ఆంధ్రప్రదేశ్లో రైళ్ల ద్వారా గంజాయిని అక్రమంగా తరలిస్తున్న ముఠాలపై రైల్వే పోలీసులు చర్యలు చేపట్టారు. కాకినాడ జిల్లా తుని రైల్వే పోలీసులు నిర్వహించిన తనిఖీల్లో పలువురు నిందితులు పట్టుబడగా, వారి నుంచి భారీగా గంజాయిని స్వాధీనం చేసుకున్నారు.
హౌరా–చెన్నై మెయిల్ రైలులోని జనరల్ కంపార్ట్మెంట్లో పోలీసులు తనిఖీలు నిర్వహించారు. ఈ సందర్భంగా అనుమానాస్పదంగా ప్రయాణిస్తున్న ముగ్గురు యువకులను అదుపులోకి తీసుకున్నారు. వారి వద్ద ఒక్కొక్కరి నుంచి మూడు ప్యాకెట్ల చొప్పున గంజాయి లభించింది. మొత్తం సుమారు రెండు కిలోల గంజాయిని చాక్లెట్ల ఆకారంలో ప్యాక్ చేసి తరలిస్తున్నట్లు పోలీసులు గుర్తించారు. నిందితులు ఒడిశాకు చెందిన వారిగా పోలీసులు తెలిపారు.
మరో ఘటనలో భువనేశ్వర్ నుంచి బెంగళూరు వెళ్తున్న రైలులోనూ పోలీసులు తనిఖీలు చేపట్టారు. ఈ తనిఖీల్లో ఇద్దరు వ్యక్తుల వద్ద నుంచి సుమారు 13 కిలోల గంజాయిని స్వాధీనం చేసుకున్నారు. గంజాయిని అక్రమంగా తరలిస్తున్నట్లు గుర్తించిన పోలీసులు ఇద్దరినీ అరెస్ట్ చేశారు.
రైళ్లలో మాదకద్రవ్యాల అక్రమ రవాణాకు అడ్డుకట్ట వేసేందుకు తనిఖీలు ముమ్మరం చేసినట్లు రైల్వే పోలీసులు తెలిపారు. పట్టుబడిన నిందితులపై కేసులు నమోదు చేసి తదుపరి దర్యాప్తు కొనసాగిస్తున్నారు.
also read: వినాయక నిమజ్జనంలో భర్త మరో యువతితో డ్యాన్స్… మనస్తాపంతో భార్య ఆత్మహత్య