బంగాళాఖాతంలో ఏర్పడిన వాయుగుండం ఎట్టకేలకు తీరం దాటడంతో దక్షిణ భారతదేశంలోని పలు రాష్ట్రాల్లో వాతావరణ పరిస్థితులు ఒక్కసారిగా మారిపోయాయి. శ్రీలంకకు ఈశాన్యంగా ముల్లయిట్టివు సమీపంలో ఈ వాయుగుండం తీరం దాటినట్లు భారత వాతావరణ శాఖ వెల్లడించింది. ప్రస్తుతం ఇది బలహీనపడి దక్షిణ తమిళనాడు దిశగా కదులుతున్నట్లు అధికారులు తెలిపారు. ఈ పరిణామంతో ఆంధ్రప్రదేశ్, తమిళనాడు రాష్ట్రాల్లో వర్షాలు కురుస్తుండగా, మరోవైపు తెలుగు రాష్ట్రాల్లో చలి తీవ్రత గణనీయంగా పెరిగింది.
వాయుగుండం ప్రభావంతో ఆంధ్రప్రదేశ్లోని పలు జిల్లాల్లో సోమవారం వర్షాలు కురిసే అవకాశముందని అమరావతి వాతావరణ కేంద్రం హెచ్చరించింది. దక్షిణ కోస్తా జిల్లాలైన నెల్లూరు, ప్రకాశం, బాపట్ల, గుంటూరు ప్రాంతాల్లో తేలికపాటి నుంచి ఓ మోస్తరు వర్షాలు కురవనున్నట్లు అంచనా వేస్తున్నారు. రాయలసీమలోని తిరుపతి, చిత్తూరు, కడప, అనంతపురం జిల్లాల్లో కూడా వర్షాల ప్రభావం ఉండొచ్చని అధికారులు పేర్కొన్నారు. ఇప్పటికే పొరుగు రాష్ట్రమైన తమిళనాడులో పలుచోట్ల భారీ వర్షాలు కురుస్తుండటంతో ప్రజలు అప్రమత్తంగా ఉండాలని సూచిస్తున్నారు.
ఇక తెలంగాణలో మాత్రం వర్షాలకన్నా చలి తీవ్రత ఎక్కువగా కనిపిస్తోంది. రాత్రి వేళ కనిష్ట ఉష్ణోగ్రతలు సింగిల్ డిజిట్కు పడిపోతుండటంతో ప్రజలు గజగజ వణికిపోతున్నారు. ఈ నేపథ్యంలో వాతావరణ శాఖ పలు జిల్లాలకు ఎల్లో అలర్ట్ జారీ చేసింది. ఆదిలాబాద్, నిర్మల్, ఆసిఫాబాద్, మంచిర్యాల, నిజామాబాద్, జగిత్యాల, కామారెడ్డి జిల్లాల్లో చలి తీవ్రత మరింత పెరిగే అవకాశం ఉందని హెచ్చరించింది. అలాగే హైదరాబాద్ నగరంతో పాటు రంగారెడ్డి, మేడ్చల్, వికారాబాద్, మెదక్, సిద్దిపేట జిల్లాల్లో కూడా చలి ప్రభావం కొనసాగుతోంది.
మరోవైపు ఆంధ్రప్రదేశ్లోని అల్లూరి సీతారామరాజు జిల్లా ఏజెన్సీ ప్రాంతాల్లో చలి పతాక స్థాయికి చేరింది. పాడేరు పరిసర ప్రాంతాల్లో ఉదయం వేళ దట్టమైన మంచు దుప్పటి కమ్ముకుంటోంది. దీని కారణంగా వాహనదారులు ఇబ్బందులు పడుతున్నప్పటికీ, చలికాల వాతావరణాన్ని ఆస్వాదించేందుకు పర్యాటకులు పెద్ద సంఖ్యలో తరలివస్తున్నారు. మినుములూరులో కనిష్ట ఉష్ణోగ్రత 8 డిగ్రీలకు చేరగా, అరకు మరియు పాడేరు ప్రాంతాల్లో 10 డిగ్రీలు, చింతపల్లిలో 14 డిగ్రీల వరకు ఉష్ణోగ్రతలు నమోదయ్యాయి. ఈ పరిస్థితుల్లో ప్రజలు, ముఖ్యంగా వృద్ధులు మరియు చిన్నారులు చలికి తగిన జాగ్రత్తలు తీసుకోవాలని వాతావరణ శాఖ సూచించింది. ప్రయాణాలు చేసే వారు పొగమంచు కారణంగా అప్రమత్తంగా ఉండాలని కూడా హెచ్చరించింది.
ALSO READ: Indiramma Aathmiya Bharosa: ఖాతాల్లోకి రూ.12,000.. అర్హులు వీళ్లే!