ఇప్పటి ఉద్యోగ జీవన విధానంలో ఎక్కువసేపు కంప్యూటర్ల ముందు కూర్చుని పనిచేయడం తప్పనిసరిగా మారింది. అయితే ఈ అలవాటు కారణంగా చాలా మంది మెడ నరాలు పట్టేయడం, భుజాల నొప్పి వంటి సమస్యలతో బాధపడుతున్నారు. గంటల తరబడి ఒకే స్థితిలో కూర్చోవడం వల్ల శరీర కండరాలపై ఒత్తిడి పెరిగి, నొప్పులు మరింత తీవ్రమవుతున్నాయి. ఈ సమస్యలను తగ్గించుకోవాలంటే పని మధ్యలో చిన్న విరామాలు తీసుకుని సులభమైన స్ట్రెచెస్ చేయడం ఎంతో అవసరమని ఆరోగ్య నిపుణులు సూచిస్తున్నారు. ముఖ్యంగా డెస్క్ జాబ్ చేసే వారు రోజూ ఈ వ్యాయామాలను అలవాటు చేసుకుంటే దీర్ఘకాలిక నొప్పుల నుండి ఉపశమనం పొందవచ్చని వారు చెబుతున్నారు.
మెడ, భుజాల నొప్పులను తగ్గించేందుకు చేయాల్సిన కొన్ని సులభమైన వ్యాయామాలు ఉన్నాయి. ముందుగా మెడను నెమ్మదిగా కుడివైపుకు, ఆపై ఎడమవైపుకు వంచుతూ కొన్ని సెకన్లు ఆ స్థితిలో ఉంచడం ద్వారా మెడ కండరాలు సడలుతాయి. ఈ విధంగా ప్రతిరోజూ కొన్ని సార్లు చేయడం వల్ల మెడ కఠినత తగ్గుతుంది. అలాగే భుజాలను చెవుల దగ్గరకు ఎత్తి ఒక్కసారిగా వదిలే విధంగా చేసే వ్యాయామం భుజాలపై ఉన్న ఒత్తిడిని తగ్గించడంలో సహాయపడుతుంది. ఈ కదలికను పలు సార్లు పునరావృతం చేస్తే మంచి ఫలితం కనిపిస్తుంది.
కుర్చీలో కూర్చుని శరీరాన్ని వెనుకకు తిప్పి ట్విస్ట్ చేయడం కూడా వెన్నెముకకు ఎంతో ఉపయోగకరంగా ఉంటుంది. ఈ వ్యాయామం వెన్నునొప్పిని తగ్గించడమే కాకుండా, శరీరానికి లవచికతను ఇస్తుంది. చేతులను ముందుకు చాపి వేళ్లను వెనక్కి లాగడం లేదా చేతులను పైకి ఎత్తి స్ట్రెచ్ చేయడం ద్వారా భుజాల నుంచి మణికట్టు వరకు ఉన్న కండరాలు రిలాక్స్ అవుతాయి. ఇదే సమయంలో రెండు చేతులను వెనుకకు తీసుకెళ్లి వేళ్లను కలిపి లాగడం వల్ల ఛాతి భాగం తెరుచుకుని, ముందుకు వంగిపోయే భుజాల సమస్యను సరిచేయవచ్చు.
అలాగే నిరంతరం కూర్చోవడం వల్ల వచ్చే సమస్యలను తగ్గించేందుకు ప్రతి 45 నిమిషాలకు ఒకసారి లేచి కొద్దిసేపు నడవడం మంచిదని నిపుణులు సూచిస్తున్నారు. ఇది శరీరంలో రక్తప్రసరణను మెరుగుపరచి అలసటను తగ్గిస్తుంది. డెస్క్ జాబ్ చేసే వారు శారీరక సమస్యలతో పాటు మానసిక ఒత్తిడికి కూడా గురవుతుంటారు. ఈ ఒత్తిడిని తగ్గించేందుకు ప్రతిరోజూ కొంతసేపు ధ్యానం చేయడం, శ్వాస వ్యాయామాలు చేయడం ఉపయోగకరంగా ఉంటుంది. ఈ చిన్న మార్పులను జీవన విధానంలో చేర్చుకుంటే ఆరోగ్యాన్ని కాపాడుకోవడం సులభమవుతుంది.
ALSO READ: అప్పుడు భయపెట్టింది.. ఇప్పుడు గ్లామర్తో చంపేస్తున్న దెయ్యం పిల్ల
