ప్రపంచవ్యాప్తంగా ముస్లింలు అత్యంత భక్తిశ్రద్ధలతో జరుపుకునే పవిత్ర పండుగల్లో ఈద్ అల్ అధా, అంటే బక్రీద్కు ప్రత్యేక స్థానం ఉంది. ఇస్లామిక్ క్యాలెండర్లో చివరి నెల అయిన జిల్ హిజ్జా 10వ రోజున ఈ పండుగను నిర్వహించడం ఆనవాయితీ. అయితే ఈసారి బక్రీద్ పండుగ తేదీ విషయంలో తెలంగాణ, ఆంధ్రప్రదేశ్ రాష్ట్రాల్లో గందరగోళ పరిస్థితులు నెలకొన్నాయి. జిల్ హిజ్జా నెలవంక దర్శనం ఆలస్యం కావడంతో పండుగ తేదీ ఒక రోజు మారినట్లు ముస్లిం మత పెద్దలు ప్రకటించారు. దీంతో ఇప్పటికే ప్రభుత్వాలు ప్రకటించిన అధికారిక సెలవు తేదీలో కూడా మార్పులు చోటుచేసుకునే అవకాశాలు కనిపిస్తున్నాయి. మొదట అధికారిక క్యాలెండర్లో మే 27న బక్రీద్ సెలవు ప్రకటించినప్పటికీ, తాజా నెలవంక దర్శనం ఆధారంగా పండుగను మే 28న జరుపుకోవాలని ముస్లిం మతపెద్దలు స్పష్టం చేశారు.
హైదరాబాద్ పాతబస్తీలో జరిగిన ప్రత్యేక సమావేశంలో ముస్లిం మత పెద్దలు, ఉలమా వర్గాలు కలిసి ఈ విషయాన్ని ప్రకటించాయి. జిల్ హిజ్జా నెలవంక ఆదివారం తెలంగాణలో ఎక్కడా కనిపించలేదని వారు వెల్లడించారు. ఇస్లామిక్ సంప్రదాయం ప్రకారం నెలవంక దర్శనం ఆధారంగానే పండుగ తేదీలను నిర్ణయిస్తారు. నెలవంక కనిపించకపోవడంతో జీ ఖాదా నెల 30 రోజులు పూర్తవుతుందని నిర్ణయించారు. ఈ నేపథ్యంలో మే 19ను జిల్ హిజ్జా తొలి రోజుగా ప్రకటించారు. దాంతో బక్రీద్ పండుగ మే 28 గురువారం జరగనుంది. ఈ నిర్ణయంతో రాష్ట్ర ప్రభుత్వాలు ప్రకటించిన సెలవు తేదీపై కూడా చర్చ మొదలైంది.
సదర్ మజ్లిస్-ఎ-ఉలమా-ఎ-దక్కన్ ప్రకటించిన వివరాల ప్రకారం తెలంగాణలోని ఏ ప్రాంతంలోనూ నెలవంక కనిపించలేదని స్పష్టం చేశారు. ముస్లిం మత పెద్దలు, పలు సామాజిక సంస్థలు కూడా పండుగ తేదీ మారిన నేపథ్యంలో అధికారిక సెలవును మే 27 నుంచి మే 28కు మార్చాలని ప్రభుత్వాన్ని కోరుతున్నాయి. ప్రస్తుతం ఉద్యోగులు, విద్యార్థులు, వ్యాపార వర్గాల్లో కూడా కొంత అయోమయం నెలకొంది. ముఖ్యంగా ముస్లిం ఉద్యోగులు, విద్యార్థులు పండుగ రోజునే సెలవు ఉండేలా ప్రభుత్వం వెంటనే నిర్ణయం తీసుకోవాలని విజ్ఞప్తి చేస్తున్నారు.
ఇదిలా ఉండగా హైదరాబాద్ నగరంలో ఇప్పటికే బక్రీద్ సందడి ప్రారంభమైంది. పండుగను పురస్కరించుకుని నగరంలోని పలు ప్రాంతాల్లో తాత్కాలిక పశువుల మార్కెట్లు ఏర్పాటవుతున్నాయి. ఆంధ్రప్రదేశ్, కర్ణాటక, మహారాష్ట్ర, ఉత్తరప్రదేశ్ రాష్ట్రాల నుంచి వ్యాపారులు భారీ సంఖ్యలో హైదరాబాద్కు చేరుకుంటున్నారు. మేకలు, గొర్రెల విక్రయాలు ఇప్పటికే ఊపందుకున్నాయి. ప్రతి ఏడాది మాదిరిగానే ఈసారి కూడా బక్రీద్ మార్కెట్లో మంచి వ్యాపారం జరుగుతుందని వ్యాపారులు అంచనా వేస్తున్నారు. గత ఏడాదితో పోలిస్తే ఈసారి పశువుల ధరలు కొంత పెరిగినప్పటికీ కొనుగోలుదారుల సంఖ్య మాత్రం తగ్గలేదని మార్కెట్ వర్గాలు చెబుతున్నాయి.
పలు మసీదులు, స్వచ్ఛంద సంస్థలు కూడా పండుగ ఏర్పాట్లలో నిమగ్నమయ్యాయి. ప్రార్థన స్థలాల శుభ్రత, భద్రత, ట్రాఫిక్ నియంత్రణ వంటి అంశాలపై స్థానిక సంస్థలు ఇప్పటికే ప్రత్యేక చర్యలు చేపడుతున్నాయి. రాష్ట్ర ప్రభుత్వం కూడా సెలవు తేదీ మార్పుపై త్వరలోనే అధికారిక ప్రకటన విడుదల చేసే అవకాశముందని సమాచారం. ప్రభుత్వం మే 27కు బదులుగా మే 28న సెలవు ప్రకటిస్తే ముస్లిం సమాజానికి అనుకూలంగా ఉంటుందని పలువురు అభిప్రాయపడుతున్నారు.
ALSO READ: సేమియా పాయసం.. ఇలా చేస్తే అబ్బ అనాల్సిందే..!
