‘ది ప్యారడైజ్’ సినిమా ప్రమోషన్స్లో భాగంగా జరిగిన ఓ ఇంటర్వ్యూ ప్రస్తుతం సోషల్ మీడియాలో చర్చనీయాంశంగా మారింది. జర్నలిస్ట్ నాగేంద్ర కుమార్ చేసిన వ్యాఖ్యలపై సంపూర్ణేశ్ బాబు అభిమానులు అభ్యంతరం వ్యక్తం చేయడంతో వివాదం తలెత్తింది. తాజాగా ఈ వ్యవహారంపై సంపూర్ణేశ్ బాబు స్వయంగా స్పందించి స్పష్టత ఇచ్చారు.
సినిమా ప్రమోషన్లో భాగంగా నాగేంద్ర కుమార్తో సంపూర్ణేశ్ బాబు ఇంటర్వ్యూలో పాల్గొన్నారు. ఈ సందర్భంగా సినీ నేపథ్యం లేకపోయినా పరిశ్రమలోకి ఎందుకు వచ్చారనే విషయంపై ప్రశ్నిస్తూ.. కొంత ఘాటైన పదజాలాన్ని నాగేంద్ర కుమార్ ఉపయోగించారు. ముఖ్యంగా ‘మీకెందుకంత దురద?’ అంటూ చేసిన వ్యాఖ్యలు సోషల్ మీడియాలో వైరల్ అయ్యాయి.
ఈ వ్యాఖ్యలపై సంపూర్ణేశ్ బాబు అభిమానులు, పలువురు నెటిజన్లు తీవ్రంగా స్పందించారు. నటుడిని ఉద్దేశించి అలాంటి వ్యాఖ్యలు చేయడం సరికాదంటూ జర్నలిస్టుపై విమర్శలు వ్యక్తమయ్యాయి. దీంతో విషయం మరింత చర్చకు దారితీసింది.
విమర్శలు పెరగడంతో నాగేంద్ర కుమార్ తన వ్యాఖ్యలపై వివరణ ఇచ్చారు. తాను కావాలని ఎవరినీ కించపరిచే ఉద్దేశంతో ఆ మాటలు చెప్పలేదని, సంభాషణ సమయంలో చనువుతో మాట్లాడుతుండగా అలా వచ్చాయని తెలిపారు. అనంతరం తన వ్యాఖ్యలపై క్షమాపణలు కూడా చెప్పారు.
ఇక ఈ వివాదానికి ముగింపు పలికేలా సంపూర్ణేశ్ బాబు తాజాగా ఓ వీడియో విడుదల చేశారు. నాగేంద్ర కుమార్ తనకు చాలా సన్నిహితమైన వ్యక్తి అని ఆయన తెలిపారు. ‘హృదయ కాలేయం’ సినిమా సమయంలోనే జర్నలిస్టులతో తనకు మంచి అనుబంధం ఏర్పడిందని, అప్పటి నుంచి చాలామంది తనను సోదరుడిలా ఆదరిస్తున్నారని చెప్పారు.
తమ మధ్య ఉన్న సాన్నిహిత్యం, చనువు కారణంగానే నాగేంద్ర కుమార్ ఆ వ్యాఖ్యలు చేశారని సంపూర్ణేశ్ బాబు వివరించారు. వాటిని ఎవరూ మరో విధంగా అర్థం చేసుకోవద్దని, ఈ విషయాన్ని వివాదంగా చూడొద్దని అభిమానులను కోరారు.
సంపూర్ణేశ్ బాబు స్వయంగా వివరణ ఇవ్వడంతో ఈ ఇంటర్వ్యూ చుట్టూ నెలకొన్న వివాదం క్రమంగా సద్దుమణిగే పరిస్థితి కనిపిస్తోంది. ప్రస్తుతం ఆయన విడుదల చేసిన వీడియో సోషల్ మీడియాలో వైరల్గా మారింది.
also read: ‘ది ప్యారడైజ్’ ప్రమోషన్స్లో వివాదం.. సంపూర్ణేష్ బాబుకు జర్నలిస్ట్ క్షమాపణలు