ఉత్తరప్రదేశ్లోని బాగ్పత్ జిల్లాలో ఓ హత్య కేసు సంచలనంగా మారింది. వివాహేతర సంబంధం విషయంలో 16 ఏళ్ల బాలికను దారుణంగా హత్య చేసిన ఘటన ఆలస్యంగా వెలుగులోకి వచ్చింది. ఈ కేసులో సాగర్ అనే వ్యక్తితో పాటు అతని భార్యను పోలీసులు అరెస్ట్ చేశారు.
పోలీసుల వివరాల ప్రకారం.. మథురకు చెందిన 16 ఏళ్ల బాలికతో సాగర్కు వివాహేతర సంబంధం ఉన్నట్లు తెలుస్తోంది. ఈ విషయం తన కుటుంబ జీవితంపై ప్రభావం చూపుతుందనే అనుమానంతో సాగర్, తన భార్యతో కలిసి బాలికను హత్య చేయాలని నిర్ణయించుకున్నట్లు పోలీసులు తెలిపారు.
పథకం ప్రకారం బాలికను ఢిల్లీకి పిలిపించిన దంపతులు.. అక్కడ ఆమెను గొంతు నులిమి హత్య చేసినట్లు దర్యాప్తులో వెల్లడైంది. అనంతరం మృతదేహాన్ని స్కూటర్పై తీసుకెళ్లి బాగ్పత్ పరిధిలోని అటవీ ప్రాంతానికి తరలించినట్లు పోలీసులు గుర్తించారు.
బాలిక మృతదేహాన్ని ఎవరూ గుర్తించకుండా ఉండేందుకు నిందితులు యాసిడ్ ఉపయోగించి ఆధారాలను చెరిపేసే ప్రయత్నం చేసినట్లు పోలీసులు వెల్లడించారు. క్రైమ్ సీరియల్స్ చూస్తూ నేరం చేసిన తర్వాత పోలీసులకు ఎలాంటి ఆధారాలు దొరకకుండా ఎలా తప్పించుకోవాలనే దానిపై నిందితులు ఆలోచించినట్లు దర్యాప్తులో తేలింది.
అయితే పోలీసులు కేసును వదిలిపెట్టకుండా వివిధ కోణాల్లో దర్యాప్తు కొనసాగించారు. సుమారు 25 రోజుల తర్వాత కీలక ఆధారాలను సేకరించి నిందితుల కదలికలను గుర్తించారు. చివరకు సాగర్, అతని భార్యను అదుపులోకి తీసుకుని విచారించగా హత్యకు సంబంధించిన విషయాలు వెలుగులోకి వచ్చినట్లు పోలీసులు తెలిపారు.
ఈ ఘటనపై పోలీసులు మరింత దర్యాప్తు చేస్తున్నారు. హత్యకు దారితీసిన పూర్తి కారణాలు, నిందితుల పాత్రకు సంబంధించిన మరిన్ని వివరాలను అధికారులు సేకరిస్తున్నారు.
also read: మథురలో దారుణం.. కుటుంబ కలహాలతో భార్యను హత్య చేసిన భర్త