క్రైమ్ మిర్రర్ : హైదరాబాద్ జలమండలిలో పనిచేస్తున్న ఔట్‌సోర్సింగ్ సిబ్బందిని వరుస మరణాలు కలవరపెడుతున్నాయి. కేవలం రెండు నెలల వ్యవధిలో తొమ్మిది మంది ఉద్యోగులు ప్రాణాలు కోల్పోవడం ఆందోళనకు గురిచేస్తోంది. మరోవైపు ఉద్యోగుల ఉపాధికి ముప్పు కలిగించేలా కొత్త టెండర్ విధానం తీసుకొచ్చారంటూ సిబ్బంది ఆందోళన వ్యక్తం చేస్తున్నారు.
675 మంది మీటర్ రీడర్ల భవిష్యత్తుపై ఆందోళన
జలమండలిలో పనిచేస్తున్న సుమారు 675 మంది మీటర్ రీడర్ల కుటుంబాల జీవనోపాధిపై కొత్త టెండర్ ప్రక్రియ ప్రభావం చూపే అవకాశం ఉందని ఉద్యోగ సంఘాలు పేర్కొంటున్నాయి. ఇప్పటికే వరుస మరణాలతో బాధలో ఉన్న ఉద్యోగుల్లో ఈ నిర్ణయం మరింత అభద్రతను పెంచుతోందని ఆవేదన వ్యక్తం చేస్తున్నారు.
టెండర్ ప్రక్రియను నిలిపివేయాలని డిమాండ్
తెలంగాణ రాష్ట్ర ఔట్‌సోర్సింగ్ జేఏసీ ఈ పరిణామాలపై స్పందిస్తూ పలు డిమాండ్లను ముందుకు తెచ్చింది. ఉద్యోగుల జీవితాలను ప్రభావితం చేసే టెండర్ ప్రక్రియను తక్షణమే నిలిపివేయాలని కోరింది. మరో ఉద్యోగి ప్రాణాలు కోల్పోయే పరిస్థితి రాకముందే అధికారులు జోక్యం చేసుకోవాలని విజ్ఞప్తి చేసింది. అలాగే విధుల్లో ఉండగా మరణించిన ఉద్యోగుల కుటుంబాలకు తగిన ఆర్థిక పరిహారం అందించాలని డిమాండ్ చేసింది. బాధిత కుటుంబాలకు న్యాయం చేయడంతో పాటు ఉద్యోగుల ఉపాధికి భరోసా కల్పించాలని కోరుతోంది.
అధికారుల స్పందన కోసం ఎదురుచూపులు
ఒకవైపు వరుస మరణాలు.. మరోవైపు ఉద్యోగ భద్రతపై అనిశ్చితి నెలకొనడంతో జలమండలి ఔట్‌సోర్సింగ్ సిబ్బంది ఆందోళనలో ఉన్నారు. ఇన్ని పరిణామాలు జరుగుతున్నప్పటికీ ఉన్నతాధికారుల నుంచి స్పష్టమైన స్పందన రాకపోవడంపై ఉద్యోగ సంఘాలు అసంతృప్తి వ్యక్తం చేస్తున్నాయి. తమ సమస్యలను అధికారులు సానుకూలంగా పరిశీలించి, టెండర్ ప్రక్రియపై పునరాలోచన చేయాలని ఔట్‌సోర్సింగ్ ఉద్యోగులు కోరుతున్నారు.
also read : అక్రమ సంబంధానికి అడ్డొస్తున్నాడని కన్నకొడుకునే కడతేర్చిన తల్లి.. ప్రియుడితో కలిసి దారుణం