క్రైమ్ మిర్రర్ : నవమాసాలు మోసి జన్మనిచ్చిన తల్లే కాలయమురాలిగా మారింది. తన వివాహేతర బంధానికి కుమారుడు అభ్యంతరం చెబుతున్నాడనే కోపంతో అతడిని అంతమొందించేందుకు ప్రియుడితో కలిసి కుట్ర పన్నింది. పక్కా ప్రణాళికతో కుమారుడిని నమ్మించి తీసుకెళ్లి హత్య చేయించింది. ఈ దారుణ ఘటన కర్ణాటకలోని బెళగావి జిల్లాలో నవంబర్ 1న చోటుచేసుకుంది. పోలీసుల విచారణలో తల్లే ప్రధాన నిందితురాలిగా తేలడంతో ఈ ఉదంతం తీవ్ర సంచలనం సృష్టించింది.
తల్లి వివాహేతర బంధమే హత్యకు కారణం!
పోలీసుల వివరాల ప్రకారం.. విజయ్ నారాయణ (24) తన తల్లి మీనా నారాయణ (44)తో కలిసి బెంగళూరులో నివసించేవాడు. కొన్నేళ్ల క్రితం భర్త మరణించడంతో మీనా కుమారుడితో కలిసి జీవిస్తోంది. ఆమె స్థానికంగా ఓ బ్యూటీ పార్లర్‌లో మేనేజర్‌గా పనిచేస్తోంది. అదే పార్లర్‌కు సంబంధించిన పనుల్లో రాకేశ్ జామూని అనే వ్యక్తి కారు డ్రైవర్‌గా పనిచేస్తున్నాడు. మహారాష్ట్రలోని గడెహింగ్లజ్ తాలూకా తేరణి గ్రామానికి చెందిన రాకేశ్‌తో మీనాకు పరిచయం ఏర్పడింది. కొంతకాలానికి వీరిద్దరి పరిచయం వివాహేతర సంబంధంగా మారింది. ఈ విషయం కుమారుడు విజయ్‌కు తెలియడంతో తల్లిని నిలదీశాడు. ఇలాంటి వ్యవహారాలకు స్వస్తి పలకాలని హెచ్చరించాడు. అయితే కుమారుడి అభ్యంతరాలు తమ బంధానికి అడ్డంకిగా మారాయని భావించిన మీనా, రాకేశ్ అతడిని చంపాలని నిర్ణయించుకున్నారు.
ప్రయాణం పేరుతో పిలిచి.. ప్రాణాలు తీసి!
తమ పథకాన్ని అమలు చేసేందుకు మీనా కుమారుడిని ఊరికి వెళ్లొద్దామని నమ్మించింది. అందుకు విజయ్ అంగీకరించడంతో తల్లీకొడుకులు రాకేశ్ కారులో ప్రయాణం ప్రారంభించారు. మార్గమధ్యంలో విజయ్‌కు ఇచ్చిన శీతల పానీయంలో నిద్రమాత్రలు కలిపినట్లు పోలీసుల దర్యాప్తులో వెల్లడైంది. విజయ్ అపస్మారక స్థితిలోకి వెళ్లిన తర్వాత అతడిని హత్య చేశారు. అనంతరం బెళగావి ప్రాంతానికి చేరుకున్న నిందితులు మృతదేహాన్ని రహదారి పక్కన వదిలేసి వెళ్లిపోయారు. ఈ నేరంలో రాకేశ్‌కు చెందిన మరికొందరు స్నేహితులు కూడా సహకరించినట్లు పోలీసుల ప్రాథమిక విచారణలో తేలింది.
తల్లితో పాటు ఐదుగురు అరెస్ట్
మృతదేహం లభ్యమైన తర్వాత పోలీసులు కేసు నమోదు చేసి దర్యాప్తు చేపట్టారు. విచారణలో హత్య వెనుక తల్లి మీనా, ఆమె ప్రియుడు రాకేశ్ పాత్ర ఉన్నట్లు గుర్తించారు. దీంతో మీనా నారాయణ, రాకేశ్ జామూనితో పాటు ఈ నేరానికి సహకరించిన సచిన్ కాంబ్లె, మనోజ్ కాంబ్లె, తమ్మణ్ణ కాంబ్లె, ఏకనాథ కాంబ్లెలను పోలీసులు అరెస్ట్ చేశారు. వివాహేతర సంబంధం కోసం కన్నకొడుకునే బలితీసుకున్న తల్లి ఉదంతం స్థానికంగా తీవ్ర చర్చనీయాంశంగా మారింది. ఈ కేసులో మరిన్ని వివరాలపై పోలీసులు దర్యాప్తు కొనసాగిస్తున్నారు.
also read : భార్యపై అనుమానం.. గొంతు నులిమి హత్య.. అత్యాచారంగా చిత్రీకరించేందుకు భర్త కుట్ర