ఆంధ్రప్రదేశ్‌లోని ప్రభుత్వ ఆసుపత్రుల్లో వైద్య సేవల నాణ్యతను తెలుసుకునేందుకు వైద్య ఆరోగ్య శాఖ చేపట్టిన ఐవీఆర్‌ఎస్‌ సర్వేలో పలు లోపాలు వెలుగులోకి వచ్చాయి. ఆసుపత్రుల్లో చికిత్స పొందిన రోగుల నుంచి ఫోన్ ద్వారా అభిప్రాయాలను సేకరించిన అధికారులు.. వారి స్పందనలను విశ్లేషించి చర్యలకు దిగారు. ఈ క్రమంలో విధుల్లో నిర్లక్ష్యం వహించినట్లు ఆరోపణలు ఎదుర్కొంటున్న 135 మంది వైద్యులకు షోకాజ్ నోటీసులు జారీ చేశారు.
రోగులకు అందుతున్న వైద్య సేవలు, వైద్యుల పనితీరు, ఆసుపత్రుల్లో చికిత్సా విధానాలపై సర్వే ద్వారా వివరాలు సేకరించారు. ఈ సందర్భంగా కొన్ని అంశాల్లో రోగుల నుంచి తీవ్ర అసంతృప్తి వ్యక్తమైనట్లు అధికారులు గుర్తించారు. కొన్ని విభాగాలకు సంబంధించి అసంతృప్తి 100 శాతంగా నమోదైనట్లు వెల్లడైంది.
రోగుల నుంచి వచ్చిన అభిప్రాయాలను ప్రాతిపదికగా తీసుకున్న వైద్య ఆరోగ్య శాఖ.. సంబంధిత వైద్యుల నుంచి వివరణ కోరుతూ నోటీసులు పంపించింది. వైద్య సేవల్లో లోపాలు ఎందుకు తలెత్తాయి? రోగులకు మెరుగైన చికిత్స అందించడంలో సమస్యలు ఏమిటి? అనే అంశాలపై వివరణ ఇవ్వాలని ఆదేశించినట్లు సమాచారం.
ప్రభుత్వ ఆసుపత్రులకు వచ్చే పేద, మధ్యతరగతి ప్రజలకు నాణ్యమైన వైద్యం అందించాలనే లక్ష్యంతో ఈ విధమైన పర్యవేక్షణ చేపట్టినట్లు తెలుస్తోంది. అయితే షోకాజ్ నోటీసులు అందుకున్న వైద్యులు ఇచ్చే వివరణ ఆధారంగా శాఖాపరమైన తదుపరి చర్యలు ఉండే అవకాశం ఉంది.
also read: ఎన్నికల్లో ఘన విజయం.. సంబరాల తర్వాత విషాదం.. టీడీపీ ఎంపీటీసీ అభ్యర్థి మృతి!