గ్లోబల్ స్టార్‌గా అంతర్జాతీయ స్థాయిలో గుర్తింపు తెచ్చుకున్న బాలీవుడ్ నటి ప్రియాంక చోప్రా మరోసారి సోషల్ మీడియాలో చర్చనీయాంశంగా మారారు. దీపావళి పండుగ సందర్భంగా ఆమె పంచుకున్న ఫొటోలు నెటిజన్ల మధ్య చర్చకు దారితీశాయి. ముఖ్యంగా పండుగ వేడుకల్లో భాగంగా ఆమె మాంసాహారం తీసుకుంటున్నట్లు కనిపించడంపై కొందరు అభ్యంతరం వ్యక్తం చేస్తున్నారు.
అమెరికాలోని లాస్ ఏంజిల్స్‌లో ఉన్న తన నివాసంలో ప్రియాంక చోప్రా దీపావళి వేడుకలను జరుపుకున్నారు. ఈ సందర్భంగా ఇంటిని అందంగా అలంకరించిన ఫొటోలతో పాటు కుటుంబ సభ్యులతో గడిపిన మధుర క్షణాలను సోషల్ మీడియా వేదికగా అభిమానులతో పంచుకున్నారు. వేడుకలకు సంబంధించిన ఫుడ్ ఫొటోలను కూడా షేర్ చేశారు.
అయితే, ఈ ఫొటోల్లో ఒకదానిలో ప్రియాంక మాంసాహార వంటకం తీసుకుంటున్నట్లు కనిపించడంతో కొందరు నెటిజన్లు స్పందించారు. దీపావళి వంటి పండుగ రోజున నాన్‌వెజ్ తినడం ఏమిటంటూ ప్రశ్నలు సంధించారు. మరికొందరు దీపాల స్థానంలో కొవ్వొత్తులు ఉపయోగించడంపై, ఆమె దుస్తులు, హెయిర్ స్టైల్‌పై కూడా కామెంట్లు చేశారు. దీంతో ప్రియాంక దీపావళి వేడుకల ఫొటోలు నెట్టింట చర్చకు కారణమయ్యాయి.
మరోవైపు ప్రియాంకకు మద్దతుగా నిలుస్తున్నవారు కూడా ఉన్నారు. విదేశాల్లో నివసిస్తున్నప్పటికీ భారతీయ పండుగలను, సంప్రదాయాలను ఆమె ఎంతో ఇష్టంగా జరుపుకుంటారని గుర్తుచేస్తున్నారు. ఇటీవల దసరా వేడుకలను కూడా తన ఇంట్లో ప్రత్యేకంగా నిర్వహించారు. పూజలు, శివలింగ అభిషేకం, హోమం, కన్యా పూజ వంటి కార్యక్రమాల్లో పాల్గొన్న ఫొటోలను అప్పట్లో అభిమానులతో పంచుకున్నారు.
అంతేకాకుండా తన కుమార్తె మాలతి మేరీకి భారతీయ సంస్కృతి, సంప్రదాయాలను పరిచయం చేస్తూ పెంచుతున్నారు. పూజా కార్యక్రమాల్లో కుటుంబ సభ్యులు పాల్గొంటున్న దృశ్యాలను కూడా సోషల్ మీడియాలో పోస్ట్ చేస్తుంటారు. గతంలో నిక్ జోనాస్.. కుమార్తె మాలతి పాదాలను కడుగుతున్న ఫొటో కూడా అందరి దృష్టిని ఆకర్షించింది.
ఇలా ఒకవైపు ప్రియాంక భారతీయ సంప్రదాయాలను పాటిస్తున్న తీరుపై ప్రశంసలు వస్తుండగా, మరోవైపు దీపావళి వేడుకల్లో ఆమె తీసుకున్న ఆహారం చుట్టూ వివాదం కొనసాగుతోంది. దీంతో ఈ అంశం ప్రస్తుతం సోషల్ మీడియాలో హాట్ టాపిక్‌గా మారింది.
also read: ‘రామాయణ’ పైరసీ చేస్తే జైలుకే.. ప్రేక్షకులకు నిర్మాణ సంస్థ స్ట్రాంగ్ వార్నింగ్!