క్రైమ్ మిర్రర్, తెలంగాణ:- తెలంగాణ రాజకీయాల్లో ఇటీవల జరిగిన అనూహ్య పరిణామాలు మరియు మంత్రి కొండా సురేఖ బర్తరఫ్ వ్యవహారం రాష్ట్రవ్యాప్తంగా తీవ్ర చర్చనీయాంశంగా మారిన విషయం తెలిసిందే. ఈ నేపథ్యంలో ప్రజాశాంతి పార్టీ అధినేత కేఏ పాల్ తాజాగా స్పందిస్తూ రాష్ట్ర ప్రభుత్వంపై తీవ్రస్థాయిలో మండిపడ్డారు. కేవలం ఒక బీసీ బిడ్డ అయినందువల్లే కొండా సురేఖను మంత్రి పదవి నుంచి అన్యాయంగా తప్పించారని ఆయన ఆరోపించారు. గూగుల్ మరియు ఇతర వేదికల ద్వారా ఈ పరిణామాన్ని పరిశీలిస్తే, బలహీన వర్గాలకు జరుగుతున్న అన్యాయం స్పష్టమవుతోందని పేర్కొన్నారు.గతంలో పలువురు నేతలు పార్టీ వ్యతిరేక వ్యాఖ్యలు చేసినా, వివాదాస్పద వ్యాఖ్యలు చేసినా వారిపై ఎలాంటి చర్యలు తీసుకోలేదని కేఏ పాల్ గుర్తుచేశారు.
ఉదాహరణకు జగ్గారెడ్డి, కోమటిరెడ్డి బ్రదర్స్ వంటి నేతలు ఎన్నో విమర్శలు చేసినప్పటికీ వారిని ఎందుకు తొలగించలేదని ఆయన ప్రభుత్వాన్ని నిలదీశారు. కేవలం బలహీన వర్గాల నాయకులను మాత్రమే లక్ష్యంగా చేసుకుని పదవుల నుంచి తొలగించడం సరికాదని హితవు పలికారు.ఈ సందర్భంగా కొండా సురేఖను తన ప్రజాశాంతి పార్టీలోకి రావాల్సిందిగా కేఏ పాల్ సాదరంగా ఆహ్వానించారు. రాష్ట్రంలో గత 80 ఏళ్ల రాజకీయ చరిత్రను పరిశీలిస్తే, కేవలం 5 శాతం ఉన్న ఒకే వర్గానికి (రెడ్లకు) ఇప్పటివరకు 12 సార్లు ముఖ్యమంత్రి పదవులు దక్కాయని, కానీ సుమారు 90 శాతం జనాభా ఉన్న బలహీన వర్గాలకు మాత్రం ఎప్పుడూ తీవ్ర అన్యాయమే జరుగుతోందని ఆయన ఆవేదన వ్యక్తం చేశారు. ఇకనైనా బజారున పడిన బీసీలంతా ఏకం కావాలని, లేదంటే భవిష్యత్తులో రాజకీయంగా మరింత నష్టపోవాల్సి వస్తుందని హెచ్చరించారు. ఈ పరిణామాలు రాష్ట్ర రాజకీయాల్లో నూతన చర్చకు దారితీశాయి.
ఉత్తమ టీచర్లుగా 173 మంది ఎంపిక…! రేపు సీఎం చేతుల మీదుగా అవార్డుల ప్రధానం…