‘కాంతార’ సినిమాతో దేశవ్యాప్తంగా ప్రత్యేక గుర్తింపు తెచ్చుకున్న నటుడు, దర్శకుడు ఇప్పుడు కొత్త టాలెంట్కు అవకాశం కల్పించేందుకు సిద్ధమయ్యారు. ఆయనకు చెందిన నిర్మాణ సంస్థ రిషబ్ శెట్టి ఫిల్మ్స్ ఆధ్వర్యంలో తెరకెక్కనున్న ఓ కొత్త ప్రాజెక్ట్ కోసం ఓపెన్ కాస్టింగ్ కాల్ను ప్రకటించారు.
సినిమాల్లో నటించాలని కలలు కంటున్న కొత్తవారికి ఇది మంచి అవకాశంగా మారనుంది. ఈ ప్రాజెక్ట్లోని వివిధ పాత్రలకు సరిపోయే కొత్త ముఖాలను ఎంపిక చేసేందుకు ఆడిషన్స్ నిర్వహించనున్నారు. అక్టోబర్ 2న బెంగళూరులోని విజయా కాలేజీలో ఈ ఆడిషన్స్ జరగనున్నాయి.
ఈ కాస్టింగ్ కాల్కు సంబంధించి వయోపరిమితిని కూడా నిర్వాహకులు ప్రకటించారు. పురుషులు 20 నుంచి 65 ఏళ్ల మధ్య, మహిళలు 20 నుంచి 60 ఏళ్ల మధ్య వయసు కలిగి ఉండాలి. నటనపై ఆసక్తి ఉన్నవారు తమ రెజ్యూమ్, ప్రొఫైల్తో పాటు గతంలో చేసిన పనులకు సంబంధించిన లింకులను [email protected] ఈ-మెయిల్కు పంపవచ్చు.
రిషబ్ శెట్టి తన అధికారిక ఎక్స్ ఖాతా ద్వారా ఈ కాస్టింగ్ కాల్ వివరాలను వెల్లడించారు. విభిన్న పాత్రలకు సరిపోయే ప్రతిభావంతులైన కొత్త నటీనటులను ఈ ప్రాజెక్ట్ కోసం ఎంపిక చేయనున్నట్లు తెలిపారు.
సినీ రంగంలోకి అడుగుపెట్టాలని చాలాకాలంగా ఎదురుచూస్తున్న వారికి ఈ ఆడిషన్స్ తమ ప్రతిభను పరిచయం చేసుకునే వేదికగా నిలవనున్నాయి. అయితే ఎంపిక ప్రక్రియకు సంబంధించిన పూర్తి వివరాలు, అర్హతలు, ఇతర తాజా సమాచారం కోసం రిషబ్ శెట్టి ఫిల్మ్స్, రిషబ్ శెట్టి అధికారిక సోషల్ మీడియా ఖాతాలను పరిశీలించాలని నిర్వాహకులు సూచించారు.
also read: సంపూర్ణేశ్ బాబు క్లారిటీ.. నాగేంద్ర కుమార్తో వివాదంపై హీరో స్పందన