Andhra Pradesh - Crime Mirror

ఆంధ్రప్రదేశ్ ప్రభుత్వం పేద కుటుంబాలకు శాశ్వత ఆస్తి హక్కులు కల్పించే దిశగా కీలక నిర్ణయం తీసుకుంది. అసైన్డ్ ఇంటి స్థలాలకు సంబంధించి ఎన్నో ఏళ్లుగా కొనసాగుతున్న అనిశ్చితికి ముగింపు పలుకుతూ, పదేళ్ల కాలపరిమితి పూర్తయిన ప్రతి అసైన్డ్ ఇంటి స్థలాన్ని ఇకపై నేరుగా లబ్ధిదారుల పేర్లపైనే రిజిస్ట్రేషన్ చేయాలని నిర్ణయించింది. ఈ మేరకు రాష్ట్ర రెవెన్యూశాఖ ప్రత్యేక ప్రధాన కార్యదర్శి జి.సాయిప్రసాద్ మే 21, 2026న అధికారిక మార్గదర్శకాలను విడుదల చేశారు. ఈ నిర్ణయం అమల్లోకి రావడం ద్వారా ఇప్పటివరకు ఇంటి స్థలాలు కలిగి ఉన్నప్పటికీ పూర్తి యాజమాన్య హక్కులు లేక ఇబ్బందులు ఎదుర్కొంటున్న లక్షలాది కుటుంబాలకు చట్టబద్ధమైన రక్షణతో పాటు ఆస్తిపై పూర్తి హక్కులు లభించే అవకాశం ఏర్పడింది. ప్రభుత్వం తీసుకున్న ఈ నిర్ణయం పేదల సంక్షేమానికి ప్రాధాన్యత ఇచ్చే విధానంలో భాగమని రాష్ట్ర రెవెన్యూ మంత్రి అనగాని సత్యప్రసాద్ తెలిపారు. ప్రస్తుతం అమలులోకి తీసుకొచ్చిన ఈ విధానం ద్వారా ఇంటి స్థలాలపై యాజమాన్య హక్కులను వేగంగా అందించే దిశగా ప్రభుత్వం ముందుకు వెళ్తోందని పేర్కొన్నారు. అంతేకాకుండా భవిష్యత్తులో పేదలకు కేటాయించే అన్ని రకాల ఇంటి స్థలాలకు కేవలం 2 ఏళ్ల వ్యవధిలోనే పూర్తి హక్కులు కల్పించే విధానంపై కూడా ప్రభుత్వం పరిశీలన జరుపుతోందని వెల్లడించారు. దీనిపై త్వరలో స్పష్టమైన నిర్ణయం తీసుకుని అధికారిక ప్రకటన వెలువడే అవకాశం ఉందని చెప్పారు. రిజిస్ట్రేషన్ ప్రక్రియను పారదర్శకంగా నిర్వహించేందుకు ప్రభుత్వం పలు కీలక నిబంధనలను అమలు చేయనుంది. రిజిస్ట్రేషన్ కోసం లబ్ధిదారులు ప్రభుత్వం జారీ చేసిన అసైన్మెంట్ పట్టా లేదా అధికారిక ఉత్తర్వును తప్పనిసరిగా సమర్పించాలి. అలాగే సంబంధిత ఇంటి పన్ను చెల్లించిన రశీదు కూడా అవసరం అవుతుంది. సవరించిన ఆంధ్రప్రదేశ్ అసైన్డ్ భూముల చట్టం ప్రకారం కేవలం 10 సంవత్సరాల గడువు పూర్తయిన ఇంటి స్థలాలకే ఈ రిజిస్ట్రేషన్ వర్తిస్తుంది. ఒకవేళ అసలు లబ్ధిదారుడు మరణించి ఉంటే వారి వారసులు కూడా ఈ హక్కును వినియోగించుకోవచ్చు. ఇందుకోసం మరణ ధ్రువీకరణ పత్రంతో పాటు కుటుంబ సభ్యుల ధ్రువీకరణ పత్రాన్ని సమర్పించాల్సి ఉంటుంది. రిజిస్ట్రేషన్ పూర్తైన తర్వాత లబ్ధిదారులకు ఆస్తిపై పూర్తి హక్కులు లభిస్తాయి. దీంతో వారు అవసరమైతే తమ స్థలాన్ని బ్యాంకుల్లో తనఖా పెట్టి రుణాలు పొందే అవకాశం ఉంటుంది. అయితే ప్రభుత్వం దీనిపై ఒక కీలక షరతును కూడా విధించింది. పూర్తి హక్కులతో కూడిన రిజిస్ట్రేషన్ పత్రాలు పొందిన తర్వాత 90 రోజుల గడువు ముగిసిన తరువాత మాత్రమే ఆ ఇంటి స్థలాన్ని విక్రయించడం లేదా కొనుగోలు చేయడం చట్టబద్ధంగా అనుమతించబడుతుంది. దీంతో ఆస్తుల బదిలీ ప్రక్రియలో నియంత్రణతో పాటు లబ్ధిదారుల ప్రయోజనాలు కూడా రక్షించబడతాయని అధికారులు భావిస్తున్నారు. ఇక నిషేధిత జాబితాలో ఉన్న అసైన్డ్ స్థలాలకు కూడా కొన్ని మినహాయింపులు ఇచ్చారు. 10 సంవత్సరాల గడువు పూర్తయిన అసైన్డ్ స్థలాలు లేదా గతంలో ఒకేసారి పరిష్కార పథకం కింద క్రమబద్ధీకరించిన ఇళ్ల విషయంలో, అక్కడ ఇప్పటికే ఇల్లు నిర్మించి ఉంటే రిజిస్ట్రేషన్కు అనుమతి ఇవ్వాలని స్పష్టం చేశారు. అదే సమయంలో నకిలీ పత్రాలతో రిజిస్ట్రేషన్కు ప్రయత్నించే వారిపై కఠిన క్రిమినల్ చర్యలు తీసుకుంటామని హెచ్చరించారు. అదే సమయంలో రాష్ట్రంలో దీర్ఘకాలంగా పెండింగ్లో ఉన్న భూ సమస్యల పరిష్కారానికి కూడా ప్రభుత్వం చర్యలు ప్రారంభించింది. తొలి దశలో 1.9 లక్షల ఎకరాల చుక్కల భూములను నిషేధిత జాబితా నుంచి తొలగించే ప్రక్రియ చేపట్టనున్నట్లు మంత్రి వెల్లడించారు. ఇప్పటికే 1.6 లక్షల ఎకరాల సర్వీస్ ఇనామ్, షరతులతో కూడిన పట్టా భూములకు విముక్తి కల్పించినట్లు తెలిపారు. అదనంగా పట్టణ ప్రాంతాల్లో మరో 10 వేల గృహాలను క్రమబద్ధీకరించే కార్యక్రమాన్ని కూడా అమలు చేయనున్నట్లు ప్రకటించారు. ప్రభుత్వ తాజా నిర్ణయాలతో రాష్ట్రవ్యాప్తంగా పేద కుటుంబాల్లో ఆశలు పెరిగాయి. ALSO READ: శరవేగంగా ‘నాగబంధం’ మూవీ పోస్ట్-ప్రొడక్షన్ పనులు…! ఈ చిత్రం ప్రతి అప్డేడ్ ఓ సంచలనమే…

Tag: Andhra Pradesh

Most Read

వంకాయ కూర తిన్న తర్వాత ముగ్గురు అక్కాచెల్లెళ్ల మృతి.. వెలికితీసిన మృతదేహాలు

అమెరికాలో భారతీయ వ్యాపారి హత్య.. నిందితుడి కోసం పోలీసుల గాలింపు

సూట్‌కేస్‌ మిస్టరీని ఛేదించిన పోలీసులు.. ఇంట్లో కనిపించిన దృశ్యాలతో షాక్

రాఖీ పండుగ సందిగ్ధతకు తెర: ఈ ఏడాదీ పౌర్ణమి ఏ రోజున? శుభ ముహూర్తాల వివరాలు ఇవే!

EDITOR PICKS

తిరుపతి జిల్లాలో ఏనుగు దాడి.. రైతుకు తీవ్ర గాయాలు

అమరావతిలో చారిత్రక మైలురాయి…!

ఏపీలో జూనియర్ డాక్టర్ల సమ్మె సైరన్.. స్టైఫండ్ పెంచాలని డిమాండ్

POPULAR POSTS

మునుగోడు ఆశ..రాజన్న శ్వాస..

RGV: బలవంతుడిదే రాజ్యం.. గెలిచిన వారి మతంలో చేరుతా!

డ్రైవింగ్ లైసెన్స్‌ నేరుగా ఇంటికే..!

POPULAR CATEGORY

ABOUT US

Trending Tags