బ్యాంకు లాకర్లలో నగలు, విలువైన వస్తువులు భద్రపరుచుకుంటే పూర్తి భద్రత ఉంటుందని చాలామంది నమ్ముతారు. అయితే మధ్యప్రదేశ్ రాజధాని భోపాల్‌లో వెలుగుచూసిన ఓ ఘటన ఈ నమ్మకంపై ప్రశ్నలు లేవనెత్తుతోంది. రిటైర్డ్ సీనియర్ ఐఏఎస్ అధికారి ఏపీ శ్రీవాస్తవకు చెందిన ఎస్బీఐ లాకర్‌లో విలువైన వస్తువులు కనిపించకుండా పోవడం తీవ్ర కలకలం రేపుతోంది. బ్యాంకుకు వెళ్లి లాకర్ తెరిచి చూడగా అందులో ఏమీ లేకపోవడంతో ఆయన షాక్‌కు గురయ్యారు.
భోపాల్‌లోని ఇండియన్ ఇన్‌స్టిట్యూట్ ఆఫ్ ఫారెస్ట్ మేనేజ్‌మెంట్ (ఐఐఎఫ్ఎం) క్యాంపస్‌లో ఉన్న స్టేట్ బ్యాంక్ ఆఫ్ ఇండియా (ఎస్బీఐ) శాఖలో శ్రీవాస్తవకు లాకర్ ఉంది. తన ఇద్దరు కుమార్తెలు సురభి, శ్రుతిలతో కలిసి ఆయన ఈ లాకర్‌ను ఉమ్మడిగా నిర్వహిస్తున్నారు. గురువారం ఉదయం కుమార్తె సురభితో కలిసి బ్యాంకుకు వెళ్లిన ఆయన లాకర్ తెరిచేందుకు ప్రయత్నించారు. అయితే లాక్ మొరాయించడంతో ఆయన బ్యాంకు సిబ్బంది సహాయం కోరారు. అనంతరం సిబ్బంది సమక్షంలో లాకర్‌ను తెరిచి పరిశీలించగా అందులో ఆభరణాలు, ఇతర విలువైన వస్తువులు కనిపించలేదు.
దీంతో ఏపీ శ్రీవాస్తవ తీవ్ర ఆందోళనకు గురయ్యారు. తాము భద్రపరిచిన వస్తువులన్నీ ఏమయ్యాయో అర్థం కావడం లేదని ఆవేదన వ్యక్తం చేశారు. ఈ లాకర్‌ను చివరిసారిగా 2024లో తెరిచామని, ఆ తర్వాత మళ్లీ ఇప్పుడే ఉపయోగించామని వెల్లడించారు. ఇంతకాలం భద్రంగా ఉన్నాయని భావించిన వస్తువులు కనిపించకపోవడంతో కుటుంబ సభ్యులు సైతం ఆందోళన చెందుతున్నారు.
ఈ వ్యవహారంపై ఎస్బీఐ బ్రాంచ్ మేనేజర్ హరీశ్ మెహ్రా స్పందించారు. ఏపీ శ్రీవాస్తవ తమ బ్యాంకుకు ముఖ్యమైన ఖాతాదారుడని పేర్కొన్నారు. లాకర్ తెరవడంలో సమస్య ఎదురవడంతో సిబ్బంది సహాయంతో దాన్ని తెరిచినట్లు తెలిపారు. అయితే లోపల ఎలాంటి వస్తువులు కనిపించలేదని ధ్రువీకరించారు. ఖాతాదారులు తాము భద్రపరిచిన వస్తువుల విషయంలో పొరపాటున మర్చిపోయి ఉండవచ్చని, మరో లాకర్‌లో ఉంచి ఉండే అవకాశాన్ని కూడా పరిశీలించాల్సి ఉందని అభిప్రాయపడ్డారు. అయితే లాకర్ ఖాళీగా కనిపించడానికి అసలు కారణం ఏమిటన్నది ఇంకా తెలియాల్సి ఉంది.
మరోవైపు ఈ ఘటనపై పోలీసులు దర్యాప్తు ప్రారంభించారు. కమలా నగర్ పోలీస్ స్టేషన్ పరిధిలోని దర్యాప్తు అధికారి నిరూపా పాండే మాట్లాడుతూ.. అన్ని కోణాల్లోనూ విచారణ చేపడుతున్నట్లు తెలిపారు. బాధితుడి నుంచి అధికారికంగా లిఖితపూర్వక ఫిర్యాదు అందాల్సి ఉందని వెల్లడించారు. విచారణకు పూర్తిస్థాయిలో సహకరిస్తామని బ్యాంకు అధికారులు కూడా స్పష్టం చేశారు.
అసలు లాకర్‌లోని వస్తువులు ఎక్కడికి వెళ్లాయి? వాటిని ఎవరైనా తీసుకెళ్లారా? లేక మరేదైనా కారణం ఉందా? అన్న ప్రశ్నలకు పోలీసుల దర్యాప్తులో సమాధానం లభించాల్సి ఉంది.
also read: ఓవర్‌టేక్ చేశాడన్న కోపంతో 26 ఏళ్ల యువకుడిపై మైనర్ల కత్తుల దాడి.. 700 కుట్లు!