దేశ రాజధాని ఢిల్లీలో దీపావళి వేడుకల అనంతరం వాయు కాలుష్యం ప్రమాదకర స్థాయికి చేరుకుంది. నగరంలోని పలు ప్రాంతాలను దట్టమైన పొగ కమ్మేయడంతో ప్రజలు తీవ్ర ఇబ్బందులు ఎదుర్కొంటున్నారు. ముఖ్యంగా ఉదయం, రాత్రి వేళల్లో రహదారులపై ఎదురుగా వస్తున్న వాహనాలు కూడా కనిపించని పరిస్థితి నెలకొంది. గాలి నాణ్యత దారుణంగా పడిపోవడంతో రాజకీయంగానూ ఈ అంశం తీవ్ర చర్చకు దారితీసింది. అధికార బీజేపీ, కాంగ్రెస్‌, ఆమ్‌ ఆద్మీ పార్టీ (ఆప్‌) నేతల మధ్య ఆరోపణలు, ప్రత్యారోపణలు మొదలయ్యాయి.
ఆదివారం రాత్రి 11.05 గంటల సమయంలో ఢిల్లీ సగటు గాలి నాణ్యత సూచీ (AQI) 373గా నమోదైంది. నగరంలోని అలీపూర్‌, బవానా, బురారీ, చాందినీ చౌక్‌, ముండ్కా, పంజాబీ బాగ్‌, రోహిణి, వివేక్‌ విహార్‌ తదితర ప్రాంతాల్లో ఏక్యూఐ 400 మార్కును దాటింది. దీంతో ఆయా ప్రాంతాల్లో గాలి నాణ్యత అత్యంత ప్రమాదకర పరిస్థితికి చేరినట్లు స్పష్టమవుతోంది.
కాలుష్య గణాంకాలు దాచిపెడుతున్నారా?
ఢిల్లీలో కాలుష్యాన్ని పర్యవేక్షించే కేంద్రాల నుంచి కీలక సమయంలో వివరాలు అందుబాటులో లేకపోవడంపై కాంగ్రెస్‌ నేత పవన్‌ ఖేరా ప్రశ్నలు లేవనెత్తారు. నగరంలోని 39 పర్యవేక్షణ కేంద్రాల్లో 25 కేంద్రాలు నవంబర్‌ 9 తెల్లవారుజామున 2 గంటల నుంచి 3 గంటల మధ్య పీఎం2.5 కాలుష్య వివరాలను నమోదు చేయలేదని ఆయన ఆరోపించారు. కాలుష్య స్థాయిలను ప్రభుత్వం ఉద్దేశపూర్వకంగా దాచిపెడుతోందా? లేక పరికరాల సామర్థ్యానికి మించిన స్థాయిలో కాలుష్యం నమోదైందా? అని ప్రశ్నించారు. గణాంకాలు అందుబాటులో లేకపోవడం వల్ల వాయు కాలుష్యం తగ్గిపోదని వ్యాఖ్యానించారు.
దీపావళి రాత్రి ఏక్యూఐ 3,000 దాటిందంటూ ఆప్‌ ఆరోపణ
మరోవైపు ఆమ్‌ ఆద్మీ పార్టీ కూడా ప్రభుత్వంపై విమర్శలు గుప్పించింది. దీపావళి రాత్రి ఢిల్లీలోని కొన్ని ప్రాంతాల్లో ఏక్యూఐ 3,000 దాటిందని ఆప్‌ నేత సౌరభ్‌ భరద్వాజ్‌ ఓ వీడియోను ప్రస్తావిస్తూ ఆరోపించారు. కాలుష్య తీవ్రతను ప్రభుత్వం తక్కువ చేసి చూపించే ప్రయత్నం చేస్తోందని విమర్శించారు.
కాంగ్రెస్‌, ఆప్‌పై బీజేపీ ఎదురుదాడి
విపక్షాల విమర్శలను బీజేపీ ఎంపీ ప్రవీణ్‌ ఖండేల్వాల్‌ తిప్పికొట్టారు. ఢిల్లీలో కాంగ్రెస్‌ 15 సంవత్సరాలు, ఆమ్‌ ఆద్మీ పార్టీ 10 సంవత్సరాల పాటు అధికారంలో ఉన్నప్పటికీ కాలుష్య నియంత్రణకు సరైన చర్యలు తీసుకోలేదని విమర్శించారు. గత ప్రభుత్వాల వైఫల్యాల కారణంగానే నగరంలో కాలుష్య సమస్య తీవ్రంగా మారిందని ఆరోపించారు. హిందూ పండుగలు వచ్చినప్పుడే విపక్షాలు వాయు కాలుష్యాన్ని ప్రధాన అంశంగా తీసుకొస్తున్నాయని మండిపడ్డారు.
మొత్తంగా దీపావళి తర్వాత ఢిల్లీలో పెరిగిన వాయు కాలుష్యం ప్రజారోగ్యంపై ఆందోళన కలిగిస్తుండగా, ఈ సమస్యకు బాధ్యత ఎవరిదన్న అంశంపై రాజకీయ పార్టీల మధ్య వివాదం ముదురుతోంది. కాలుష్య నియంత్రణకు తక్షణ చర్యలు తీసుకోవాలని నగరవాసులు కోరుతున్నారు.
also read: దీపావళి వేళ భాగ్యలక్ష్మి ఆలయానికి భక్తుల పోటెత్తు.. గుల్జార్ హౌస్ వరకు క్యూలైన్లు!