉత్తమం.
ఎలా ఉంచితే త్వరగా పండుతాయి?
మామిడిపండ్లను పేపర్ బ్యాగ్ లేదా పేపర్లో చుట్టి ఉంచితే త్వరగా పండుతాయి. ఇలా ఉంచడం వల్ల పండ్లలో నుంచి విడుదలయ్యే ఎథిలిన్ గ్యాస్ లోపలే ఉండి పండే ప్రక్రియ వేగంగా జరుగుతుంది. అయితే ప్లాస్టిక్ కవర్లలో పెట్టకూడదు. అవి తేమను పెంచి పండ్లు త్వరగా పాడయ్యే అవకాశం ఉంటుంది.
పండిన తర్వాత ఫ్రిజ్లో పెట్టొచ్చు..
మామిడిపండ్లు పూర్తిగా పండిన తర్వాత మాత్రం ఫ్రిజ్లో పెట్టవచ్చు. ఇలా చేస్తే అవి మరికొన్ని రోజులు తాజాగా ఉంటాయి. ముఖ్యంగా ఎక్కువగా పండిపోయిన మామిడిపండ్లు బయట ఉంచితే త్వరగా మెత్తబడిపోతాయి. అలాంటప్పుడు ఫ్రిజ్లో ఉంచడం మంచిది.
కట్ చేసిన మామిడిపండ్లు ఎలా నిల్వ చేయాలి?
ఒకసారి కోసిన మామిడిపండ్లను తప్పనిసరిగా ఫ్రిజ్లోనే ఉంచాలి. గాలి చొరబడని డబ్బాలో పెట్టి నిల్వ చేస్తే రుచి, తాజాదనం ఎక్కువసేపు ఉంటుంది. బయట ఉంచితే త్వరగా పాడయ్యే ప్రమాదం ఉంటుంది.మామిడిపండ్లు నిల్వ చేసేప్పుడు నేరుగా ఎండలో ఉంచకండి తేమ ఎక్కువగా ఉండే ప్రదేశాల్లో పెట్టవద్దు
పాడైన పండ్లను వెంటనే వేరుచేయాలి పూర్తిగా పండిన తర్వాత మాత్రమే ఫ్రిజ్లో పెట్టడం మంచిది సరైన విధంగా నిల్వ చేస్తే మామిడిపండ్ల రుచి, తియ్యతనం ఎక్కువ రోజులు ఆస్వాదించవచ్చు.
