జార్ఖండ్ రాష్ట్రంలోని జంతారా జిల్లాలో షాకింగ్ ఘటన వెలుగులోకి వచ్చింది. ఓ ప్రభుత్వ పాఠశాలలో హెడ్మాస్టర్గా పనిచేస్తున్న వ్యక్తి, మొదటి తరగతి చదువుతున్న ఆరేళ్ల చిన్నారిపై లైంగిక దాడికి యత్నించినట్టు ఆరోపణలు వచ్చాయి. ఈ సంఘటన జూలై 27న చోటుచేసుకున్నట్లు సమాచారం.
పాఠశాల సమయం ముగిసిన తర్వాత, హెడ్మాస్టర్ బాలికను ఒంటరిగా తీసుకెళ్లి అసభ్యంగా ప్రవర్తించినట్లు కుటుంబ సభ్యులు చెబుతున్నారు. అంతేకాక, ఈ విషయం బయటపెడితే ప్రాణాలకు ముప్పు కలిగిస్తానని బాలికను బెదిరించినట్లు తెలుస్తోంది.
ఇంటికి చేరుకున్న చిన్నారి అస్వస్థంగా ఉండటంతో తల్లిదండ్రులు ప్రశ్నించగా, జరిగిన విషయాన్ని వెల్లడించినట్టు సమాచారం. దీంతో బాధితురాలి తండ్రి వెంటనే స్థానిక పోలీస్ స్టేషన్లో ఫిర్యాదు చేశారు.
ఫిర్యాదు ఆధారంగా కేసు నమోదు చేసిన పోలీసులు, నిందితుడి కోసం ప్రత్యేక బృందాలతో గాలింపు చేపట్టారు. ప్రస్తుతం అతడు పరారీలో ఉన్నట్లు అధికారులు తెలిపారు. చిన్నారి ఆరోగ్యం పర్యవేక్షణలో ఉందని, అవసరమైన వైద్య సహాయం అందిస్తున్నామని పోలీసులు వెల్లడించారు.
ఈ ఘటనపై స్థానికంగా తీవ్ర ఆగ్రహం వ్యక్తమవుతోంది. పాఠశాలల్లో పిల్లల భద్రతపై మరింత కఠిన చర్యలు తీసుకోవాలని ప్రజలు డిమాండ్ చేస్తున్నారు.
also read: నీట్ ఫలితాల నిరాశ.. విద్యార్థిని ఆత్మహత్య