క్రైమ్ మిర్రర్ : ఇంట్లో నుంచే పని చేస్తూ సులభంగా డబ్బులు సంపాదించవచ్చంటూ ఆశ చూపిస్తూ ప్రజలను బోల్తా కొట్టిస్తున్న సైబర్ నేరగాళ్ల ముఠా గుట్టును ఢిల్లీ పోలీసులు రట్టు చేశారు. ఉద్యోగాలు, పార్ట్టైమ్ వర్క్ పేరుతో ప్రజలను ఆకర్షించి వారి నుంచి భారీ మొత్తంలో డబ్బులు దోచుకుంటున్న అంతర్జాతీయ సైబర్ నెట్వర్క్తో సంబంధాలున్న నలుగురిని పోలీసులు అరెస్ట్ చేశారు.
పోలీసుల దర్యాప్తులో ఈ ముఠాకు చైనాలో ఉన్న సైబర్ నేరగాళ్లతో సంబంధాలు ఉన్నట్లు వెల్లడైంది. భారత్లో ఉంటున్న నిందితులు చైనాలోని ప్రధాన నిందితులకు అవసరమైన బ్యాంకు ఖాతాలు, సిమ్ కార్డులను సమకూర్చేవారని పోలీసులు గుర్తించారు. మోసాల ద్వారా వచ్చిన నగదును తరలించేందుకు ఉపయోగించే ‘మ్యూల్’ బ్యాంకు ఖాతాలను ఏర్పాటు చేయడంలో వీరు కీలకంగా వ్యవహరించినట్లు అధికారులు తెలిపారు.
వర్క్ ఫ్రమ్ హోమ్, పార్ట్టైమ్ ఉద్యోగాలు, ఆన్లైన్ టాస్క్ల పేరుతో బాధితులను సంప్రదించి, మొదట చిన్న మొత్తాల్లో చెల్లింపులు చేయిస్తూ నమ్మకం కలిగించేవారని పోలీసులు వెల్లడించారు. అనంతరం ఎక్కువ మొత్తంలో పెట్టుబడి పెట్టాలని లేదా వివిధ టాస్క్లను పూర్తి చేయడానికి డబ్బులు చెల్లించాలని ఒత్తిడి తెచ్చి మోసాలకు పాల్పడినట్లు అనుమానిస్తున్నారు.
ఈ వ్యవహారంలో నిందితులు ఒక్కో లావాదేవీకి కమీషన్ తీసుకునేవారని, ఖాతాల ద్వారా జరిగిన లావాదేవీలకు సంబంధించిన వివరాలను ప్రత్యేకంగా నమోదు చేసుకునేవారని పోలీసులు తెలిపారు. భారత్లో సైబర్ మోసాలకు పాల్పడేందుకు విదేశాల్లో ఉన్న నేరగాళ్లకు స్థానికంగా అవసరమైన వనరులు అందించడం వీరి ప్రధాన బాధ్యతగా ఉన్నట్లు దర్యాప్తులో తేలింది.
అరెస్టయిన నిందితుల నుంచి పోలీసులు 9 బ్యాంక్ పాస్బుక్లు, 5 సిమ్ కార్డులు, 6 మొబైల్ ఫోన్లు స్వాధీనం చేసుకున్నారు. వీటితో పాటు నిందితులకు అందిన కమీషన్లు, బ్యాంకు లావాదేవీలకు సంబంధించిన వివరాలను కూడా సేకరించారు. ఈ ముఠా ద్వారా ఎంతమందిని మోసం చేశారు, మొత్తం ఎంత నగదు చేతులు మారింది, ఈ నెట్వర్క్లో ఇంకా ఎవరెవరు ఉన్నారనే అంశాలపై పోలీసులు దర్యాప్తు కొనసాగిస్తున్నారు. విదేశాల్లో ఉన్న ప్రధాన నిందితుల పాత్రపైనా ఆరా తీస్తున్నారు.
ఇలాంటి మోసాలకు గురికాకుండా ప్రజలు అప్రమత్తంగా ఉండాలని పోలీసులు సూచిస్తున్నారు. ఇంటి నుంచే పని చేస్తూ భారీగా సంపాదించవచ్చంటూ గుర్తుతెలియని వ్యక్తులు పంపే లింకులు, యాప్లు లేదా బ్యాంకు ఖాతాల వివరాలను నమ్మకూడదని హెచ్చరిస్తున్నారు. ఉద్యోగం పేరుతో ముందుగానే డబ్బులు చెల్లించాలని కోరితే మరింత జాగ్రత్తగా వ్యవహరించాలని సూచించారు.
also read : ఇంటి ముందు మద్యం తాగొద్దన్నందుకు యువతిపై కత్తితో దాడి.. దారుణ హత్య